Read De Bibel JHF Sacharja 8 Bible Online

Sacharja 8 - De Bibel JHF bible

Sacharja 8

¹Un daut wia daut Wuat Gottes de Häaschoa aulsoo:

²Soo sajcht Gott de Häaschoa: Ekj iewa fa Zion met grootem Iewa, un met grootem Jrim iewa ekj fa dautselje.

³Soo sajcht de Har: Ekj go no Zion trigj un well enne Medd - en Jerusalem wonen; un Jerusalem woat «Staut de Woarheit» jenant woaren, un de Boajch Gottes de Häaschoa «dee heilja Boajch».

⁴Soo sajcht Gott de Häaschoa: Daut woaren noch Jreisen un Jreissine en de Gaussen von Jerusalem setten, een jiedra met sienem Stock en siene Haunt fa ne Menj de Doag.

⁵Un de Gaussen enne Staut woaren voll sennen von Junges un Mejalkjes, dee opp äare Gaussen spälen.

⁶Soo sajcht Gott de Häaschoa: Wan daut wundaboa es en de Uagen de Äwajebläwne von disem Volkj en jane Doag, woat daut nich en miene Uagen wundaboa sennen? Sajcht Gott de Häaschoa.

⁷Soo sajcht Gott de Häaschoa: Kjikj, ekj woa mien Volkj raden ut däm Launt vom Sonnenoppgank un ut däm Launt de Sonnenunjagank;

⁸un ekj woa an doahan brinjen, un see woaren en Jerusalems Medd wonen; un see woaren mien Volkj, un ekj woa äa Gott sennen en Woarheit un en Jerajchtichkjeit.

⁹Soo sajcht Gott de Häaschoa: Stoakjt june Henj, dee jie en dise Doag dise Wieed ut däm Mul de Profeeten hieren, dee aun däm Dach wieren, doa de Grunt vom Hus Gottes de Häaschoa, vom Tempel, jelajcht wort, om däm too buen!

¹⁰Dan ver dise Doag wia kjeen Loon fa de Menschen un kjeen Loon fa daut Vee; un dee ut- un enngonenda hauden kjeen Fräd ver däm Bedrenja, un ekj leet aule Menschen jäajen eenaunda loos.

¹¹Oba nu well ekj dee Äwajebläwne von disem Volkj nich sennen aus en de frieejoasche Doag, sajcht Gott de Häaschoa;

¹²sonda de Frädenssot, de Wienstock, woat siene Frucht jäwen, un de Ieed äare Arnt jäwen, un de Himmel woat sien Deiw jäwen; un däm Äwajebläwnen von disem Volkj woa ekj daut aules toom Oawgoot jäwen.

¹³Un daut woat passieren, soo aus jie, Hus Juda un Hus Israel, een Fluch unja de Nazionen jewast sent, aulsoo woa ekj junt raden, un jie woaren een Säajen sennen. Enjst junt nich, stoakjt june Henj!

¹⁴Dan soo sajcht Gott de Häaschoa: Soo aus ekj docht junt Beeset to doonen, aus june Vodasch mie oajaden, sajcht Gott de Häaschoa, un mie daut nich leet deed,

¹⁵aulsoo jedenkj ekj wada en dise Doag Jerusalem un däm Hus Juda Goodet to doonen. Enjst junt nich!

¹⁶Dit sent de Dinj, dee jie doonen sellen: Räd de Woarheit eena met däm aundren; un recht no de Woarheit un schauft Rajcht un Fräd en june Dooasch;

¹⁷un denkjt kjeena om Onjlekj en sienem Hoat jäajen däm aundren, un faulschen Eit leeft nich; dan aul dit, hauss ekj, sajcht de Har.

¹⁸Un daut Wuat Gottes de Häaschoa wia to mie aulsoo:

¹⁹Soo sajcht Gott de Häaschoa: Daut Fausten aum vieeden un daut Fausten aum feften un daut Fausten aum säwenden un daut Fausten aum 10-den Moonat woat däm Hus Juda toom Fräd un Freid un to frooe Fasttieden woaren. Doch leeft de Woarheit un däm Fräd.

²⁰Soo sajcht Gott de Häaschoa: Daut woat noch passieren, daut Velkja un Bewona ut väl Städa komen woaren;

²¹un de Bewona dee eene Staut gonen woaren no de aundre un sajen: «Lot ons doch hangonen, om däm Harn auntoroopen un däm Gott de Häaschoa too säkjen!» - «Uk ekj well gonen!»

²²Un väl Velkja un majchtje Nazionen woaren komen, om Gott de Häaschoa en Jerusalem too sieekjen un ver däm Harn too bedden.

²³Soo sajcht Gott de Häaschoa: En jane Doag, doa woaren 10 Mana ut aulalei Sproaken de Nazionen aunjriepen, jo, jriepen woaren see de Rockakj von eenem judischen Maun un sajen: Wie wellen met junt gonen, dan wie ha jehieet, daut Gott met junt es.