Read De Bibel JHF 4. Mose 4 Bible Online

4. Mose 4 - De Bibel JHF bible

4. Mose 4

¹Un de Har räd too Moses un to Aaron un säd:

²Nämt de Zol de Säns Kehat ut de Medd de Säns Levi opp, no äare Famieljes, no äare Vodahiesa,

³von 30 Joa un doaräwa bat 50 Joa, aula, dee toom Kjrichsdeenst gonen, om daut Woakj aum Zelt de Bejäajnunk too verechten.

⁴Dit es de Deenst de Säns Kehat aum Zelt de Bejäajnunk; aum Aulaheilichsten.

⁵Un Aaron un siene Säns sellen biem Loaga reedmoaken toom wiedagonen nengonen un däm Väahank raufnämen un de Zeijnislod doamet bedakjen;

⁶un see sellen eene Dakj von Dacksfal doaräwa spreeden un een Duak, gaunz von blauen Purpur, bowen äwa spreeden un äare Stangen nenn stäakjen.

⁷Un äwa däm Desch de Aunsechtsbrood sellen see een Duak von blauen Purpur spreeden un doanopp de Kommen un de Wauschkommen un de Krucken un de Kaunen toom Drinkjopfa stalen; un daut bestendje Broot saul doabowen sennen;

⁸un doaräwa sellen see een Duak von Karmesin spreeden un daut met eene Dakj von Dacksfal bedakjen; un see sellen siene Stangen doanenn doonen.

⁹Un see sellen een Duak von blauen Purpur nämen un daut Laumpenhoola vom Licht bedakjen un siene Laumpen un siene Dachtschäare un siene Laschknoppes un aul siene Eeljjefässa, met waut maun däm Deenst aun am deit;

¹⁰un see sellen am un aul sien Jereetschoft en eene Dakj von Dacksfal doonen un opp däm Droagjestall lajen.

¹¹Un äwa däm goldnen Aultoa sellen see een Duak von blauen Purpur spreeden un am met eene Dakj von Dacksfal bedakjen un siene Stangen doanenn doonen.

¹²Un see sellen aulet Jereetschoft toom Deenst nämen, met waut maun däm Deenst em Heilichtum deit, un dee en een Duak von blauen Purpur lajen un dee met eene Dakj von Dacksfal bedakjen un opp däm Jestal lajen.

¹³Un see sellen däm Aultoa von de Fatausch reinjen un een Duak von roodem Purpur äwa am spreeden,

¹⁴un doanopp aulet Jereetschoft lajen, met waut maun däm Deenst opp am deit; de Kolepaun un de Gauflen un de Schefflen un de Spretzkommen, aulet Jereetschoft vom Aultoa; un see sellen eene Dakj von Dacksfal doaräwa spreeden un siene Stangen doanenn doonen.

¹⁵Un wan Aaron un siene Säns daut Loaga reedjemoakt ha toom wiedagonen, daut Heilichtum bedakjt ha un aulet Jereetschoft vom Heilichtum bedakjt ha, soo sellen de Säns Kehat komen, om daut to droagen, doamet see daut Heilichtum nich aunrieren un stoawen. Daut es et, waut de Säns Kehat vom Zelt de Bejäajnunk too droagen ha.

¹⁶Un Eleasar, Aaron sien Sän, de Priesta, haft de Oppsecht äwa daut Eelj toom Licht un daut scheenrikjende Rieekjastoff (Weiruak, seeta Ruak) un daut bestendje Speisopfa un daut Saulweelj, de Oppsecht äwa de gaunze Wonunk un aules, waut doabennen es, äwa daut Heilichtum aus äwa sien Jereetschoft.

¹⁷Un de Har räd too Moses un to Aaron un säd:

¹⁸Jie sellen däm Staum de Famielje de Kehatita nich utroden loten utte Medd de Leviten;

¹⁹sonda dit sell jie an doonen, doamet see läwen un nich stoawen, wan see däm Aulaheilichsten noda komen: Aaron un siene Säns sellen nengonen un an eenen jiedrem siene Oabeit un sienem Deenst un aun siene Droaglaust stalen;

²⁰oba see sellen nich nengonen, daut see uk blooss eenen Uagenblekj daut Heilichtum seenen un stoawen.

²¹Un de Har räd too Moses un säd:

²²Nemm uk de Somm de Säns Gerson opp, no äare Vodahiesa, no äare Famieljes;

²³von 30 Joa un doaräwa bat 50 Joa saust du an mostren, aula, dee aune Oabeit gonen, om däm Deenst aum Zelt de Bejäajnunk too verechten.

