Read De Bibel JHF Micha 3 Bible Online

Micha 3 - De Bibel JHF bible

Micha 3

¹Un ekj säd: Hieet doch, jie Heipta von Jakob un jie Ferschten vom Hus Israel: Es daut nich aun junt, daut Rajcht too kjanen?

²Dee jie daut Goode haussen un daut Beese leewen; dee jie an de Hut auftrakjen un daut Fleesch von äare Knoakes;

³un dee jie daut Fleesch von mienem Volkj fräten, un äare Hut von an auftrakjen, un äare Knoakes vebräakjen un en Stekja veschnieden aus en eenem Topp un aus Fleesch medden em Koaktopp.

⁴Dan woaren see to däm Harn schrieen, un hee woat an nich auntwuaden; un hee woat sien Aunjesecht too jane Tiet ver an vestäakjen, soo aus see äare Haundlungen bees jemoakt ha.

⁵Soo sajcht de Har äwa de Profeeten, dee mien Volkj erren fieren, dee met äare Tänen bieten, un doabie Fräd utroopen; un wäa an nuscht em Mul jeft, jäajen däm Heiljen fieren see eenen Kjrich {Jer.6,4}.

⁶Doarom saul daut fa junt Nacht woaren, onen Profezeiunk, un Diestanis woaren, onen Woasajen; un de Sonn woat äwa de Profeeten unjagonen, un de Dach äwa an schwoat woaren.

⁷Un de seenende woaren beschämt un de Woasaja too Schaund woaren, un see woaren aula toop däm Boat vestoppen, wiels kjeene Auntwuat Gottes doa es.

⁸Ekj doajäajen, ekj sie met Krauft erfelt derch däm Jeist Gottes, un met Rajcht un Moot, om Jakob siene Äwaträdunk un Israel siene Sinden weeten to loten.

⁹Hieet doch dit, jie Heipta vom Hus Jakob un jie Ferschten vom Hus Israel, dee jie daut Rajcht veschmieten un aules waut jlikj es kromm moaken;

¹⁰dee jie Zion met Bloot buen un Jerusalem met Orrajcht.

¹¹Siene Heipta rechten fa Jeschenkja, un siene Priesta lieren fa Loon, un siene Profeeten woasajen fa Jelt; un see stette sikj oppem Harn un sajen: Es nich de Har en onse Medd? Kjeen Onjlekj woat äwa ons komen!

¹²Doarom woat wäajen junt Zion aus Aka jeplieecht woaren, un Jerusalem woat toom Steenhupen un de Tempelboajch - to eenem met Woolt bewosnen Boajch {Jer.26,18}.