Read De Bibel JHF Micha 1 Bible Online

Micha 1 - De Bibel JHF bible

Micha 1

¹Daut Wuat Gottes, daut aun Micha, von Moreschet wia en de Doag Jotams, Ahas un Hiskia, de Kjennichs von Juda, dee hee äwa Samara un Jerusalem sach.

²Hieet, jie aule Velkja, moakjt opp, du Ieed un aules waut doabennen es! Un de Har, Gott, es toom Zeichnis jäajen junt, de Har ut sienem heiljen Tempel!

³Dan kjikj, de Har jeit von siene Städ ut un kjemt rauf un jeit omhäa opp de Hechste Städen de Ieed.

⁴Un de Boaj veschmelten unja am, un de Läachten spoole sikj aus Waus vom Fia, aus Wota, utjegoten aum steilen Boajch.

⁵Daut aules wäajen Jakob siene Äwaträdunk un wäajen de Sinden vom Hus Israel. Von wäm jeit Jakob siene Äwaträdunk ut? Es daut nich Samara? Un von wäm de Hechten von Juda? Es daut nich Jerusalem?

⁶Soo woa ekj Samara to eenem Steenhupen oppem Flekj, toom Wiengoaden Plaunten moaken, un ekj woa äare Steena enne Läacht raufschmieten un äare Gruntmia opdakjen.

⁷Un aul äare jegotne Bilda woaren veschloagen un aul äa Huarenloon met Fia vebrent woaren, un ekj woa aul äare Jetzenbilda too eene Wieste moaken; dan see haft dee derch Huarenloon jesaumelt, un toom Huarenloon sellen see wada woaren.

⁸Doarom well ekj kloagen un hielen, well jeplindat un noaktich omhäa gonen; ekj well kloagen aus de Schakale, un truaren aus de Strauss.

⁹Dan äare Schläaj sent onheelboa; dan daut kjemt bat Juda, daut rieekjt bat aun däm Dooa von mienem Volkj, bat aun Jerusalem.

¹⁰Vekjindicht daut nich en Gat, hielt nich! En Bat-Leafra säl ekj mie em Stoff.

¹¹Go vebie, Bewonarin von Schafir, en noaktje Schaund; de Bewonarin von Zaanan es nich utjetrocken; de Weekloag woat nich bie Bat-Ezel stonen bliewen.

¹²Dan de Bewona von Marot zetren wäajen äa Goot; dan von däm Harn es daut Onjlekj toom Dooa äwa Jerusalem raufjekomen.

¹³Spaun de Pieed em Woagen aun, du Bewona von Lachisch! Daut wia de Aunfank de Sind fa de Dochta Zion; dan en die sent de Äwaträdungen von Israel jefungen worden.

¹⁴Doarom woascht du opp Moreschet-Gat vezichte motten. De Hiesa von Achsib woaren to eenem faulschen Stroom fa de Kjennichs von Israel.

¹⁵Ekj woa die nich de Ieejendeema brinjen, Bewona von Marescha. Bat Adullam woat de Harlichkjeit von Israel komen.

¹⁶Moak die kol un schäa die om diene zoate Kjinja äa wellen, moak dienen Kopp kol aus een Odla; dan see sent von die wajchjefieet.