Read De Bibel JHF Matäus 11 Bible Online

Matäus 11 - De Bibel JHF bible

Matäus 11

¹Un daut wia soo, aus Jesus siene Aunwiesunk (Befälen) aun siene 12 Jinja verecht haud, jinkj hee von doa wieda, om to lieren un to prädjen en äare Städa.

²Doa oba Johanes em Jefenkjnis von Christus siene Woakjen hieed, schekjt hee siene Jinja

³un leet am sajen: Best du, dee doa komen sull, ooda sell wie no (opp) eenen aundrem luaren?

⁴Jesus auntwuad un säd to an: Got han un sajcht to Johanes, waut jie seenen un hieren:

⁵De Blinje kjennen seenen un de Lome gonen, de Utsauzje woaren rein un de Doowe kjennen hieren, un Doodes stonen opp un de Oame woat daut Evangelium jeprädicht;

⁶un seelich es, dee sikj nich aun mie oajat (twiewelt).

⁷Aus see trigj jinjen, funk Jesus aun, to daut Volkj to räden, von Johanes: Waut sent jie utjegonen enne Wieste to seenen? Een Rua to seenen, daut vom Wint han un häa bewäacht woat?

⁸Ooda waut sent jie rutjegonen to seenen? Eenen Mensch, met saunfte [Kjleeda] jekjleet? Kjikjt, dee doa saunfte Kjleeda droagen, sent en Kjennichs Hiesa.

⁹Ooda waut sent jie rutjegonen to seenen? Eenen Profeet? Jo, ekj saj junt, mea aus eenen Profeet.

¹⁰Dan disa es daut, von däm jeschräwen steit: «Kjikjt, ekj schekj mien Enjel (Boote) die veropp, dee dien Wajch ver die reed moaken saul». {Mal.3,1}

¹¹En Woarheit saj ekj junt, dee von Frues jebuaren sent, es kjeen jratra oppjestonen aus Johanes de Deepa; oba de Kjlansta em Himmelrikj es jrata aus hee.

¹²Oba von de Doag Johanes däm Deepa bot nu litt daut Himmelrikj Jewault, un dee Jewault eewen, dee rieten daut no sikj.

¹³Dan aule Profeeten un daut Jesaz haben profezeit bot Johanes.

¹⁴Un (wan jie daut wellen aunnämen) hee es Elia, dee komen sull.

¹⁵Wäa Uaren haft, toom hieren, dee hia.

¹⁶Met wäm saul ekj oba dit Jeschlajcht vejlikjen? Daut es de Kjinja to vejlikjen, dee aum Moakjtplauz setten un roopen äare Jäajna too

¹⁷un sajen: Wie ha [junt] jepiept, un jie ha nich jedaunzt; wie ha [junt] kloagen Leida jesungen, un jie deeden nich hielen.

¹⁸Johanes kjeem, deed nich äten un nich drinkjen; un see sajen: Hee haft dän Diewel.

¹⁹De Menschensän es jekomen, at un drinkjt, un see sajen: Kjikjt, [een Mensch], een Fräta un Wiensupa, de Zollmana un de Sinda äa Frint; un de Weisheit es jerajchtfoadicht jeworden von äare Kjinja.

²⁰Donn funk hee aun, de Städa to schellen, wua hee de mieeschte Woakjen (Wunda) jedonen haud, un hauden sikj doch nich bekjieet (Busse jedonen):

²¹Wee die, Chorazin! Wee die, Betsaida! Wieren de Woakjen en Tierus un Sidon passieet, dee unja junt passieeden, see hauden lenjst en Sak un en Ausch Busse jedonen (sikj bekjieet).

²²Doch saj ekj junt: dautet woat fa Tierus un Sidon leichta sennen aum Jerechtsdach aus junt.

²³Un du, Kapernaum, dee du bot aum Himmel nohecht jehowen best, du woascht bot enne Hal rauf jestat woaren. Dan wan en Sodom dee Woakjen jedonen wieren, dee bie die sent jedonen worden, daut wia jebläwen bat aum vondoagschen Dach.

²⁴Doch saj ekj junt, daut woat däm Launt Sodom leichta sennen aum Jerechtsdach aus die.

²⁵Too de Tiet auntwuad Jesus un säd: Ekj veharlich (dank) die, Voda, Har äwa Himmel un Ieed, daut du dit fa de Weise un Klucke (Vestendje) vestoaken hast, un hast daut kjliene Kjinja jeopenboat;

²⁶Jo, Voda; dan aulsoo wia daut wooljefaulen ver die.

²⁷Aule Dinj sent mie äwajäft von mienem Voda. Un kjeena kjant dän Sän aus blooss de Voda; un kjeena kjant däm Voda buta de Sän, un wämemma de Sän daut openboaren well.

²⁸Komt häa no mie aula, dee jie Mieej ha un beloden sent; ekj well junt Ru jäwen (brinjen).

²⁹Nämt opp junt mien Joch un lieet von mie; dan ekj sie Saunftmootich un von Hoaten deemootich; soo woa jie Ru finjen fa june Seelen.

³⁰Dan mien Joch es saunft, un miene Laust es leicht.