Read De Bibel JHF Nahum 1 Bible Online

Nahum 1 - De Bibel JHF bible

Nahum 1

¹Utspruch äwa Ninive. Daut es daut profeetische Buak von Nahum, von Elkosch.

²Een iewaja un racheewenda Gott, es de Har, een Racheewa es de Har un voll von Oaja; de Har eeft Rach aun siene Jäajna un drajcht daut siene Fiend no.

³De Har es langsom toom Oaja un groot aun Krauft, un hee helt en kjeenem Faul däm Schuldjen fa schultloos. De Har em Stormwint un em Jewitta es sien Wajch, un de Wolkjen sent de Stoff von siene Feet.

⁴Hee schellt daut Mäa un lajcht daut drieech, un aule Streem moakt hee drieech; Baschan un Karmel vewalkje, un daut vewalkjt daut Blieechsel vom Libanon.

⁵Ver am bäben de Boaj un de Aunboaj vegonen, un ver sienem Aunjesecht häft sikj de Ieed {Jes.13,13}, un de Ieedkjreis un aule, dee doabowen wonen.

⁶Wäa kaun ver sienem Jrim bestonen, un wäa staunthoolen bie de Gluaje von sienem Oaja? Sien Oaja vebreed sikj aus Fia, un de Boajchspetzen plauzen (vefaulen) ver am.

⁷De Har es goot, hee es eene Fastinj aum Dach de Noot; un hee kjant dee, dee opp am vetruen.

⁸Un met eenen äwaschwamenden Stroom woat hee äare Städa venichten, un Diestanis woat äare Fiend vefoljen.

⁹Waut plon jie jäajen däm Harn? Hee woat venichten; daut Onjlekj woat nich twee Mol oppkomen.

¹⁰Dan wieren see aus Stachlen veflochte un von äarem basten Wien bedrunken, see sellen gaunz vebrent woaren aus drieejet Stoppel.

¹¹Von die es utjegonen, dee Beeset plond jäajen däm Harn, een onveninftja Rotjäwa.

¹²Soo sajcht de Har: Wan see uk onbeschädicht un noch soo väl sent, uk soo sellen see aufjeschnäden woaren; un hee woat wajch sennen. - Un ha ekj die uk jedeemooticht, ekj woa die nich mea deemutje;

¹³sonda ekj woa sien Joch von die vebräakjen un diene Jefangenschoft verieten.

¹⁴Un jäajen die haft de Har befoolen, daut von dienem Nomen nich mea jeseit woaren saul; ut däm Hus von dienem Gott woa ekj daut jeschnädne un daut jegotne Bilt utroden; ekj woa die een Grauf moaken, dan too leicht best du jefungen worden.