Read De Bibel JHF Maleachi 2 Bible Online

Maleachi 2 - De Bibel JHF bible

Maleachi 2

¹Un nu, jie Priesta, aun junt jeit dit Jeboot ut!

²Wan jie nich hieren, un wan jie daut nich too Hoaten nämen, mienem Nomen Iea to jäwen, sajcht Gott de Häaschoa, soo woa ekj däm Fluch unja junt schekjen, un june Säajnungen vefluchen; jo, ekj ha dee uk veflucht, wiels jie daut nich too Hoaten nämen.

³Kjikj, ekj schell june Sot (Nokomenschoft) un strei junt Mest en daut Aunjesecht, däm Mest von june Faste, un maun woat junt no am handroagen.

⁴Un jie woaren weeten daut ekj dit Jeboot aun junt jeschekjt ha, doamet mien Bunt met Levi es, sajcht Gott de Häaschoa.

⁵Mien Bunt met am wia daut Läwen un de Fräd; un ekj jeef am dee toom Enjste, un hee fercht mie, un hee, hee zettad ver mienem Nomen.

⁶Daut Jesaz de Woarheit wia en sienem Mul, un Orrajcht wia nich opp siene Leppen; hee waundeld met mie en Fräd un opprechtich, un väle brocht hee von äare Ojjerajchtichkjeit trigj.

⁷Dan de Leppen de Priesta sellen Erkjantnis bewoaren, un daut Jesaz sieekjt maun ut (en) sienem Mul, dan hee es een Boote Gottes de Häaschoa.

⁸Oba jie sent aufjegonen von däm Wajch, jie ha väle em Jesaz toom twiewlen jebrocht, jie ha däm Bunt Levi tweijemoakt, sajcht Gott de Häaschoa.

⁹Soo ha uk ekj junt bie däm gaunzen Volkj veacht un läach jemoakt, en däm seljen Mot, aus jie miene Wäaj nich bewoaren un de Persoon aunseenen biem Jesaz {Mi.3,11}.

¹⁰Ha wie nich aula eenen Voda? Haft nich een Gott ons jeschauft? Wuarom haundel wie ontru eena jäajen däm aundren, endäm wie däm Bunt von onse Vodasch entheiljen?

¹¹Juda haft ontru jehaundelt, un een Aufschu es veeewt worden en Israel un en Jerusalem; dan Juda haft daut Heilichtum Gottes entheilicht, daut hee leewd, un es veleeft met de Dochta von eenem framden Gott.

¹²De Har woat däm Maun, dee soowaut deit, ut Jakob sienem Zelt utroden, däm woakenden un däm, dee een Lud von sikj jeft, un däm, dee Gott de Häaschoa eene Opfagow brinjt.

¹³Un tweedens doo jie dit: jie bedakjen däm Aultoa Gottes met Tronen, met Hielen un Seften, soo daut hee sikj nich mea no june Opfagow dreit, noch Goodet ut june Haunt aunnemt.

¹⁴Un jie sajen: Wuarom? Wiels de Har Zeij jewast es tweschen die un de Fru ut diene Jugent, aun däa du ontru jehaundelt hast, doa see doch diene Frindin un de Fru von dienem Bunt es.

¹⁵Un haft nich eena an jemoakt? Un sien wia daut Äwaje vom Jeist. Un waut socht de eena? Hee socht eenen Somen Gottes. Soo heed junt en junem Jeist, un haundel nich ontru jäajen de Fru - diene Jugent!

¹⁶Dan ekj hauss Entlotunk (Ehescheeden), sajcht de Har, de Gott Israels; un hee bedakjt met Jewault sien Kjleet, sajcht Gott de Häaschoa. Soo heed junt en junem Jeist, daut jie nich ontru haundlen!

¹⁷Jie ha däm Harn met june Wieed meed jemoakt; un jie sajen: Met waut ha wie am meed jemoakt? Doamet, daut jie sajen: Jiedra dee Iebel deit es goot en de Uagen Gottes, un aun an haft hee Jefaulen; ooda woa es de Gott vom Jerecht?