Read De Bibel JHF Hagai 1 Bible Online

Hagai 1 - De Bibel JHF bible

Hagai 1

¹Aum tweeden Joa vom Kjennich Darius, em sasten Moonat, aum ieeschten Dach em Moonat, wia daut Wuat Gottes derch däm Profeet Hagai too Serubabel, däm Sän Schealtiel, däm Stauthoola von Juda, un to Josua, däm Sän Jozadak, däm Huagapriesta, aulsoo:

²Soo räd Gott de Häaschoa un sajcht: Dit Volkj sajcht: De Tiet es nich jekomen, de Tiet, daut et Hus Gottes jebut woat.

³Un daut Wuat Gottes wia derch däm Profeet Hagai aulsoo:

⁴Daut es fa junt selfst Tiet, en june jetofelde Hiesa too wonen, wiels dit Hus vewustet licht?

⁵Un nu, soo sajcht Gott de Häaschoa: Recht jun Hoat opp june Wäaj!

⁶Jie ha väl jeseit un weinich enjebrocht; jie äten, oba nich toom saut woaren; jie drinkjen, oba nich jenuach; jie kjleeden junt, oba daut woat kjeenem woam; un de Loonoabeida vedeent Loon fa eenen lajchajen Biedel.

⁷Soo sajcht Gott de Häaschoa: Recht jun Hoat opp june Wäaj!

⁸Got oppe Boaj un brinjt Holt un but daut Hus, soo woa ekj Wooljefaulen doaraun haben un veharlicht woaren, sajcht de Har.

⁹Jie ha opp väl jehopt, un kjikj, daut wort weinich; un jie brochten daut nohus, soo blosd ekj daut wajch. Wuarom daut? Sajcht Gott de Häaschoa; wäajen mien Hus, wiels daut wiest licht, soo aus jie ranen, een jiedra fa sien ieejnet Hus.

¹⁰Doarom haft de Himmel dän Deiw äwa junt trigjjehoolen un de Ieed äare Arnt trigjjehoolen.

¹¹Un ekj ha eene drieeje Tiet jeroopt äwa daut Launt, un äwa de Boaj, un äwa daut Jeträajd un äwa däm jungen Wien un äwa daut Eelj, un äwa daut, waut de Ieedboddem väabrinjt, un äwa de Menschen un äwa daut Vee, un äwa aule Oabeit de Henj.

¹²Un Serubabel, de Sän Schealtiel, un Josua, de Sän Jozadak, de Huagapriesta, un de äwajebläwne vom Volkj hieeden opp de Stemm Gottes, äarem Gott, un opp de Wieed vom Profeet Hagai, soo aus de Har, äa Gott, am jeschekjt haud; un daut Volkj fercht sikj ver däm Harn.

¹³Doa säd Hagai, de Boote Gottes, dee de Bootschoft Gottes aum Volkj haud un säd: Ekj sie met junt, sajcht de Har.

¹⁴Un de Har erwakjt däm Jeist Serubbabels, däm Sän Schealtiel, däm Launtfläaja von Juda, un däm Jeist Josua, däm Sän Jozadak, däm Huagapriesta, un däm Jeist von däm gaunzen äwajebläwnen Volkj; un see kjeemen un oabeiden aum Hus Gottes de Häaschoa, äarem Gott,

¹⁵aum 24-sten Dach em sasten Moonat, aum tweeden Joa vom Kjennich Darius.