Read De Bibel JHF Micha 6 Bible Online

Micha 6 - De Bibel JHF bible

Micha 6

¹Hieet doch, waut de Har sajcht: Moak die opp, recht ver de Boaj un lot de Aunboaj diene Stemm hieren!

²Hieet, jie Boaj, däm Rajchtstriet Gottes, un jie Onvewaundelboare, jie Gruntloag de Ieed! Dan de Har haft eenen Rajchtstriet met sienem Volkj, un met Israel woat hee rechten. -

³«Mien Volkj, waut ha ekj die jedonen, un met waut ha ekj die meed jemoakt? Laj Zeichnis jäajen mie auf!

⁴Dan ekj ha die ut däm Launt Ägipten rutjefieet un ut däm Deensthus die erleest; un ekj ha Moses, Aaron un Mirjam ver die häa jeschekjt.

⁵Mien Volkj, bedenkj doch, waut Balak, de Kjennich von Moab, väahaud, un waut Bieleam, de Sän Beors, am jeauntwuat haft, däm, waut von Sittim bat Gilgal passieet es; om daut du de jerajchte Doten Gottes erkjanst».

⁶«Met waut saul ekj ver däm Harn komen, mie bieejen ver däm huagen Gott? Saul ekj ver am komen met Brauntopfa, met eenjoasche Kjalwa?

⁷Woat de Har Wooljefaulen haben aun 1 000 von Bakj, aun 10 000 Streem von Eelj? Saul ekj mienem Ieeschtjebuarnen jäwen fa miene Äwaträdunk, de Frucht von mienem Lief fa de Sind miene Seel?»

⁸Hee haft die jesajcht, oo Mensch, waut goot es; un waut foddat de Har von die, aus Rajcht un Leew too eewen, un deemootich too waundlen met dienem Gott?

⁹De Stemm Gottes roopt de Staut, un dien Nomen haft Weisheit em Uag: Hieet [jie Stam, waut jeprädicht woat] opp de Zichtijung un opp däm, dee äa bestalt!

¹⁰Sent em Hus de Gottloose noch Habungoot de Jesazloosichkjeit un daut knaupe, vefluchte Efa?

¹¹«Sull ekj rein sennen bie de Wichtschol de Jesazloosichkjeit un bie eenem Biedel met faulsche Jewichtssteena?»

¹²Äare Rikje sent voll Orrajcht, un äare Bewona räden Läajes, un äare Tung es Droch en äarem Mul!

¹³Soo well uk ekj die onheelboa schlonen, die vewuste om diene Sinden wellen.

¹⁴Du woascht äten, oba nich saut woaren; un dien Ennaliche woat ladich bliewen. Un du woascht wajchschaufen un nich raden; un waut du radst, woa ekj daut Schwieet hanjäwen.

¹⁵Du woascht seien, oba nich arnten; du woascht Eelj prasse, oba die nich met Eelj saulwen, un jungem Wien, oba kjeen Wien drinkjen.

¹⁶Un maun beoobacht iewrich de Sazungen Omris un aulet Doonen vom Hus Ahab, un jie waundlen en äare Rotschläaj, doamet ekj die toom Entsatze moak un äare Bewona toom Spott; un jie woaren de Schmach von mienem Volkj droagen.