Read De Bibel JHF Micha 4 Bible Online

Micha 4 - De Bibel JHF bible

Micha 4

¹Un daut woat passieren aum Enj de Doag, doa woat de Boajch vom Hus Gottes fauststonen oppe Spetz de Boaj un erhowen sennen äwa de Aunboaj. Un Velkja woaren no am streemen;

²un väl Nazionen woaren hangonen un sajen: Komt lot ons nopp gonen nom Boajch Gottes un nom Hus von Jakob sienem Gott! Un hee woat ons äwa siene Wäaj belieren, un wie wellen waundlen opp siene Stiej. Dan von Zion woat daut Jesaz utgonen, un daut Wuat Gottes von Jerusalem;

³un hee woat tweschen väl Velkja rechten un Rajcht spräakjen majchtje Nazionen von wiet häa. Un see woaren äare Schwieeta to Pluachschoa schmäden, un äare Spiessen too Säakjel; un kjeen Volkj woat jäajen Volkj daut Schwieet opphäwen, un see woaren nich mea kjriejen lieren {Jes.2,2-4}.

⁴Un see woaren setten, een jiedra unja sienem Wienstock un unja sienem Fiejenboom, un kjeena woat an oppschrakjen. Dan daut Mul Gottes de Häaschoa haft jerät.

⁵Dan aule Velkja woaren waundlen, een jiedret em Nomen von sienem Gott; oba wie woaren waundlen em Nomen Gottes, onsem Gott, emma un eewich.

⁶Aun janem Dach, sajcht de Har, woa ekj daut Lome saumlen un daut Vestade toopbrinjen, un däm ekj Ieblet jedonen ha.

⁷Un ekj woa daut Lome to eenem Äwajebläwnen un daut wietwajch wia to eenem jewaultjen Volkj moaken; un de Har woat Kjennich äwa an sennen opp däm Boajch Zion, von nu bat enne Eewichkjeit.

⁸Un du Torm vonne Häad, du Aunboaj de Dochta Zion, die woat errieekjen un no die woat komen de frieejoasche Harschoft, daut Kjennichtum de Dajchta Jerusalem.

⁹Nu, wuarom erhäfst du een Jeschrecht? Es kjeen Kjennich bie die? Ooda es dien Rotjäwa omjekomen, daut die Weedoag jepakt ha aus eene Jebäarende?

¹⁰Zetta un stän Dochta Zion, aus eene Jebäarende! Dan nu woascht du ut de Staut rutgonen un opp däm Flekj wonen un bat no Babel komen. - Doaselfst woascht du jerat woaren, doaselfst woat de Har die ut de Haunt von diene Fiend erleesen.

¹¹Un nu ha sikj väl Velkja jäajen die vesaumelt, dee doa sajen: See sellen entweit woaren, un onse Uagen muchten aun Zion äare Lost seenen!

¹²Oba see kjanen de Jedanken Gottes nich un vestonen sienen Rotschluss nich; dan hee haft dee jesaumelt, aus maun Goawen oppe Draschdäl saumelt.

¹³Moak die opp un drasch, Dochta Zion! Dan ekj well dienen Huarn to Iesa un diene Heefta to Koppa moaken, un du woascht väl Velkja vemolen; un ekj woa äa Raup däm Harn weien {3Mo.27,21}, un äa Vemäajen däm Harn de gaunze Ieed.

¹⁴Nu drenj die toop, Dochta de Bedrenkjnis: Maun haft eene Beloagrunk jäajen ons jerecht; met däm Stock schlonen see däm Rechta Israels oppe Baken.