Read De Bibel JHF Habakuk 1 Bible Online

Habakuk 1 - De Bibel JHF bible

Habakuk 1

¹De Laust, dee de Profeet Habakuk, jeseenen haft.

²Woo lang, Har, ha ekj jeroopen, un du hieescht nich! Ekj schrieech no die: Jewault! Un du radst nich.

³Wuarom latst du mie Fräfel seenen, un sitst Onheil aun? Un Vewustunk un Jewault sent ver mie, un Striet entsteit, un Fientschoft erhäft sikj.

⁴Doarom woat daut Jesaz krauftloos, un daut Rajcht kjemt niemols väa; dan de Gottloosa omrinjt däm Jerajchten: Doarom kjemt daut Rajcht vedreit väa.

⁵Kjikjt unja de Nazionen, un kjikjt un staunt, erstaunt; dan ekj wirkj een Woakj en june Doag - jie wudden daut nich jleewen, wan daut vetalt wudd.

⁶Dan kjikj, ekj erwakj de Chaldäa, daut jrimsje un onbestemmde Volkj, daut de Breed de Ieed derchwaundat, om Woninj aus Ieejentum too nämen, dee am nich jehieren.

⁷Hee es schrakjlich un furchtboa; sien Rajcht un siene Huagheit gonen ver am ut.

⁸Un siene Pieed sent schwinda aus de Pardel un hetzja aus de Wilw oppenowent; un siene Rittasch flieejen omhäa, un siene Rittasch komen von wiet häa, flieejen doahan aus een Odla, dee sikj toom Fräten spood.

⁹See komen aula toop too Jewault; äa Aunjesecht es nom Oosten jerecht, un rope Jefangne aus Saunt toop.

¹⁰Un vespott de Kjennichs, un de Ferschten sent am een Jelach; hee lacht äwa de Fastinj, un hee schedd Ieed opp un nemt ar en.

¹¹Dan foat hee doahan aus de Wint, un trakjt wieda un vesindicht sikj: Dise siene Krauft es sien Gott!

¹²Best du nich von oole Tieden häa, de Har, mien Gott, mien Heilja? Wie woaren nich stoawen. Har, toom Jerecht hast du daut jesat, un, oo Steen, daut toom Zichtje bestalt.

¹³Diene Uagen sent too rein, om Beeset to seenen, un Onheil kaust du nich aunseenen. Wuarom kjikjst du Reibasch too {Jes.21,2}, best stell, wan de Gottloosa däm veschlinjt, dee jerajchta es aus hee,

¹⁴un moakst de Menschen aus de Fesch em Mäa, aus de Warm, dee kjeenen Harscha ha?

¹⁵Hee trakjt dee aula met de Angel nohecht, hee trakjt an noda met sienem Nat un saumelt an en sien Dronsel; doarom freit hee sikj un jubelt.

¹⁶Doarom opfren see äarem Nat un rieekjren sienem Dronsel, dan derch an es sien Deel fat un sien Äten kjraftich.

¹⁷Saul hee doawäajen sien Nat ladich moaken, un emma doaropp utgonen, Velkja schoonungsloos omtobrinje?