Read De Bibel JHF Sacharja 3 Bible Online

Sacharja 3 - De Bibel JHF bible

Sacharja 3

¹Un hee leet mie däm Huagapriesta Josua seenen {Es.2,2; 3,2}, dee ver däm Enjel Gottes stunt; un de Soton stunt aun siene Rajchte, am to wadastonen.

²Un de Har säd toom Soton: De Har schellt die, Soton! Jo, daut schellt die de Har, dee Jerusalem erwält haft! Es disa nich een Brauntstekj, daut ut däm Fia jerat es?

³Un Josua wia bekjleet met jriese Kjleeda un stunt ver däm Enjel.

⁴Un de Enjel auntwuad un säd to dän, dee ver am stunden, un säd: Trakjt am de jriese Kjleeda ut; un to am säd hee: Kjikj, ekj ha diene Ojjerajchtichkjeit von die wajchjenomen, un ekj kjleed die en Fastkjleeda.

⁵Un ekj säd: Maun sat eenen reinen Koppbunt opp sien Haupt. Un see saden däm reinen Koppbunt opp sien Haupt un trocken am Kjleeda aun; un de Enjel Gottes stunt doabie.

⁶Un de Enjel Gottes bezeijd däm Josua un säd:

⁷Soo sajcht Gott de Häaschoa: Wan du en miene Wäaj waundlen un wan du mienen Deenst beachten woascht, soo saust du soo aus mien Hus vewaulte aus uk miene Väahäw bewoaren; un du saust nenn- un utgonen unja dise, dee hia stonen.

⁸Hea doch, Josua, du Huagapriesta, du un diene Frind, dee ver die setten - dan see sent wundavolle Mana; dan kjikj, ekj well mienem Kjnajcht, Spross jenant, komen loten.

⁹Dan kjikj, dee Steen, däm ekj ver Josua jelajcht ha, - opp eenem Steen 7 Uagen -, kjikj, ekj well siene Äwaschreft enenngrowe, sajcht Gott de Häaschoa, un well de Sinden von disem Launt wajchnämen aun janem Dach.

¹⁰Aun janem Dach, sajcht Gott de Häaschoa, woa jie eena däm aundren enloden unja däm Wienstock un unja däm Fiejenboom.