Read De Bibel JHF Matäus 15 Bible Online

Matäus 15 - De Bibel JHF bible

Matäus 15

¹Donn kjeemen de Schreftjelieede un Farisäa von Jerusalem no Jesus un säden:

²Wuarom äwaträden diene Jinja de Eltestasch äare Väaschreften? Dan see wauschen äare Henj nich, wan see Broot äten.

³Hee oba auntwuad un säd to an: Wuarom äwaträden uk jie Gott sien Jeboot wäajen june Väaschreften?

⁴Dan Gott haud befoolen un jesajcht: «Iea däm Voda un de Mutta!» {2Mo.20,12} un: «Wäa Voda ooda Mutta flieekjt (schlacht räden), dee saul metem Doot stoawen». {2Mo.21,17}

⁵Oba jie sajen: Wäa toom Voda ooda Mutta sajcht: Eene Gow es daut, waut die von mie toom nutzen komen kaun; un hee woat niemols sienen Voda ooda siene Mutta ieren;

⁶un jie ha doamet Gott sien Jeboot tonuscht jemoakt wäajen june Väaschreften.

⁷Heichla! Jesaja haft gaunz rajcht äwa junt jeprofezeit, doamet hee sajcht:

⁸«Dit Volkj ieet mie met äare Leppen, oba äa Hoat es wiet auf von mie.

⁹Vejäfs oba äare see mie, doamet see aus Lia, Menschenjebooten lieren». {Jes.29,13}

¹⁰Un hee roopt daut Volkj no sikj un säd to an: Horcht un vestot!

¹¹Nuscht waut em Mul nenjeit, veonreinicht däm Mensch, oba daut waut utem Mul rut kjemt, daut veonreinicht däm Mensch.

¹²Donn kjeemen de Jinja un säden to am: Weetst du, daut de Farisäa sikj oajren, aus dee daut Wuat hieeden?

¹³Hee oba auntwuad un säd: Aule Plaunten, dee mien himlischa Voda nich jeplaunt haft, woaren utjeräten woaren.

¹⁴Lot an, dee sent blinje Leida de Blinje. Wan oba een Blinja eenen Blinjen leit, soo woaren beid em Growe faulen.

¹⁵Petrus oba auntwuad un säd to am: Died ons dit Jlikjnis.

¹⁶Hee oba säd: Se jie uk noch soo onvestendich?

¹⁷Bejriep jie noch nich, daut aules, waut em Mul nenjeit, em Buck jeit un jeit dan sienen Gank rut?

¹⁸Oba waut utem Mul rut kjemt, kjemt utem Hoat, un daut veonreinicht däm Mensch.

¹⁹Dan utem Hoat komen beese Jedanken, Mort, Ehebruch, Huararie, Deefarie, {em Griechischen sent de Wieed von Mort bat Deefarie en Meazol} faulsche Zeijnise, Lastren;

²⁰dit sent de Dinj, dee een Mensch veonreinjen, oba met onjewoschne Henj äten veonreinicht däm Mensch nich.

²¹Un Jesus jinkj von doa wajch un jinkj no de Jäajent von Tierus un Sidon;

²²un kjikj, eene kanaanitische Fru, dee von jane Jäajent häa kjeem, schrieech [to am] un säd: Erboarm die äwa mie, Har, David sien Sän! Miene Dochta es schlemm besäten.

²³Oba hee jeef äa kjeene auntwuat, nich een Wuat. Un siene Jinja kjeemen no am un prachaden am un säden: Lot äa gonen, dan see schricht ons hinjaraun.

²⁴Hee oba auntwuad un säd: Ekj sie nich jeschekjt, aus blooss no de veloarne Schop vom Hus Israel.

²⁵Oba see kjeem un kjneed (foll) sikj ver am un säd: Har, halp mie!

²⁶Hee oba auntwuad un säd: Daut es nich goot, daut Broot von de Kjinja to nämen un de Hunj hantoschmieten.

²⁷See oba säd: Jo, Har; oba de Hunj äten uk de Kjreemels, dee vom Desch äara Haren faulen.

²⁸Donn auntwuad Jesus un säd to ar: Oo Fru, dien Gloowen es groot; du saust ha, soo aus du (habe) west. Un äare Dochta wia jeheelt von de Stund aun.

²⁹Un Jesus jinkj von doa wajch un kjeem nom galiläischen See (Mäa); un aus hee opp een Boajch jegonen wia, un sad sikj doa dol.

³⁰Un väl Volkj kjeem no am, dee hauden Lome, Blinje, Stomme, Kjräpels un väl aundre bie sikj, un see läden am dee vere Feet; un hee heeld dee,

³¹soo daut de Volkjsmenj sikj vewundad, aus see sagen, daut de Stomme räden, Kjräpels jesunt worden, Lome jinjen un Blinje kunnen seenen; un see veharlichten Israel äa Gott.

³²Aus Jesus oba siene Jinja no sikj jeroopt haud, säd hee: Ekj sie ennalich bewäacht äwa aul dit Volkj; dan aul dree Doag sent dee hia bie mie un ha nuscht to äten; un ekj well an nich wajch schekjen, onen daut dee jejäten ha, daut dee nich oppem Wajch veschmachten.

³³Un siene Jinja säden to am: Wua sell wie en dise onbewonde Jäajent soo väl Broot häa nämen, om soo väl Menschen saut too moaken?

³⁴Un Jesus säd to an: Wooväl Brood ha jie? See oba säden: 7, un een poa (weinich) kjliene Fesch.

³⁵Un hee befool daut Volkj sikj oppe Ieed doltosaten.

³⁶Un hee neem de 7 Brood un de Fesch, dankt un bruak de twei un jeef daut siene Jinja, un de Jinja oba jeewen daut däm Volkj.

³⁷Un dee auten aula un worden saut; un see hoowen opp, waut äwa bleiw aun Brocken, (wia) 7 Kjarw voll.

³⁸Dee oba jejäten hauden, wieren 4 000 Maun, onen Frues un Kjinja.

³⁹Un aus hee daut Volkj haud gonen loten, stieech hee en daut Schepp, un kjeem no de Magdala Jäajent.