Read De Bibel JHF Sacharja 2 Bible Online

Sacharja 2 - De Bibel JHF bible

Sacharja 2

¹Un ekj hoof miene Uagen opp un sach: Un kjikj, vea Hieena.

²Un ekj säd toom Enjel, dee met mie räd: Waut sent dise? Un hee säd to mie: Dise sent de Hieena, dee Juda, Israel un Jerusalem vestreit ha.

³Un de Har leet mie 4 Schmetts seenen.

⁴Un ekj säd: Waut wellen dise doonen? Un hee räd to mie un säd: Jant sent de Hieena, dee Juda soo vestreit ha, daut kjeena mea sien Haupt opphoof; un dise sent jekomen, om an en Schrakj too vesaten un de Hieena de Nazionen doltodrekjen, dee daut Huarn jäajen daut Launt Juda oppjehowen ha, om daut to vestreien.

⁵Un ekj hoof miene Uagen opp un sach: Un kjikj, een Maun, un eene Motschnua wia en siene Haunt.

⁶Un ekj säd: Wuahan jeist du? Un hee säd to mie: Jerusalem to mäten, om to seenen, woo groot siene Breed un woo groot siene Lenj es.

⁷Un kjikj, de Enjel, dee met mie räd, jinkj ut; un een aundra Enjel jinkj ut, am entjäajen.

⁸Un hee säd to am: Ran, räd to disem Jinjlinkj un saj: Aus eene opne Staut woat Jerusalem bewont woaren wäajen de Menj von Menschen un Vee en äare Medd.

⁹Un ekj, sajcht de Har, woa am eene fiaje Mia runtom sennen, un woa too Harlichkjeit sennen en siene Medd.

¹⁰Huij! Huij! Rant ut däm Launt vom Nuaden! Sajcht de Har; dan no de vea Wind vom Himmel breed ekj junt ut, sajcht de Har.

¹¹Huij! Ran wajch, Zion, dee du wonst bie de Dochta Babel!

¹²Dan soo sajcht Gott de Häaschoa: No de Harlichkjeit haft hee mie no de Nazionen jeschekjt, dee junt jeplindat ha; dan wäa junt auntaust, taust sienen Uagaupel aun.

¹³Dan kjikj, ekj woa miene Haunt äwa an schwinjen (opphäwen), un see woaren dän toom Raup sennen, dee an deenen; un jie woaren erkjanen, daut Gott de Häaschoa mie jeschekjt haft.

¹⁴Jublen un frei die, Dochta Zion! Dan kjikj, ekj kom un woa en diene Medd wonen, sajcht de Har.

¹⁵Un aun janem Dach woaren väl Nazionen sikj aun däm Harn aunschluten, un see woaren mien Volkj sennen; un ekj woa en diene Medd wonen, un du woascht erkjanen, daut Gott de Häaschoa mie no die jeschekjt haft.

¹⁶Un de Har woat Juda aus sien Oawgoot besetten en däm heiljen Launt un woat Jerusalem wada erwälen.

¹⁷Aulet Fleesch sie ver däm Harn stell! Dan hee haft sikj oppjemoakt ut siene heilje Wonunk.