Read De Bibel JHF 4. Mose 34 Bible Online

4. Mose 34 - De Bibel JHF bible

4. Mose 34

¹Un de Har räd too Moses un säd:

²Befäl de Kjinja Israel un saj to an: Wan jie en daut Launt Kanaan komen, soo es dit daut Launt, daut junt aus Oawgoot toofaule saul: Daut Launt Kanaan no siene Jrensen.

³De siedlicha Raunt saul junt de Wieste Zin sennen, Edom delenjd, un de siedliche Jrens saul junt vom Enj aum Soltmäa jäajen Oosten sennen.

⁴Un de Jrens saul sikj siedlich von däm Aunboajch Akrabbim un no Zin han dreien, un äa Utgank es siedlich vom Kades-Barnea; un dee jeit no Hazar-Addar han, un jeit äwa no Azmon;

⁵un de Jrens dreit sikj von Azmon nom Ägipten Bach, un äa Utgank es nom Mäa han.

⁶Un de Wastjrens; see es uk daut groote Mäa un daut Aunjrensende; daut saul junt de Wastjrens sennen.

⁷Un dit saul junt de Nuadjrens sennen; vom groote Mäa ut sell jie junt däm Boajch Hor moakjen;

⁸vom Boajch Hor sell jie de Jrens bat no Hamat trakjen, un de Utgank vonne Jrens es bie Zedad;

⁹un de Jrens jeit bat no Sifron, un äa Utgank es bie Hazar-Enan. Daut saul junt de Nuadjrens sennen.

¹⁰Un dee Oostjrens sell jie junt moakjen von Hazar-Enan no Schefam.

¹¹Un de Jrens jeit rauf von Schefam no Ribla, oostlich von Ajin; un de Jrens jeit rauf un jeit aune Sied vom Mäa Kinnereth [Genezareth] jäajen Oosten;

¹²un de Jrens jeit aum Jordan rauf, un äa Utgank es aum Soltmäa. Daut saul jun Launt no siene Jrensen runtom sennen.

¹³Un Moses befool de Kjinja Israel un säd: Daut es daut Launt, daut jie derch een Loss aus Oawgoot kjrieen sellen, daut de Har de 9 Stam un däm haulwen Staum to jäwen befoolen haft.

¹⁴Dan de Staum de Kjinja Ruben no äare Vodahiesa, un de Staum de Kjinja Gad no äare Vodahiesa, un de Halft vom Staum Manasse, dee ha äa Oawgoot jekjräajen.

¹⁵De 2 Stam un daut haulwe Staum ha äa Oawgoot jekjräajen aun dise sied vom Jordan, Jericho jäajenäwa, jäajen Oosten, jäajen Sonnenoppgank.

¹⁶Un de Har räd too Moses un säd:

¹⁷Dit sent de Nomes de Mana, dee junt daut Launt aus Oawgoot utdeelen sellen: Eleasar, de Priesta, un Josua, de Sän Nuns.

¹⁸Un emma een Ferscht vom Staum sell jie nämen, om daut Launt aus Oawgoot uttodeelen.

¹⁹Un dit sent de Nomes de Mana: Fa däm Staum Juda: Kaleb, de Sän von Jefunnes;

²⁰un fa däm Staum de Kjinja Simeon: Samuel, de Sän von Ammihud;

²¹fa däm Staum Benjamin: Elidad, de Sän von Kislon;

²²un fa däm Staum de Kjinja Dan een Ferscht: Bukki, de Sän von Jogli;

²³fa Josef siene Säns: Fa däm Staum de Kjinja Manasse een Ferscht: Hanniel, de Sän von Efod,

²⁴un fa däm Staum de Kjinja Efraim een Ferscht: Kemuel, de Sän von Schiftan;

²⁵un fa däm Staum de Kjinja Sebulon een Ferscht: Elizafan, de Sän von Parnak;

²⁶un fa däm Staum de Kjinja Isachar een Ferscht: Paltiel, de Sän von Assan;

²⁷un fa däm Staum de Kjinja Aser een Ferscht: Achihud, de Sän von Schelomit;

²⁸un fa däm Staum de Kjinja Naftali een Ferscht: Pedahel, de Sän von Ammihud.

²⁹Dit sent dee, dee de Har befool, de Kjinja Israel äa Oawgoot em Launt Kanaan uttodeelen.