Read De Bibel JHF 4. Mose 9 Bible Online

4. Mose 9 - De Bibel JHF bible

4. Mose 9

¹Un de Har räd too Moses enne Wieste Sinai, aum tweeden Joa no äarem Utgank ut däm Ägiptenlaunt, aum ieeschten Moonat, un säd:

²De Kjinja Israel sellen daut Passa to siene Tiet hoolen;

³aum 14-den Dach aun disem Moonat, tweschen dee beid Owents, sell jie daut too siene Tiet fieren; no aule siene Sazungen un no aul siene Väaschreften sell jie daut fieren.

⁴Un Moses räd to de Kjinja Israel, daut see daut Passa fieren sullen.

⁵Un see sellen daut Passa em ieeschten Moonat, aum 14-den Dach em Moonat, tweschen dee beid Owents hoolen, enne Wieste Sinai; no aulem, waut de Har däm Moses befoolen haud, soo deeden de Kjinja Israel.

⁶Un daut wieren Mana doa, dee onrein wieren wäajen eenen doodjen Mensch un aun janem Passa Dach nich fieren kunnen; un see kjeemen aun däm Dach ver Moses un ver Aaron.

⁷Un dise Mana säden to am: Wie sent onrein wäajen eenen doodjen Mensch; wuarom sell wie tookort komen, daut wie de Opfagow Gottes nich to siene Tiet enne Medd de Kjinja Israel brinjen däawen?

⁸Un Moses säd to an: Blieft stonen, un ekj well hieren, waut de Har junt befält.

⁹Un de Har räd too Moses un säd:

¹⁰Räd to de Kjinja Israel un saj: Wan irjent wäa von junt ooda von junem Jeschlajcht onrein es wäajen eenen Dooden ooda es opp eenem wiedem Wajch, soo saul hee däm Harn Passa fieren;

¹¹em tweeden Moonat, aum 14-den Dach, tweschen dee beid Owents, sellen see daut hoolen; met Onjesuadem un bettrem Krut sellen see daut äten;

¹²see sellen nuscht doavon bat Zemorjes äwaloten, un sellen kjeen Been aun am vebräakjen; no aule Sazungen sellen see daut Passa hoolen.

¹³Oba dee Maun, dee rein un nich oppem Wajch es, un daut nich deit, daut Passa too hoolen, dee Seel saul ut äarem Volkj utjerot woaren; dan hee haft de Opfagow Gottes nich to siene Tiet jebrocht; dee Maun saul siene Sind droagen.

¹⁴Un wan een Framda bie junt es un däm Harn Passa hoolen well, soo saul hee daut no de Passa Sazunk hoolen un no siene Väaschreft. Eene Sazunk saul fa junt sennen, soo aus fa däm Framden aus uk fa däm Laundes Eenjebuarnen.

¹⁵Un aun däm Dach, doa de Wonunk oppjerecht wort, bedakjt de Wolkj de Wonunk vom Zelt de Bejäajnunk; un Oppenowent wia dee äwa de Wonunk aus daut Aunseenen von eenem Fia bat Zemorjes.

¹⁶Soo wia daut emma: De Wolkj bedakjt ar, un de Nacht aus daut Aunseenen von eenem Fia.

¹⁷Un soo aus de Wolkj sikj vom Zelt opphoof, jinjen de Kjinja Israel auf; un aun däm Uat, woa de Wolkj sikj raufleet, doa loagaden de Kjinja Israel.

¹⁸Nom Befäl Gottes jinjen de Kjinja Israel loos, un nom Befäl Gottes loagaden see sikj; aul de Doag, doa de Wolkj oppe Wonunk rud, loagaden see.

¹⁹Un wan de Wolkj väl Doag oppe Wonunk bleef, soo luaden de Kjinja Israel de Aunwiesunk Gottes un jinjen nich loos.

²⁰Un passieed daut, daut de Wolkj atelje Doag oppe Wonunk wia, nom Befäl Gottes loagaden see sikj - un nom Befäl Gottes jinjen see loos.

²¹Un passieed daut, daut de Wolkj von Oppenowent bat Zemorjes doa wia, un de Wolkj hoof sikj Zemorjes opp, soo jinjen see loos; ooda eenen Dach un eene Nacht, un de Wolkj hoof sikj, soo jinjen see loos;

²²ooda twee Doag ooda eenen Moonat ooda eene gaunze Tiet - wan de Wolkj oppe Wonunk bleef, endäm see doabowen rud, soo loagaden de Kjinja Israel un jinjen nich wieda; un wan see sikj opphoof, soo jinjen see loos.

²³Nom Befäl Gottes jinjen see wieda; see luaden no de Aunwiesunk Gottes nom Befäl Gottes derch Moses.