Read De Bibel JHF Zefanja 2 Bible Online

Zefanja 2 - De Bibel JHF bible

Zefanja 2

¹Saumelt junt un komt häa, jie Volkj onen Schomp,

²ea sikj daut Beschlotne erfelt, - doch aus Sprie foat de Dach doahan - dan ea aus de Oajagloot Gottes äwa junt kjemt, dan ea aus de Jrimgloot Gottes äwa junt kjemt!

³Sieekjt däm Har, aula, jie Deemootje em Launt, dee jie sien Rajcht jewirkjt ha; sieekjt Jerajchtichkjeit, sieekjt Deemoot; veleicht woa jie aum Jrimdach Gottes bewoat.

⁴Dan Gasa woat veloten un Askalon eene Wieste sennen; Aschdod: Aum Meddach wajchjejoagt, un Ekron woat entwartelt woaren.

⁵Wee de Bewona aum Mäaeewa, de Nazion de Keretita (Kreeta)! Daut Wuat Gottes kjemt äwa junt, Kanaan, Launt de Filista! Un ekj woa die venichten, daut kjeen Bewona mea blift.

⁶Un daut Launt aum Mäa woat too Hoadshiesa un Schopshäaden woaren;

⁷un daut woat eene Striep Launt sennen fa de Äwajebläwne vom Hus Juda: See woaren doabowen weiden un Oppenowent sikj loagren enne Hiesa Askalon; dan de Har, äa Gott, woat sikj an aunnämen un äare Jefangenschoft dreien.

⁸Ekj ha daut veachten von Moab un daut Lastren de Kjinja Amon jehieet, met waut see mien Volkj veacht un sikj groot jedonen ha jäajen äare Jrensen.

⁹Doarom, soo woa ekj läw, sajcht Gott de Häaschoa, de Gott Israels, jewess saul Moab aus Sodom, un de Kjinja Amon aus Gomorra woaren, een Ieejentum vom Brennkrut un eene Soltkul un eene Wieste opp eewich. Dee Äwajebläwne von mienem Volkj woaren an beroowen, un daut Äwabliefsel von miene Nazion an beoawen {Jes.14,2}.

¹⁰Soowaut woat an fa äa Stolt tomdeel, wiels see daut Volkj Gottes de Häaschoa veacht un jäajen an grootjedonen ha.

¹¹Ferchtboa woat de Har jäajen an sennen, dan hee woat veschwinjen loten aule Jetta de Ieed; un aule Inslen de Nazionen woaren am aunbäden, een jiedra von siene Städ ut.

¹²Uk jie, Ätiopia, woaren Jeschloagne met mienem Schwieet sennen.

¹³Un hee woat siene Haunt jäajen Nuaden utstrakjen, un woat Assur venichten un Ninive to eene Wieste moaken, drieech aus de Stap.

¹⁴Un en siene Medd woaren Häaden sikj loagren, väl, aula Oat Tieren; uk Pelikane, uk Iejel (Stachelschwien) woaren opp siene Torme äwanachten. Eene Stemm sinjt em Fensta, Trimma sent oppe Schwal, dan hee haft daut Zeeda Woakj kol jelajcht.

¹⁵Doa es de frooe Staut, dee en Sechaheit wont, dee en äarem Hoat sajcht: Ekj sie et un sest kjeena! Woo es see too eene Wieste jeworden, toom Loagaplauz de wille Tieren! Een jiedra, dee aun äa vebie jeit, woat zischen, woat met siene Haunt schlonen.