Read De Bibel JHF Nahum 3 Bible Online

Nahum 3 - De Bibel JHF bible

Nahum 3

¹Wee de Blootstaut, gaunz voll met Läajes un Jewault! Daut Roowen hieet nich opp.

²Pitschen Jeknaul un Räda Jeraussel, un joagende Pieed un oppsprinjende Woages;

³nodakomende Ritta, un flaumendet Schwieet un blitzenda Spies! Un eene Menj Jeschloagne un Hupes von Doodje un Doodes onen Enj; maun stolpat äwa äare Kjarpa!

⁴Wäajen de väle Huararie dee mootvollen Huaren, de Zaubarie driewende, dee Velkja vekoft met äare Huararie un Jeschlajchta met äare Zaubarie.

⁵Kjikj, ekj well aun die, sajcht Gott de Häaschoa; un ekj woa dien Kjleet (Soom) opdakjen äwa dien Aunjesecht, un de Velkja die Noaktich seenen loten un de Kjennichrikjs diene Schaund.

⁶Un ekj well Onrot opp die schmieten, un die to Schaund moaken un die toom Schauspäl stalen.

⁷Un daut woat passieren, jiedra, dee die sitt, woat von die ranen un sajen: Ninive es vewustet! Wäa woat met äa Metleet haben? Wuahäa saul ekj die Treesta säkjen?

⁸Best du bäta aus No-Amon, dee aun de Streem wonen, Wota runtom sikj? Daut Mäa wia äa Schutzdaum, äare Mia besteit ut Wota (Mäa).

⁹Ätiopien wia äare Macht un Ägipta en zolloose Menj; Put un Libien wäaren äare Help.

¹⁰Uk see es en de Vebauninj, enne Jefangenschoft jegonen; uk äare Kjinja worden veschmatat aun aule Gaussenakjen; un äwa äare Väanämen schmeet maun daut Loss, un aule äare Groote worden met Kjäden jefasselt.

¹¹Uk du saust bedrunken woaren, saust veborjen sennen {Obad.16}; uk du woascht eene Tooflucht sieekjen ver däm Fiend.

¹²Aule diene Fastinj sent Fiejebeem met tiedje Fiejen; wan see jescheddat woaren, soo faulen see däm Ätenden en däm Mul.

¹³Kjikj, dien Volkj es en diene Medd too Frues jeworden; fa diene Fiend sent de Dooasch von dienem Launt wiet opjemoakt, Fia vebrent diene Rijel.

¹⁴Schap die Wota fa diene Beloagrunk; bäta diene vesechade Städen ut! Klunj däm Schlaum un staump däm Leem, stal däm Tieejelowen wada häa!

¹⁵Doa woat daut Fia die vebrennen, woat daut Schwieet die utroden, die auffräten aus de Kjniepasch. Vemiere die aus de Kjniepasch, vemia die aus de Heischrakjen!

¹⁶Du hast diene Hendla mea jemoakt aus de Stierns aum Himmel: De Kjniepasch breeden sikj ut un flieejen doavon.

¹⁷Diene Uterwälde sent soo aus de Heischrakjen, un diene bowaschten Kjrichsmana aus een Schwoarm Heischrakjen, dee sikj aum Tun loagren aum frost Dach: De Sonn jeit opp, soo flieejen see doavon, un maun weet äare Städ nich; - woa see sent?

¹⁸Diene Hoads schlopen, Kjennich von Assur, diene Adelje ligjen doa; dien Volkj es opp de Boaj vestreit, un kjeena saumelt an.

¹⁹Kjeene Lindrung fa diene Wunden, diene Wund es onheelboa! Aule, dee de Norecht von die hieren, klautsche äwa die enne Henj; dan äwa wäm es nich diene Boosheit stendich jegonen?