Read De Bibel JHF Habakuk 3 Bible Online

Habakuk 3 - De Bibel JHF bible

Habakuk 3

¹Habakuk sien Jebäd, däm Profeet, fa de Oschuldje (no Schigjonoth).

²Har, ekj ha diene Norecht venomen, ekj enjst mie; Har, beläw dien Woakj enne Medd de Joaren, medden en de Joaren moak daut bekaunt; em Oaja jedenkj daut Erboarmen!

³Gott kjemt vom Teman häa, un de Heilja vom Jebirje Paran. (Sela) Siene Pracht bedakjt de Himmel, un de Ieed es voll sienem Riem.

⁴Un daut entsteit een Glauns aus daut Sonnenlicht; Strohle sent aun siene Sieden, un doaselfst es siene Macht vestoaken.

⁵Ver am häa jeit de Past, un de Ploag jeit ut, siene Feet no.

⁶Hee bleef stonen un maut de Ieed, hee kjikjt un muak bäbent de Velkja; un daut veschmatade de Boaj de Uatiet, daut bekjen sikj de eewje Aunboaj; siene Stiej (Wäaj) sent von Uatiet.

⁷Unja Noot sach ekj de Zelten Kuschan, daut zettaden de Behenje em Zelt, em Launt Midian.

⁸Es de Har jäajen de Streem oajalich? Es dien Oaja jäajen de Streem, dien Jrim jäajen daut Mäa, doa du opp diene Pieed ritst, opp diene radende Woages?

⁹Kohl, opjedakjt es dien Boagen - Zuchtwäd, jeschwuaren derch dien Wuat! (Sela) Too Streem spoolst du daut Launt.

¹⁰Daut seenen die, daut zetren de Boaj; een Wotastroom fua doahäa, de deepe Ozean leet siene Stemm schaule, nohecht hoof see äare Henj.

¹¹De Sonn un Mon gonen en äare Wonunk biem dachen von diene Feilasch, dee doahan scheeten, biem Glauns von dienem blitzenden Spies.

¹²Em Groll jeist du äwa de Ieed, em Oaja klunjst du de Nazionen dol.

¹³Du jinjst ut to dienem Volkj sien Heil, dienem Jesaulwden toom Heil: Du veschmatascht daut Haupt vom Hus de Gottloose, bat aum Hauls dakjst du däm Grunt op. (Sela)

¹⁴Du boascht met dienem Spies daut Haupt siene Schoa derch, dee aunstorme, mie too vestreien, dee sikj freiden, däm Älenden em Vestäakj too veschlinjen.

¹⁵Du jinjst em Mäa met diene Pieed, en schumende groote Wotasch.

¹⁶Ekj hieed daut, un mien Lief zettad; bie dee Stemm bäbde miene Leppen; Morschheit kjemt en miene Jläda, un woa ekj stunt, zettad ekj: Dee ekj ruen woa aum Bedrenjnisdach, wan dee janja jäajen daut Volkj trakjt, dee daut aunjriepen woat.

¹⁷Dan de Fiejenboom woat nich blieejen, un kjeene Frucht woat aum Wienstock sennen; un de Frucht aum Eeljboom blift ut, un de Jeträajde Felda brinjen kjeene Noarinj; enne Häaden es daut Kjlienvee veschwungen, un kjeen Rind es en däm Staul.

¹⁸Oba ekj, ekj well mie en däm Harn freien, well jublen en däm Gott, mien Heil.

¹⁹Gott, de Har, es miene Krauft, un moakt miene Feet soo aus de Herschkoo äare un lat mie omhäa gonen opp miene Hechten {Ps.18,32.33; 5Mo.33,29}. Däm Väasenja, met mienem Seidenspell!