Read De Bibel JHF 4. Mose 31 Bible Online

4. Mose 31 - De Bibel JHF bible

4. Mose 31

²Eew Rach fa de Kjinja Israel aun de Midianita; doano saust du no dienem Volkj vesaumelt woaren.

³Un Moses räd toom Volkj un säd: Moakt von junt Mana reed toom Kjrich, daut see jäajen de Midianita utgonen, om de Rach Gottes aun Midian uttofieren.

⁴Ut aule Stam Israels 1000, sell jie nom Häa schekjen.

⁵Un daut worden 1000-de Israels 1000 von jiedrem Staum utjewält; 12 000 dee reed wieren toom Häa.

⁶Un Moses schekjt an, 1000 von jiedrem Staum, toom Kaumf, an un Pinehas, däm Sän von Eleasar, däm Priesta, nom Häa; un daut heilje Jereetschoft, un de Trompeeten toom Loarm blosen, wieren un siene Haunt.

⁷Un see streeden jäajen Midian, soo aus de Har däm Moses befoolen haud, un brochten aulet Menliche om.

⁸Un see brochten de Kjennichs om, met äare dootjeschloagne; Ewi un Rekem un Zur un Hur un Reba, 5 Kjennichs von Midian; un uk Bieleam, Beor sienem Sän, muaken see met daut Schwieet doot.

⁹Un de Kjinja Israel fieeden de Frues de Midianita un äare Kjinja jefangen wajch, un neemen aul äa Vee un aule Häaden un aul äa Hab un Goot;

¹⁰un aul äare Städa, äare Woninj un aul äare Zeltloaga vebrenden see met Fia.

¹¹Un see neemen aulen Raup aun Menschen un aun Vee,

¹²un brochten de Jefangne un däm Raup no Moses un no Eleasar, däm Priesta, un no de Jemeent de Kjinja Israel em Loaga, enne Läacht Moab, dee aum Jordan Jericho jäajenäwa licht.

¹³Un Moses un Eleasar, de Priesta, un aule Ferschten de Jemeent jinjen an butrem Loaga entjäajen.

¹⁴Un Moses wia oajalich äwa de Hauptmanna vom Häa, de Bowaschte äwa 1000 un de Bowaschte äwa 100, dee vom Kjrich kaumen;

¹⁵un Moses säd to an: Ha jie aule Frues aum Läwen jeloten?

¹⁶Kjikj, jo, see sent oppem Rot von Bieleam de Kjinja Israel toom Uasoak jeworden en de Sach von Peor, see ha eene Ontru jäajen däm Harn begonen, soo daut de Ploag äwa de Jemeent Gottes kaum.

¹⁷Soo brinjt aulet Menliche unja de Kjinja om, un aule Frues, dee met eenem Maun jeschlopen ha;

¹⁸oba aule Kjinja, aule Mejales, dee met kjeenem Maun jeschlopen ha, lot fa junt aum läwen.

¹⁹Oba jie loagat junt butrem Loaga säwen Doag; een jiedra, dee eenen Mensch omjebrocht haft, un een jiedra, dee eenen Erschloagnen aunjereat haft, jie sellen junt aum dredden Dach entsindje un aum säwenden Dach, jie un june Jefangne.

²⁰Un aule Kjleeda un aulet Jereetschoft von Fal un aules von Kosenhoa un aulet Jereetschoft von Holt sell jie entsindjen.

²¹Un Eleasar, de Priesta, räd toom Kjrichsvolkj, dee em Kaumf jegonen wieren: Dit es de Sazunk vom Jesaz, daut de Har befoolen haft:

²²Blooss daut Golt un daut Selwa, daut Koppa, daut Iesa, daut Zintj un daut Blie,

²³aules, waut Fia vedrajcht, sell jie derch daut Fia gonen loten, un daut woat rein sennen; blooss met däm Reinjungswota saul daut entsindicht woaren; un aules, waut daut Fia nich vedrajcht, sell jie derch daut Wota gonen loten.

²⁴Un aum säwenden Dach sell jie june Kjleeda wauschen, un jie woaren rein sennen, un nodäm kje jie em Loaga komen.

