Read De Bibel JHF Sacharja 9 Bible Online

Sacharja 9 - De Bibel JHF bible

Sacharja 9

¹Utspruch vom Wuat Gottes äwa daut Launt Hadrach; un opp Damaskus lat hee sikj rauf (dan de Har haft een Uag opp de Menschen un opp aule Stam Israels),

²un uk opp Hamat, daut doaraun jrenst, opp Tierus un Sidon, wiels daut sea weis es.

³Un Tierus haft sikj eene Fastinj jebut un Selwa jesaumelt aus Stoff, un Golt aus Drakj oppe Gaussen.

⁴Kjikj, de Har woat daut ennämen un siene Macht [Rikjtum] oppem Mäa schlonen (schmieten); un daut selfst woat vom Fia vebrent woaren.

⁵Askalon saul daut seenen un sikj ferchten; uk Gasa, un saul sea zetren, un Ekron, dan siene Hopninj es too Schaund jeworden. Un de Kjennich ut Gasa woat vetilcht, un Askalon woat nich mea bewont woaren.

⁶Un een framda Harscha woat en Aschdod wonen, un ekj woa dän Huachmoot de Filista utroden.

⁷Un ekj woa sien Bloot ut sienem Mul wajchdoonen un sien Aufschu tweschen siene Tänen wajch; un uk hee woat äwabliewen fa onsem Gott, un woat aus een Ferscht en Juda sennen, un Ekron aus de Jebusita.

⁸Un ekj woa fa mien Hus een Loaga oppschlonen ver däm Kjrichshäa, ver dän Han- un Häa trakjen, un kjeen Bedrenja woat mea äwa an komen; dan nu ha ekj daut jeseenen met miene Uagen.

⁹Jubel lud, Dochta Zion; juch, Dochta Jerusalem! Kjikj, dien Kjennich woat no die komen: Jerajcht un een rada es hee, deemootich un opp eenem Esel riedent, un zwoa opp eenem Falm, eenem Jungen de Eselin.

¹⁰Un ekj woa de Woages utroden ut Efraim un de Pieed ut Jerusalem, un de Kjrichsboagen woat utjerot woaren. Un hee woat en Fräd räden to de Nazionen; un siene Harschoft woat vom Mäa bat toom Mäa sennen, un vom Stroom bat aun daut Enj de Ieed.

¹¹Un du - om daut Bloot von dienem Bundeswelle entlot ekj uk diene Jefangne ut de Kul, en dee kjeen Wota es.

¹²Got trigj no de Fastinj, jie Jefangne, dee jie nich hopninjsloos sent! Aul vondoag vekjindj ekj, daut ekj die daut Dobbelde vejelten woa {Jes.61,7}.

¹³Dan ekj ha mie Juda jespaunt, däm Boagen met Efraim jefelt [aus Feilasch]; un ekj wakj diene Säns, Zion, opp jäajen diene Kjinja, Griechenlaunt, un moak die aus daut Schwieet von eenem Held.

¹⁴Un de Har woat äwa an erschienen, un sien Feila woat utfoaren aus de Blitz; un de Har, Gott, woat en de Posaun steeten un omhäa trakjen em Storm vom Sieden.

¹⁵Gott de Häaschoa woat an bewoaren; un see woaren de Schliesasteena äten un dolklunjen; un see woaren drinkjen, lud sennen aus vom Wien un voll woaren aus de Opfakomm, aus de Akjen aum Aultoa.

¹⁶Un de Har, äa Gott, woat an raden aun janem Dach, woat sien Volkj raden aus eene Häad; dan see sent Kroonsteena, jlensent opp sienem Launt.

¹⁷Dan woo groot es sien Bastet, un woo groot siene Scheenheit! Daut Jeträajd woat Jinjlinje un de junga Wien Junkfrues waussen loten.