Read De Bibel JHF 4. Mose 8 Bible Online

4. Mose 8 - De Bibel JHF bible

4. Mose 8

¹Un de Har räd too Moses un säd:

²Räd too Aaron un saj to am: Wan du de Laumpen aunstekjst, soo sellen de 7 Laumpen jlikjwajch ver däm Laumpenhoola dachen.

³Un Aaron deed soo: Hee stekjt äare Laumpen aun, soo daut see jlikjwajch ver däm Laumpenhoola dachten, soo aus de Har Moses befoolen haud.

⁴De Laumpenhoola wia een Woakj von Golt en Hauntoabeit; von sienem Foot bat siene Bloomen, aules wia Hauntoabeit; nom Bilt, daut de Har Moses jewäsen haud, aulsoo muak hee daut Laumpenhoola.

⁵Un de Har räd too Moses un säd:

⁶Nemm de Leviten ut de Medd de Kjinja Israel un reinj an.

⁷Un aulsoo saust du met an doonen, om an too reinjen: Sprets Entsindjungswota opp an, un see sellen daut Schäamassa äwa äa gaunzet Fleesch gonen loten un äare Kjleeda wauschen un sikj reinjen.

⁸Un see sellen eenen jungen Boll nämen, met sienem Speisopfa; fienet Mäl, jemischt met Eelj; un eenen aundren jungen Boll saust du toom Sindopfa nämen.

⁹Un du saust de Leviten ver däm Zelt de Bejäajnunk komen loten un de gaunze Jemeent de Kjinja Israel vesaumlen.

¹⁰Un du saust de Leviten ver däm Harn komen loten, un de Kjinja Israel sellen äare Henj oppe Leviten lajen.

¹¹Un Aaron saul de Leviten aus Wäwopfa vonne Kjinja Israel ver däm Harn schwinjen* (opphäwen), om däm Deenst Gottes to doonen.

¹²Un de Leviten sellen äare Henj opp däm Kopp de Bolles lajen; un däm eenen saust du aus Sindopfa un däm aundren aus Brauntopfa däm Harn opfren, om fa de Leviten Veseenunk to doonen.

¹³Un soo saust du de Leviten ver Aaron un ver siene Säns stalen un an däm Harn aus Wäwopfa schwinjen*;

¹⁴un du saust de Leviten ut de Medd de Kjinja Israel aufsondren, daut de Leviten jehieren mie.

¹⁵Un nodäm sellen de Leviten komen, om daut Zelt de Bejäajnunk too bedeenen. Soo saust du an reinjen un an aus Wäwopfa schwinjen*.

¹⁶Dan see sent mie gaunz aus Ieejentum jejäft, ut de Medd de Kjinja Israel; enne Städ aules, waut de Muttaschoot derchbrakjt, - jiedrem Ieeschtjebuarnen von de Kjinja Israel ha ekj an fa mie jenomen.

¹⁷Dan miene sent aule Ieeschtjebuarne unja de Kjinja Israel aun Menschen un Vee. Aun däm Dach, doa ekj aule Ieeschtjeburt em Ägiptenlaunt schluach, ha ekj an fa mie jeheilicht.

¹⁸Un ekj ha de Leviten jenomen aune Städ aule Ieeschtjeburt unja de Kjinja Israel;

¹⁹un ekj ha de Leviten däm Aaron un siene Säns aus eene Gow ut de Medd de Kjinja Israel jejäft, om däm Deenst de Kjinja Israel aum Zelt de Bejäajnunk to doonen un fa de Kjinja Israel Veseenunk to doonen, doamet unjre Kjinja Israel kjeene Ploag doaderch entsteit, daut de Kjinja Israel däm Heilichtum noda komen.

²⁰Un Moses un Aaron un de gaunze Jemeent de Kjinja Israel deeden soo met de Leviten; no aulem, waut de Har däm Moses befoolen haud wäajen de Leviten, aulsoo deeden de Kjinja Israel met an.

²¹Un de Leviten heilijde sikj un woschen äare Kjleeda; un Aaron schwinjd an aus Wäwopfa ver däm Harn; un Aaron deed Veseenunk fa an too äare Reinjunk.

²²Un nodäm kaumen de Leviten, om äaren Deenst aum Zelt de Bejäajnunk to doonen ver Aaron un ver siene Säns. Soo aus de Har däm Moses betrafs de Leviten befoolen haud, aulsoo deeden see met an.

²³Un de Har räd too Moses un säd:

²⁴Daut es et, waut de Leviten betraft: Von 25 Joa aun un doaräwa saul hee doatokomen, om de Oabeit em Deenst aum Zelt de Bejäajnunk to doonen.

²⁵Oba von 50 Joa aun saul hee ut de Oabeit em Deenst trigjgonen un nich mea deenen;

²⁶hee mucht siene Breeda aum Zelt de Bejäajnunk halpen, wan see äarem Deenst doonen; oba Deenst saul hee nich mea doonen. Soo saust du met de Leviten en äare Oppgowe doonen.