Read De Bibel JHF 4. Mose 5 Bible Online

4. Mose 5 - De Bibel JHF bible

4. Mose 5

¹Un de Har räd too Moses un säd:

²Befäl de Kjinja Israel, daut see aule Utsauzje un aule Utflussje un aule dee wäajen eenen Doodjen Veonreinichten ut däm Loaga rutdoonen;

³soo aus Maun aus uk Fru sell jie rutdoonen, ver däm Loaga sell jie dee rutdoonen, doamet see nich äa Loaga veonreinjen, en dee äare Medd ekj won.

⁴Un de Kjinja Israel deeden soo un deeden an ver däm Loaga rut; soo aus de Har too Moses jesajcht haud, aulsoo deeden de Kjinja Israel.

⁵Un de Har räd too Moses un säd:

⁶Räd to de Kjinja Israel: Wan een Maun ooda eene Fru irjent eene menschliche Sind deit, un sikj doamet jäajen Gott vejeit, soo haft dee Seel eene Schult opp sikj jeloden,

⁷soo saul see äare Sind bekjanen, dee see jedonen haft; un see saul äare volle Schult betolen un saul 1/5-tet Deel doavon doatodoonen un daut däm jäwen, aun däm hee sikj veschuldicht haft.

⁸Un wan de Maun kjeen Blootfrindschauft haft, om disem de Schult too betolen, soo saul de Schult, dee däm Harn betolt woat, däm Priesta jehieren buta däm Bock de Veseenunk, met waut maun Veseenunk fa am deit.

⁹Un jiedret Häwopfa von aule heilje Dinj de Kjinja Israel, dee see däm Priesta brinjen, saul am jehieren.

¹⁰Jo, am sellen von eenem jiedren heilje Dinj jehieren; wäa däm Priesta waut jeft, saul am jehieren.

¹¹Un de Har räd too Moses un säd:

¹²Räd to de Kjinja Israel un saj to an: Wan irjent eenem siene Fru sikj vejeit un Ontru jäajen am woat,

¹³un een Maun licht bie ar, om ar Schwanga too moaken, un daut es ver äarem Maun siene Uagen veheimlicht, un see haft sikj em jeheimen veonreinicht, un daut es kjeen Zeij jäajen ar, un see es nich doabie jejräpen worden;

¹⁴un de Jeist de Aufgonst kjemt äwa am, un hee woat iewasichtich opp siene Fru, un see haft sikj veonreinicht; ooda de Jeist de Aufgonst kjemt äwa am, un hee woat iewasichtich opp siene Fru, un see haft sikj nich veonreinicht:

¹⁵Soo saul de Maun siene Fru nom Priesta brinjen un äare Opfagow äat haulwen brinjen, 1/10-det Deel Efa Joaschtmäl; hee saul kjeen Eelj doanopp jeeten un kjeen Weiruak doanopp lajen; dan daut es een Iewaopfa un een Jedenkjopfa, daut Ojjerajchtichkjeit em Jedajchnis brinjt.

¹⁶Un de Priesta saul ar noda komen loten un ar ver Gott stalen.

¹⁷Un de Priesta saul heiljet Wota en eenem ieednem Jefäss nämen; un de Priesta nemt von däm Stoff, dee oppe Flua de Wonunk es, un doo daut em Wota.

¹⁸Un de Priesta stal de Fru ver Gott un dakjt däm Kopp vonne Fru op, un lajt opp äare Henj daut Jedenkjopfa; daut es een Speisopfa de Aufgonst; un daut fluchbrinjende Wota de Bettanis saul enne Haunt vom Priesta sennen.

¹⁹Un de Priesta saul de Fru beschwieren un to de Fru sajen: Wan kjeen Maun bie die jeläajen haft, un wan du, unja dienem Maun best, un nich en Orreinheit ontru jewast best, soo bliew onen Schoden von disem fluchbrinjendem Wota de Bettanis;

²⁰oba wan du, dienem Maun ontru jewast best un die veonreinicht hast, un een Maun bie die jeschlopen haft buta dienem Maun, -

²¹soo saul de Priesta de Fru beschwieren met däm Fluchschwua, un de Priesta saul to de Fru sajen: Soo moakt de Har die toom Fluch un toom Schwua en dienem Volkj siene Medd, endäm de Har diene Hoften ennfaule un dien Buck jeschwolle moakt,

²²un dit fluchbrinjende Wota kjemt en dienem Ennalichen, om daut de Buck aunschwallt un de Hoften ennjefollen moakt! Un de Fru saul sajen: Amen, Amen!

²³Un de Priesta saul disem Fluch en een Buak schriewen un dee en daut Wota de Bettanis utlaschen;

²⁴un hee saul de Fru daut fluchbrinjende Wota de Bettanis drinkjen loten, doamet daut fluchbrinjende Wota en ar too Bettanis kjemt.

²⁵Un de Priesta saul ut de Haunt vonne Fru daut Iewaopfa nämen un daut Speisopfa ver däm Harn häwen un daut nom Aultoa brinjen;

²⁶un de Priesta saul eene Hauntvoll von däm Speisopfa nämen, toom Jedajchnis, un rieekja daut opp däm Aultoa; un nodäm saul hee de Fru vom Wota drinkjen loten.

²⁷Un haft hee ar daut Wota drinkjen loten, soo woat daut passieren, wan see onrein jeworden es un jäajen äarem Maun Ontru jewast, daut et fluchbrinjende Wota en ar enndrinjt un betta woat, un äa Buck woat aunschwalle un äare Hoften toopfaule; un de Fru woat toom Fluch enne Medd von äarem Volkj woaren.

²⁸Oba wan de Fru sikj nich veonreinicht haft un rein es, soo woat see kjeen Schoden doavon droagen un Somen emfangen.

²⁹Daut es daut Jesaz de Aufgonst: Wan eene Fru, äarem Maun ontru es un sikj veonreinicht,

³⁰ooda wan äwa eenem Maun de Jeist de Aufgonst kjemt, un hee woat iewasichtich opp siene Fru, soo saul hee de Fru ver däm Harn stalen, un de Priesta saul ar no disem gaunzen Jesaz doonen.

³¹Un de Maun woat frie von Schult sennen; oba de Fru saul äare Misdot droagen.