Read De Bibel JHF Sacharja 4 Bible Online

Sacharja 4 - De Bibel JHF bible

Sacharja 4

¹Un de Enjel, dee met mie räd, kaum wada un wakjt mie aus eenen Maun, dee ut sienem Schlop jewakjt woat.

²Un hee säd to mie: Waut sitst du? Un ekj säd: Ekj kjikjt, un see, eene Laump gaunz ut Golt, un sien Eeljjefäss aun sienem bowaschten Enj, un siene 7 Laumpen aun am, 7, un 7 Jeitruasch aun de Laumpen, dee aun sienem bowaschten Enj sent;

³un 2 Eeljbeem doabie, eena too Rajchten vom Eeljjefäss un eena to siene Linkje.

⁴Un ekj auntwuad un säd to däm Enjel, dee met mie räd, un säd: Mien Har, waut sent dise?

⁵Un de Enjel, dee met mie räd, auntwuad un säd to mie: Weetst du nich, waut daut es? Un ekj säd: Ne, mien Har.

⁶Doa auntwuad hee un säd to mie: Dit es daut Wuat Gottes aun Serubabel: Nich derch Macht un nich derch Krauft, sonda derch mienem Jeist, sajcht Gott de Häaschoa.

⁷Wäa best du, groota Boajch, ver Serubabel? Too eenem jlikjen Launt saust du woaren! Un hee woat däm Jäwelsteen rutbrinjen unja ludem Jubel: Jnod, Jnod am!

⁸Un daut Wuat Gottes wia to mie aulsoo:

⁹De Henj Serubbabels haben dit Hus jejrindet, un siene Henj woaren daut vollbrinjen; un du woascht erkjanen, daut Gott de Häaschoa mie no junt jeschekjt haft.

¹⁰Dan wäa veacht däm Dach kjliena Dinj? Un met Freid woaren jane 7 daut Senkjblie en de Haunt Serubabel seenen: De Uagen Gottes, see derchranen de gaunze Ieed.

¹¹Un ekj auntwuad un säd to am: Waut sent dise 2 Eeljbeem too Rajchte un to Linkje vonne Laump?

¹²Un ekj räd toom tweeden Mol un säd to am: Waut sent de beid Asta aun de Eeljbeem, dee bie de twee goldne Ruasch sent, dee daut Golt von sikj utjeeten?

¹³Un hee räd to mie un säd: Weetst du nich, waut dise sent? Un ekj säd: Ne, mien Har.

¹⁴Doa säd hee: Dit sent de beid Jesaulwte [Eelj Säns], dee biem Harn von de gaunze Ieed stonen.