Read De Bibel JHF 4. Mose 35 Bible Online

4. Mose 35 - De Bibel JHF bible

4. Mose 35

¹Un de Har räd too Moses enne Läacht Moab, aum Jordan, Jericho jäajenäwa, un säd:

²Befäl de Kjinja Israel, daut see von äarem Oawgoot de Leviten Städa toom Wonen jäwen; un to de Städa sell jie Weidlaunt om de Städa de Leviten jäwen.

³Un de Städa sellen an toom Wonen, un daut Weidlaunt fa äa Vee un fa äa Hab un Goot un fa aul äare Tieren sennen.

⁴Un daut Weidlaunt de Städa, dee jie de Leviten jäwen sellen, sellen vonne Stautmia no buten han 1 000 Ellen wiet runtom sennen.

⁵Un jie sellen butre Staut aune Oostsied 2000 Ellen aufmäten, un aune siedliche Sied 2 000 Ellen, un aun de Wastsied 2 000 Ellen un aune Nuadsied 2000 Ellen, daut de Staut enne Medd es; daut sellen äare Städa sennen.

⁶Un de Städa, dee jie de Leviten jäwen sellen; 6 Toofluchtsstäda sent daut, dee jie an jäwen sellen, doamet doahan rant, wäa eenen Doot veuasoakt haft; un to dise - doatoo sell jie 42 Städa jäwen.

⁷Aul de Städa, dee jie de Leviten jäwen sellen, aula toop, sellen daut 48 Städa sennen.

⁸Un waut de Städa betraft, dee jie von däm Ieejentum de Kjinja Israel jäwen sellen - von däm Staum, dee väl haft, sell jie väl nämen, un von däm, dee weinich haft, sell jie weinich nämen; jiedra Staum saul nom Verhältnis von sienem Oawgoot, daut hee oawen woat, von siene Städa de Leviten jäwen.

⁹Un de Har räd too Moses un säd:

¹⁰Räd to de Kjinja Israel un saj to an: Wan jie äwa däm Jordan en daut Launt Kanaan komen,

¹¹soo sell jie junt Städa utsäkjen: Toofluchtsstäda sellen see fa junt sennen, daut een Dootschlona doahan ranen kaun, dee eenen Mensch ut Veseenen omjebrocht haft.

¹²Un de Städa sellen junt aus Tooflucht ver de Rechta sennen, daut de Dootschlona nich stoaft, bat hee ver de Jemeent toom Jerecht jestonen haft.

¹³Un de Städa, dee jie jäwen sellen, sellen 6 Toofluchtsstäda fa junt sennen.

¹⁴3 Städa sell jie an aun dise Sied vom Jordan jäwen, un 3 Städa sell jie em Launt Kanaan jäwen; Toofluchtsstäda sellen see sennen.

¹⁵De Kjinja Israel un däm Framden un däm dee bie junt wont, en äare Medd sellen dise 6 Toofluchtsstäda sennen, daut een jiedra doahan rant, dee eenen Mensch ut Veseenen omjebrocht haft.

¹⁶Oba wan hee am met eenem iesanem Jereetschoft jeschloagen haft, daut hee jestorwen es, soo es hee een Merda; de Merda saul jewess omjebrocht woaren.

¹⁷Un wan hee am met eenem Steen, däm hee enne Haunt haud, wuaderch maun stoawen kaun, jeschloagen haft, daut hee jestorwen es, soo es hee een Merda; de Merda saul jewess omjebrocht woaren.

¹⁸Ooda wan hee am met eenem heltanem Jereetschoft, daut hee enne Haunt haud, wuaderch maun stoawen kaun, jeschloagen haft, daut hee jestorwen es, soo es hee een Merda; de Merda saul jewess omjebrocht woaren.

¹⁹De Blootrache eewenda, dee saul däm Merda ombrinjen; wan hee am auntraft, saul hee am ombrinjen.

²⁰Un wan hee am ut Hauss jeschupst ooda met wellens no am jeschmäten haft, daut hee jestorwen es,

²¹ooda schleit am ut Fientschoft met siene Haunt, daut hee jestorwen es, soo saul dee am jeschloagen haft omjebrocht woaren; hee es een Merda; de Blootrache eewenda saul däm Merda ombrinjen, wan hee am auntraft.

²²Oba wan hee tofalich, nich ut Fientschoft, am stat, ooda tofalich irjent een Jereetschoft no am jeschmäten haft,

²³ooda, wan hee irjent eenen Steen, doavon maun stoawen kaun, opp am schmitt, soo daut hee stoaft, un haft daut nich jeseenen un hee wia nich sien Fiend, un wull am uk nich Iebel doonen;

²⁴soo saul de Jemeent tweschen am un däm Schläajna un de Blootracha no dise Rajchte rechten;

²⁵un de Jemeent saul däm Dootschlona ute Haunt vom Blootracha raden, un de Jemeent saul am en siene Toofluchtsstaut trigjbrinjen, wuahan hee jerant es; un hee saul doa bliewen bat däm Huagapriesta sienem Doot, däm maun met däm heiljen Eelj jesaulft haud.

²⁶Oba wan de Dootschlona äwa de Jrens von siene Toofluchtsstaut, wuahan hee jerant es, rutjeit,

²⁷un de Blootracha finjt am butre Jrensen von siene Toofluchtsstaut, un de Blootracha brinjt däm Dootschlona om, soo haft hee kjeene Blootschult.

²⁸Dan hee saul en siene Toofluchtsstaut bliewen bat däm Huagapriesta sienem Doot; un nodäm Doot vom Huagapriesta doaf de Dootschlona en sien Ieejendoomslaunt trigjkomen.

²⁹Un dit saul junt eene Rajchtsazunk sennen bie june Jeschlajchta en aul june Wonstäden.

³⁰Jiedra, dee eenen Mensch ombrinjt; opp de utsaje von Zeijen saul maun däm Merda ombrinjen; oba een eensja Zeij kaun nich jäajen eenen Mensch utsaje, daut hee stoaft.

³¹Un jie sellen kjeen Leesjelt aunnämen fa eenem Merda siene Seel, dee schuldich es too stoawen, sonda hee saul jewess stoawen.

³²Jie sellen uk kjeen Leesjelt aunnämen fa däm, dee en siene Toofluchtsstaut jerant es, daut hee ver däm Priesta sienem Doot trigjjeit, om em Launt too wonen.

³³Un jie sellen daut Launt nich entheiljen, en däm jie sent; dan daut Bloot, daut entheilicht daut Launt; un fa daut Launt kaun kjeene Veseenunk, wäajen daut Bloot, jedonen woaren, daut doa vegoten wort, buta däm Bloot, dee daut vegoten haft.

³⁴Un du saust nich daut Launt veonreinjen, en däm jie wonen, en dee äare Medd ekj won; dan ekj, de Har, won enne Medd de Kjinja Israel.