Read De Bibel JHF 4. Mose 6 Bible Online

4. Mose 6 - De Bibel JHF bible

4. Mose 6

¹Un de Har räd too Moses un säd:

²Räd to de Kjinja Israel un saj to an: Wan een Maun ooda eene Fru een besondret Vespräakjen aus Aufjesondada (Jeweida, Nazara) deit, om sikj fa däm Harn too weien (heilje),

³soo saul hee sikj vom Wien un stoakjet Jedrenkj enthoolen; Ädikj von Wien un Ädikj von stoakjet Jedrenkj saul hee nich drinkjen; un kjeen Druwesauft, fresche ooda jedräjde, saul hee nich äten.

⁴Aule Doag siene Aufsonderung saul hee von aulem, waut de Wienstock brinjt, vonne Kjeena bat de Schal, nich äten.

⁵Aule Doag von däm Vespräakjen, siene Aufsonderung, saul kjeen Schäamassa äwa sien Haupt gonen; bat de Doag erfelt sent, dee hee sikj fa däm Harn aufsondat, saul hee heilich sennen; hee saul daut Hoa opp sienem Haupt frie waussen loten.

⁶Aul de Doag, dee hee sikj fa däm Harn aufsondat, saul hee no kjeenem Doodjen komen.

⁷Wäajen sienem Voda un siene Mutta, wäajen sienem Brooda un siene Sesta, äatshaulwen saul hee sikj nich veonreinjen, wan see stoawen; dan de Aufsonderung fa sienem Gott es opp sienem Haupt.

⁸Aul de Doag siene Aufsonderung es hee däm Harn heilich.

⁹Un wan wäa onverhoffs, plazlich, bie am stoaft, un hee daut Haupt siene Aufsonderung veonreinicht, soo saul hee sien Haupt aum Dach siene Reinjunk schäaren; aum säwenden Dach saul hee daut schäaren.

¹⁰Un aum achten Dach saul hee twee Turtelduwen ooda twee junge Duwen nom Priesta brinjen nom Engank vom Zelt de Bejäajnunk.

¹¹Un de Priesta saul eene toom Sindopfa un eene toom Brauntopfa opfren, un Veseenunk fa am doawäajen doonen, daut hee sikj aun däm Doodjen vesindicht haft; un hee saul sien Haupt aun däm seljen Dach heilje.

¹²Un hee saul de Doag siene Aufsonderung nochmol fa däm Harn aufsondren un een eenjoaschet Laum toom Schultopfa brinjen; oba de Doag, verhäa, sent vefolle, dan siene Weie es veonreinicht worden.

¹³Un dit es daut Nazara Jesaz: Aun däm Dach, aun däm de Doag siene Aufsonderung erfelt sent, saul maun am aum Engank vom Zelt de Bejäajnunk brinjen.

¹⁴Un hee saul däm Harn siene Opfagow brinjen; een eenjoaschet Laum onen Fäla toom Brauntopfa, un een eenjoaschet Muttalaum onen Fäla toom Sindopfa; un eenen Bock onen Fäla toom Dankopfa,

¹⁵un eenen Korf met Onjesuadem; eene Kuak von fienem Mäl, jemischt met Eelj, un onjesuade Flade, jesaulft met Eelj; met äarem Speisopfa un äarem Drinkjopfa.

¹⁶Un de Priesta saul dee ver däm Harn brinjen un sien Sindopfa un sien Brauntopfa opfren.

¹⁷Un een Bock saul hee aus Dankopfa däm Harn opfren met däm Korf, däm Onjesuaden; un de Priesta saul sien Speisopfa un sien Drinkjopfa opfren.

¹⁸Un de Nazara saul aum Engank vom Zelt de Bejäajnunk daut jeweide Haupt schäaren un daut Hoa von sienem jeweidem Haupt nämen un daut oppem Fia lajen, daut unjrem Dankopfa es.

¹⁹Un de Priesta saul de jekoakte Schulla vom Bock un eene onjesuade Kuak un eene onjesuade Flade ut däm Korf nämen un lajcht daut oppem Nazara siene Haunt, nodäm hee sien jeweidet Haupt jeschoaren haft.

²⁰Un de Priesta häw daut aus Häwopfa ver däm Harn; daut es däm Priesta heilich met de Brost vom Wäwopfa un met däm Schinkje vom Häwopfa. Un doano kaun de Nazara Wien drinkjen.

²¹Daut es daut Jesaz de Nazara, dee een Vespräakjen deit, un daut siene Opfagow däm Harn fa sien Vespräakjen, buta däm, waut siene Haunt brinjen kaun. No sienem Vespräakjen, daut hee jedonen haft, aulsoo saul hee doonen nom Jesaz, sienem Vespräakjen.

²²Un de Har räd too Moses un säd:

²³Räd too Aaron un to siene Säns un saj: Soo sell jie de Kjinja Israel säajnen; sajcht to an:

²⁴De Har säajent junt un bewoat die!

²⁵De Har lat sien Aunjesecht äwa die schienen un es die jnädich!

²⁶De Har häft sien Aunjesecht äwa die un jeft die Fräd!

²⁷Un soo sellen see mienen Nomen opp de Kjinja Israel lajen, un ekj woa an säajnen.