Read De Bibel JHF Sacharja 14 Bible Online

Sacharja 14 - De Bibel JHF bible

Sacharja 14

¹Kjikj, fa däm Harn kjemt een Dach, doa woat dien Raup vedeelt woaren en diene Medd.

²Un ekj woa aule Nazionen no Jerusalem toom Kjrich vesaumlen; un de Staut woat enjenomen un de Hiesa woaren jeplindat un de Frues vejewaulticht woaren; un de Halft de Staut woat enne Jefangenschoft jefieet, oba daut äwaje Volkj woat nich ut de Staut utjerot woaren.

³Un de Har woat uttrakjen un jäajen de Nazion strieden, aus aun janem Dach, aus hee street, aun däm Dach de Schlacht.

⁴Un siene Feet woaren aun janem Dach opp däm Eeljboajch stonen, dee ver Jerusalem jäajen Oosten licht; un de Eeljboajch woat sikj enne Medd spoole no Oosten un no Wasten han, to eenem sea groote Läacht, un de Halft vom Boajch woat nom Nuaden un siene aundre halft nom Sieden veschuwe.

⁵Un jie woaren enne Läacht von miene Boaj ranen, un de Läacht enne Boaj woat bat Azel rieekjen; un jie woaren ranen, aus jie ver däm Ieedbäben jerant sent en de Doag Usija, däm Kjennich von Juda. Un de Har woat komen, mien Gott, un aule Heilje met die.

⁶Un daut woat aun janem Dach passieren, doa woat kjeen Licht sennen; sonda eene Kold un Frost.

⁷Un daut woat een eensja Dach sennen (dee es däm Harn bekaunt), nich Dach un nich Nacht; un daut woat to Owenttiet passieren, doa woat daut Licht (dach) woaren.

⁸Un aun janem Dach woat daut passieren, doa woaren läwendje Wotasch ut Jerusalem ranen, to Halft nodäm oostlichem Mäa un to Halft nodäm hinjaschten Mäa; em Somma un em Winta woat daut passieren.

⁹Un de Har woat Kjennich sennen äwa de gaunze Ieed; aun janem Dach woat de Har eena sennen un sien Nomen Eena.

¹⁰Daut gaunze Launt woat sikj omwaundlen aus de Stap, von Geba bat Rimmon, dee siedlich von Jerusalem licht; un Jerusalem woat huach sennen un aun siene Städ wonen, vom Dooa Benjamin bat nom Akjdooa, un vom Torm Hananel bat nodäm Kjennich siene Wien Prass.

¹¹Un maun woat doabennen wonen, un kjeen Baun woat mea sennen; un Jerusalem woat en Sechaheit wonen.

¹²Un dit woat de Ploag sennen, met waut de Har aule Velkja ploagen woat, dee jäajen Jerusalem Kjrich jefieet ha: Hee woat eenem jiedren sien Fleesch vewäsen loten, wäarent hee opp siene Feet steit, un siene Uagen woaren vewäsen en äare Heelen, un siene Tung woat en sienem Mul vewäsen.

¹³Un daut woat aun janem Dach passieren, doa woat eene groote Vewerrunk von däm Harn unja an entstonen; un see woaren eena däm aundren siene Haunt jriepen, un eenem jiedren siene Haunt woat sikj jäajen de Haunt von sienem Näakjsten opphäwen.

¹⁴Un uk Juda woat en Jerusalem kjamfen; un daut Rikjtum aula Nazionen omhäa woat jesaumelt woaren: Golt un Selwa un sea väl Kjleeda.

¹⁵Un krakjt soo, aus dise Ploagen, woat de Ploag de Pieed, de Multieren, de Kameelen un de Esel un aulet Vee sennen, daut en janem Häaloaga sennen woat.

¹⁶Un daut woat passieren, daut aule Äwajebläwne von de Nazionen, dee jäajen Jerusalem jekomen sent, von Joa too Joa noppkomen woaren, om däm Kjennich, Gott de Häaschoa, auntobäden un daut Loofzeltfast too fieren.

¹⁷Un daut woat passieren, wan eent von de Jeschlajchta de Ieed no Jerusalem nich nopptrakjen woat, om däm Kjennich, Gott de Häaschoa, auntobäden: Äwa dee selje woat kjeen Räajen komen;

¹⁸un wan daut Jeschlajcht Ägiptens nich nopptrakjt un nich kjemt, soo woat de Räajen uk nich äwa an komen. Daut woat de Ploag sennen, met waut de Har de Nazionen ploagen woat, dee nich nopptrakjen woaren, om daut Loofzeltfast too fieren.

¹⁹Daut woat de ägiptische Strof {4Mo.32,23} un de Strof aula Nazionen sennen, dee nich nopptrakjen woaren, om daut Loofzelten-Fast to fieren.

²⁰Aun janem Dach woat opp däm Pieetsjescherr stonen: Heilich däm Jahwe. Un de Koaktopp em Hus Gottes woaren aus de Opfakomm ver däm Aultoa sennen;

²¹un jiedra Koaktopp en Jerusalem un en Juda woat Gott de Häaschoa heilich sennen; un aule dee opfren wellen woaren komen un von däm seljen nämen un doabennen koaken. Un daut woat aun janem Dach kjeen Kanaanita mea sennen em Hus Gottes de Häaschoa.