Read De Bibel JHF Sacharja 10 Bible Online

Sacharja 10 - De Bibel JHF bible

Sacharja 10

¹Bedd von däm Harn Räajen to Loträajen Tiet; de Har moakt Jewittawolkjen (daut Schwoakj), un hee woat junt Räajenguss jäwen, fa jiedrem Jreens oppem Flekj.

²Dan de Terafim ha nuschtjet jerät, un de Woasaja ha Läajes jeseenen; un see räden Läajesdreem, treesten met Donst. Doarom sent see wajchjerant aus eene Häad, woaren bedrekjt, wiels kjeen Hoad doa es.

³Mien Oaja es jäajen de Hoads entbrennt, un de Bakj woa ekj bestrofen; dan Gott de Häaschoa woat siene Häad, daut Hus Juda, sikj aunnämen un an aus een Prachtpieet em Striet moaken.

⁴Von am [Juda] kjemt de Akjsteen, von am de Noagel, von am de Kjrichsboagen, von am woaren aule Bedrenja - aula toop väakomen.

⁵Un see woaren de Helden sennen, dee däm Drakj oppe Gaussen em Kaumf veklunjen; un see woaren kjamfen, dan de Har es met an, un de Rittasch oppe Pieed woaren to Schaund.

⁶Un ekj woa daut Hus Juda stoakjen un daut Hus Josef raden; un woa an wonen loten; dan ekj ha mie an erboarmt, un see woaren sennen, aus wan ekj an nich vestat haud. Dan ekj sie de Har, äa Gott, un woa an auntwuaden.

⁷Un Efraim woat aus een Held sennen, un äa Hoat woat sikj freien aus vom Wien; un äare Kjinja woaren daut seenen un sikj freien, äa Hoat woat sikj en däm Harn freien.

⁸Ekj well too an piepen un an saumlen, dan ekj ha an erleest; un see woaren sikj vemieren, aus see sikj vemieet ha.

⁹Un ekj well an unjre Velkja seien {Hos.2,23}, un en de wiede Lenda woaren see aun mie denkjen; un see woaren met äare Kjinja läwen un trigjkomen.

¹⁰Un ekj woa an trigj fieren ut däm Ägiptenlaunt un an saumlen ut Assierien, un an en daut Launt Gilead un opp däm Libanon brinjen; un woat nich jenuach Rum fa an jefungen woaren.

¹¹Un hee woat derch daut Mäa de Angst trakjen un de Walle em Mäa schlonen, un aule deepe Streem woaren utdräjen; un de Assuriens Stolt woat doljeschmäten woaren, un Ägiptens Zepta woat veschwinjen.

¹²Un ekj woa an stoakj moaken en däm Harn, un en sienem Nomen woaren see waundlen, sajcht de Harn.