Read De Bibel JHF Sacharja 13 Bible Online

Sacharja 13 - De Bibel JHF bible

Sacharja 13

¹Aun janem Dach woat David sienem Hus eene Kjwal opjemoakt woaren un fa de Bewona von Jerusalem fa Sinden un fa Orreinichkjeit.

²Un daut woat aun janem Dach passieren, sajcht Gott de Häaschoa, doa woa ekj de Nomes de Jetta ut däm Launt utroden, un aun an woat nich mea jedocht woaren; un uk de Profeeten un däm Jeist de Orreinheit woa ekj ut däm Launt wajchschaufen.

³Un daut woat passieren, wan een Maun wiedahan profezeit, soo woaren sien Voda un siene Mutta, siene Elren, to am sajen: Du doafst nich läwen, dan du hast Läajes jerät em Nomen Gottes! Un sien Voda un siene Mutta, siene Elren, woaren am derchstäakjen, wan hee profezeit.

⁴Un aun janem Dach woat daut passieren, doa woaren de Profeeten sikj schämen, een jiedra äwa sien Jesecht, wan hee profezeit; un see woaren nich mea eenen hoajen Mauntel auntrakjen, om to lieejen.

⁵Un hee woat sajen: Ekj sie kjeen Profeet, ekj sie een Maun, dee daut Launt bebut; dan maun haft mie jekoft von miene Jugent aun.

⁶Un wan wäa to am sajcht: Waut sent daut fa Wunden en diene Henj? Soo woat hee sajen: Daut sent de Wunden, met waut ekj jeschloagen worden sie em Hus von dän, dee mie leewen.

⁷Schwieet, wakj opp jäajen mienem Hoad un jäajen däm Maun, dee mien Näakjsta es! Sajcht Gott de Häaschoa; schlo däm Hoad, un de Häad woat sikj vestreien. Un ekj woa miene Haunt dän Kjlienen hanhoolen.

⁸Un daut woat em gaunzen Launt passieren, sajcht de Har: 2 Deel doavon woaren utjerot woaren un omkomen, oba de dredda Deel doavon woat äwabliewen.

⁹Un ekj woa dän dredden Deel em Fia brinjen, un ekj woa an rein moaken, aus maun daut Selwa reinicht, un an proowen, aus maun daut Golt prooft. Dee woaren mienen Nomen aunroopen, un ekj woa an auntwuaden; ekj woa sajen: Daut es mien Volkj; un dee woaren sajen: De Har es mien Gott.