Read De Bibel JHF Sacharja 6 Bible Online

Sacharja 6 - De Bibel JHF bible

Sacharja 6

¹Un ekj hoof miene Uagen wada opp un sach: Un kjikj, vea Woages kaumen väa tweschen twee Boaj; un de Boaj wieren Boaj von Koppa.

²Aun däm ieeschten Woagen wieren roode Pieed, un aun däm tweeden Woagen schwoate Pieed;

³un aun däm dredden Woagen witte Pieed, un aun däm vieeden Woagen schakje, stoakje Pieed.

⁴Un ekj auntwuad un säd to däm Enjel, dee met mie räd: Mien Har, waut sent dise?

⁵Un de Enjel auntwuad un säd to mie: Dise sent de vea Wind vom Himmel, dee utgonen, nodäm see sikj ver däm Harn de gaunze Ieed jestalt ha.

⁶Aun däm de schwoate Pieed sent, dee trakjen ut nodäm Launt vom Nuaden; un de witte trakjen ut hinja an häa; un de schakje trakjen ut nodäm Launt vom Sieden;

⁷un de stoakje trakjen ut un trachten hantogonen, de Ieed too derchtrakjen. Un hee säd: Got, derchtrakjt de Ieed! Un see derchtrocken de Ieed.

⁸Un hee roopt mie un räd to mie un säd: Kjikj, deejanje, dee nodäm Launt vom Nuaden utjetrocken sent, loten mienen Jeist Ru finjen em Launt vom Nuaden.

⁹Un daut Wuat Gottes wia to mie aulsoo:

¹⁰Nemm von de Wajchjefieede, von Cheldai un von Tobija un von Jedaja, un go du aun däm seljen Dach, go en daut Hus Josia, däm Sän Zefanja, wuahan see ut Babel jekomen sent -,

¹¹jo, nemm Selwa un Golt un moak eene Kroon. Un sat dee opp Josua sienem Haupt, däm Sän von Jozadak, däm Huagapriesta,

¹²un räd to am un saj: Soo sajcht Gott de Häaschoa un sajcht: Kjikj, een Maun, sien Nomen es Spross; un hee woat von siene Städ utloten un däm Tempel Gottes buen.

¹³Jo, hee woat däm Tempel Gottes buen; un hee woat Harlichkjeit droagen; un hee woat opp sienem Troon setten un harschen, un hee woat Priesta sennen opp sienem Troon; un de Frädensrot woat tweschen beid sennen.

¹⁴Un de Kroon saul däm Chelem un Tobija un Jedaja un daut Goode vom Sän Zefanja toom Jedajchnis sennen em Tempel Gottes.

¹⁵Un von wietauf woaren komen un aum Tempel Gottes buen; un jie woaren erkjanen, daut Gott de Häaschoa mie no junt jeschekjt haft. Un dit woat passieren, wan jie opp de Stemm Gottes, junem Gott, hieren woaren.