Read De Bibel JHF Sacharja 5 Bible Online

Sacharja 5 - De Bibel JHF bible

Sacharja 5

¹Un ekj hoof wada miene Uagen opp un sach: Un kjikj, eene flieejende Schreftroll.

²Un hee säd to mie: Waut sitst du? Un ekj säd: Ekj see eene flieejende Schreftroll, äare Lenj 20 Ellen un äare Breed 10 Ellen.

³Un hee säd to mie: Dit es de Fluch, dee äwa daut gaunze Launt utjeit; dan een jiedra, dee stält, woat däm no, waut opp dise Sied vonne Roll jeschräwen es, wajchjefieet woaren; un een jiedra, dee faulsch schwieet, woat doa no, waut aun jane Sied vonne Roll jeschräwen es, wajchjefieet woaren.

⁴Ekj ha am utgonen loten, sajcht Gott de Häaschoa; un hee woat komen en daut Hus vom Deef un en däm sien Hus, dee bie mienem Nomen faulsch schwieet; un hee woat en sienem Hus bliewen un daut venichten, soo aus sien Holtwoakj aus uk siene Steena.

⁵Un de Enjel, dee met mie räd, kjeem väa un säd to mie: Häw doch diene Uagen opp un kjikj: Waut es dit, daut doa väakjemt?

⁶Un ekj säd: waut es daut? Un hee säd: Daut es een Efa, daut väakjemt; un hee säd: Soo es [de Gottloose] äa utseenen em gaunzen Launt.

⁷Un kjikj, eene Schnäd von Blie wort oppjehowen; un doa wia eene Fru, dee enne Medd vom Efa saut.

⁸Un hee säd: Dit es de Gottloosichkjeit; un hee schmeet an en daut Efa nenn un schmeet daut Bliejewicht opp de Opninj.

⁹Un ekj hoof miene Uagen opp un sach: Un kjikj, doa kaumen twee Frues väa, un Wint wia en äare Flichten, un see hauden Flichten aus Storjchflichte; un see hoowen daut Efa nohecht tweschen de Ieed un Himmel.

¹⁰Un ekj säd to däm Enjel, dee met mie räd: Wuahan brinjen dise daut Efa?

¹¹Un hee säd to mie: Om am een Hus too buen em Launt Sinear; un es daut oppjebut, soo woat daut doa opp siene Städ raufjesat woaren.