Read De Bibel JHF Sacharja 1 Bible Online

Sacharja 1 - De Bibel JHF bible

Sacharja 1

¹Aum achten Moonat, aum tweeden Joa von Darius, wia daut Wuat Gottes too Sacharja, däm Sän von Berekja, vom Sän Ido, däm Profeet {Es.5,1; 6,14; Neh.12,16}, aulsoo:

²De Har es oajalich jewast äwa june Vodasch.

³Un säd to an: Soo sajcht Gott de Häaschoa: Dreit no mie om, sajcht Gott de Häaschoa, un ekj woa mie no junt omdreien, sajcht Gott de Häaschoa.

⁴Siet nich aus june Vodasch, dän eenst de Profeeten tooroopten un säden: Soo sajcht Gott de Häaschoa: Dreit doch om von june beese Wäaj un von june beese Haundlungen! Oba see hieeden nich un achten nich opp mie, sajcht de Har.

⁵June Vodasch, wua sent see? Un de Profeeten, läwen see eewich?

⁶Doch miene Wieed un miene Beschlusse, dee ekj miene Kjnajchts, de Profeeten, befool, ha dee june Vodasch nich jetroffen? Un see dreiden om un säden: Soo aus Gott de Häaschoa väahaud, ons no onse Wäaj un no onse Haundlungen to doonen, aulsoo haft hee met ons jedonen.

⁷Aum 24-sten Dach, em alften Moonat, daut es de Moonat Schebat, aum tweeden Joa von Darius, wia daut Wuat Gottes too Sacharja, däm Sän von Berekja, vom Sän Ido, däm Profeet, aulsoo:

⁸Ekj sach de Nacht, un kjikj, een Maun, dee opp eenem rooden Pieet rieden deed; un hee hilt tweschen de Myrte aun, dee enne Läacht wieren, un hinja am wieren roode, lichtroode un witte Pieed.

⁹Un ekj säd: Mien Har, wäa sent dise? Un de Enjel, dee met mie räd, säd to mie: Ekj well die wiesen, wäa dise sent.

¹⁰Un dee Maun, dee tweschen de Myrte aun hilt, auntwuad un säd: Dise sent dee, dee de Har utjeschekjt haft, om de Ieed derch to gonen.

¹¹Un see auntwuaden däm Enjel Gottes, dee tweschen de Myrte aun hilt, un säden: Wie sent de Ieed derch jegonen, un kjikj, de gaunze Ieed es stell un es ruich.

¹²Doa auntwuad de Enjel Gottes un säd: Gott de Häaschoa, woo lang west du die nich Jerusalem un de Städa Juda erboarmen, opp dee du die 70 Joa jeoajat hast?

¹³Un de Har auntwuad däm Enjel, dee met mie räd, goode Wieed, treestende Wieed.

¹⁴Un de Enjel, dee met mie räd, säd to mie: Roop ut un saj: Soo sajcht Gott de Häaschoa: Ekj ha met grootem Iewa fa Jerusalem un fa Zion jeiewat,

¹⁵un met sea grootem Oaja oajad ekj mie äwa de sorjloose Nazion; dan ekj ha mie een bät jeoajat, oba see ha toom Onjlekj doatoo jeholpen.

¹⁶Doarom sajcht de Har aulsoo: Ekj ha mie Jerusalem wada met Erboarmen hanjedreit; mien Hus, sajcht Gott de Häaschoa, saul doabennen jebut, un de Motschnua äwa Jerusalem jetrocken woaren.

¹⁷Roop wiedahan ut un saj: Soo sajcht Gott de Häaschoa: Miene Städa sellen noch vom Goodem äwaranen; un de Har woat Zion noch treesten un Jerusalem noch erwälen.