²⁵Un de Har räd too Moses un säd:

²⁶Nemm oppe Somm vom wajchjefieeden Raup, aun Menschen un aun Vee, du un Eleasar, de Priesta, un de Heipta de Vodasch de Jemeent;

²⁷un deel däm Raup oppe Halft tweschen dän, dee däm Kjrich jefieet ha, dee em Kjrich jegonen sent, un de gaunze Jemeent.

²⁸Un neem von de Kjrichsmana, dee em Kjrich jegonen sent, een Deel fa däm Harn; eene Seel von 500, von de Menschen un vonne Rinda un vonne Äsel un vom Kjlienvee;

²⁹von äare Halft saust du an nämen, un du saust dee Eleasar, däm Priesta, jäwen aus een Häwopfa fa däm Harn.

³⁰Un von de Halft de Kjinja Israel saust du eent nämen, von 50 een Stekj nämen, von de Menschen, vonne Rinda, vonne Äsel un vom Kjlienvee, von aulem Vee; un du saust daut de Leviten jäwen, dee däm Deenst aune Wonunk Gottes doonen.

³¹Un Moses un Eleasar, de Priesta, deeden, soo aus de Har Moses befoolen haud.

³²Un daut Jeraupte, waut vom Raup äwableef, daut et Kjrichsvolkj jemoakt haud, wia; 675 000 Stekj Kjlienvee,

³³un 72 000 Rinda,

³⁴un 61 000 Äsel;

³⁵un waut de Menschenseelen betraft, soo wieren dee Mejales, dee met kjeenem Maun jeschlopen hauden, aula toop 32 000 Seelen.

³⁶Un de Halft, dee äa Aundeel, dee toom Kjrich utjegonen wieren, de Zol vom Kjlienvee wia, 337 500 Stekj;

³⁷un daut Deel vom Kjlienvee fa däm Harn wia 675 Stekj;

³⁸un de Zol de Rinda 36 000, un daut Deel doavon fa däm Harn wia 72;

³⁹un de Äsel 30 500, un daut Deel doavon fa däm Harn wia 61;

⁴⁰un Menschenseelen 16 000, un daut Deel doavon fa däm Harn 32 Seelen.

⁴¹Un Moses jeef daut Deel vom Häwopfa Gottes Eleasar, däm Priesta, soo aus de Har Moses befoolen haud.

⁴²Un von de Halft de Kjinja Israel, dee Moses von dän toom Kjrich utjegonen Mana aufjedeelt haud,

⁴³(de Halft de Jemeent wia; 337 500 Stekj Kjlienvee,

⁴⁴un Rinda 36 000,

⁴⁵un Äsel 30 500,

⁴⁶un Menschenseelen 16 000).

⁴⁷un vonne Halft de Kjinja Israel neem Moses, eent von 50, von de Menschen un von däm Vee, un jeef daut de Leviten, dee däm Deenst aune Wonunk Gottes deeden; soo aus de Har Moses befoolen haud.

⁴⁸Un daut kaumen no Moses de Hauptmanna äwa 1 000 vom Häa, de Bowaschte äwa 1 000 un äwa 100,

⁴⁹un säden to Moses: Diene Kjnajchts ha de Somm de Kjrichsmana oppjenomen, dee unja onse Haunt wieren, un daut fält von ons nich een Maun.

⁵⁰Un soo brinj wie eene Opfagow fa däm Harn, een jiedra, waut hee aun goldnem Jereetschoft jefungen haft: Oarmrinj un Hauntrinj, Finjarinj, Uarinj un Klaumasch, om fa onse Seelen Veseenunk ver däm Harn to doonen.

⁵¹Un Moses un Eleasar, de Priesta, naumen daut Golt von an, aulahaunt goldne Hauntoabeit.

⁵²Un aulet Häwopfa Golt, daut see fa däm Harn hoowen, wia 16 750 Schekel, von de Bowaschte äwa 1 000 un von de Bowaschte äwa 100.

⁵³(Oba de Kjrichslied hauden een jiedra fa sikj jeraupt).

⁵⁴Un Moses un Eleasar, de Priesta, neemen daut Golt von de Bowaschte äwa 1 000 un äwa 100 un brochten daut em Zelt de Bejäajnunk, aus een Jedajchnis fa de Kjinja Israel ver däm Harn.