²⁴Dit es de Deenst de Famielje de Gersonita em Deenst un em Droagen:

²⁵See sellen de Teppiche vonne Wonunk droagen un daut Zelt de Bejäajnunk, siene Dakjen un de Dakjen von Dacksfal, dee bowen äwa sent, un däm Väahank vom Engank vom Zelt de Bejäajnunk,

²⁶un de Väahenjen vom Väahoff un de Väahenj vom Engank aum Doa vom Väahoff, dee runtom de Wonunk un om däm Aultoa es, un äare Strenj, un aulet Jereetschoft toom Deenst; un aules, waut aun an to doonen es, sellen see doonen.

²⁷Nom Befäl von Aaron un siene Säns saul aul äa Deenst, de Säns Gersonita sennen, betrafs aul äare Droaglaust un aul äarem Deenst; un jie sellen an aul dit befälen, waut see too droagen ha.

²⁸Daut es de Deenst de Famielje de Säns de Gersonita aum Zelt de Bejäajnunk; un äa Deenst es unja de Haunt [Oppsecht] Ithamar, Aaron sienem Sän, däm Priesta.

²⁹De Säns Merari no äare Famieljes, no äare Vodahiesa saust du an mostren;

³⁰von 30 Joa un doaräwa bat 50 Joa saust du an mostren, aula, dee aune Oabeit gonen, om däm Deenst aum Zelt de Bejäajnunk to doonen.

³¹Un dit es et, waut an too droagen oppjelajcht woat, no äarem gaunzen Deenst aum Zelt de Bejäajnunk: De Bräda de Wonunk un äare Rijel un äare Stendasch un äare Feet,

³²un de Stendasch vom Väahoff runtom un äare Feet un äare Näajel un äare Strenj, no aul äa Jereetschoft un no aul äarem Deenst; un met Nomen sell jie an daut Jereetschoft enndeelen, daut see too droagen ha.

³³Daut es de Deenst de Famielje de Säns Merari, no aul äarem Deenst aum Zelt de Bejäajnunk, unja de Haunt Ithamar, Aaron sienem Sän, däm Priesta.

³⁴Un Moses un Aaron un de Ferschten de Jemeent mostade de Säns de Kehatita no äare Famieljes un no äare Vodahiesa,

³⁵von 30 Joa un doaräwa bat 50 Joa, aula, dee enne Oabeit jinjen toom Deenst aum Zelt de Bejäajnunk.

³⁶Un daut wieren äare Jemostade, no äare Famieljes, 2 750.

³⁷Daut sent de Jemostade de Famieljes de Kehatita, aula, dee aum Zelt de Bejäajnunk deenden, dee Moses un Aaron mostade nom Befäl Gottes derch Moses.

³⁸Un de Jemostade de Säns Gerson, no äare Famieljes un no äare Vodahiesa,

³⁹von 30 Joa un doaräwa bat 50 Joa, aula, dee aune Oabeit jinjen toom Deenst aum Zelt de Bejäajnunk:

⁴⁰Daut wieren äare Jemostade, no äare Famieljes, no äare Vodahiesa, 2 630.

⁴¹Daut sent de Jemostade de Famieljes de Säns Gerson, aula, dee aum Zelt de Bejäajnunk deenden, dee Moses un Aaron mostade nom Befäl Gottes.

⁴²Un de Jemostade de Famieljes de Säns Merari, no äare Famieljes, no äare Vodahiesa,

⁴³von 30 Joa un doaräwa bat 50 Joa, aula, dee aune Oabeit jinjen nom Deenst aum Zelt de Bejäajnunk:

⁴⁴Daut wieren äare Jemostade, no äare Famieljes, 3 200.

⁴⁵Daut sent de Jemostade de Famieljes de Säns Merari, dee Moses un Aaron mostade nom Befäl Gottes derch Moses.

⁴⁶Aule Jemostade, dee Moses un Aaron un de Ferschten Israels mostade, de Leviten no äare Famieljes un no äare Vodahiesa,

⁴⁷von 30 Joa un doaräwa bat 50 Joa, aula, dee doatoo kjeemen, om däm Deenst de Bedeeninj un de Droaglaust aum Zelt de Bejäajnunk to doonen:

⁴⁸Äare Jemostade wieren 8 580.

⁴⁹Nom Befäl Gottes mostad maun an derch Moses, jiedren eensjen too sienem Deenst un no siene Droaglaust; un see worden von am jemostat, aus de Har Moses befoolen haud.