Read De Bibel JHF Sacharja 12 Bible Online

Sacharja 12 - De Bibel JHF bible

Sacharja 12

¹Utspruch vom Wuat Gottes äwa Israel. Daut räd de Har, dee däm Himmel utbreet un de Ieed jrind, un däm Jeist de Menschen en sienem ennalichen moakt.

²Kjikj, ekj moak Jerusalem to eenem Tomelbecha (een Kuffel waut dieslich moakt) fa aule Velkja runtom; un uk äwa Juda woat daut komen bie de Beloagrunk von Jerusalem.

³Un daut woat passieren aun janem Dach, doa woa ekj Jerusalem to eenem Lauststeen fa aule Velkja moaken: Aula, dee am opploden wellen, woaren sikj doaraun vewunden. Un aule Nazionen de Ieed woaren sikj jäajen an vesaumlen.

⁴Aun janem Dach, sajcht de Har, woa ekj aule Pieed met Vewerrunk un äare Rittasch met Wonsenn schlonen; un äwa daut Hus Juda woa ekj miene Uagen op hoolen, un aule Pieed de Velkja met Blintheit schlonen.

⁵Un de Ferschten von Juda woaren en äarem Hoat sajen: Eene Krauft sent mie de Bewona von Jerusalem en Gott de Häaschoa, äarem Gott.

⁶Aun janem Dach woa ekj de Ferschten von Juda soo aus eene Fiakomm moaken unja Holtstekja un aus eenen Fiastock unja Goawen; un dee woaren too Rajchten un to Linkjen aule Velkja vebrennen. Un de Enwona von Jerusalem, woat wiedahan aun siene Städ en Jerusalem wonen.

⁷Un de Har woat ieescht de Zelten Juda raden, om daut de Harlichkjeit von David sien Hus un de Pracht de Bewona von Jerusalem sikj nich äwa Juda erhäwen.

⁸Aun janem Dach woat de Har de Bewona von Jerusalem bewoaren; un de Ängstlicha unja an woat aun janem Dach aus David sennen, un daut David sien Hus aus Gott, aus de Enjel Gottes ver an häa.

⁹Un daut woat aun janem Dach passieren, doa woa ekj aule Nazionen too vetiljen sieekjen, dee jäajen Jerusalem komen.

¹⁰Un ekj woa äwa David sien Hus un äwa de Bewona von Jerusalem däm Jeist de Jnod un daut Beddens utjeeten; un see woaren opp mie kjikjen, däm see derchstuaken ha, un woaren äwa am weekloagen aus de Weekloag äwa däm Eenjebuarnen, un bettalich äwa am hielen, aus maun bettalich hielt äwa däm Ieeschtjebuarnen.

¹¹Aun janem Dach woat groote Weekloag en Jerusalem sennen aus de Weekloag von Hadad-Rimmon enne Läacht Megiddo {2Chr.35,22}.

¹²Un weekloagen woat daut Launt, jiedret Jeschlajcht besondasch: Daut Jeschlajcht von David sien Hus besondasch, un äare Frues besondasch; daut Jeschlajcht vom Hus Natan besondasch, un äare Frues besondasch;

¹³daut Jeschlajcht vom Hus Levi besondasch, un äare Frues besondasch; daut Jeschlajcht Schimita {4Mo.3,21} besondasch, un äare Frues besondasch;

¹⁴aule aundre Jeschlajchta, jiedret Jeschlajcht besondasch, un äare Frues besondasch.