Read De Bibel JHF Matäus 16 Bible Online

Matäus 16 - De Bibel JHF bible

Matäus 16

¹Un de Farisäa un Saduzäa kjeemen no am, om am to vesieekjen, un see bedden am, hee sull an een Tieekjen vom (utem) Himmel wiesen.

²Oba hee auntwuad un säd to an: Wan daut Owent jeworden es, soo saj jie: Daut jeft scheenet Wada, dan de Himmel es root;

³un zemorjes (saj jie): Vondoag jeft et schlajchtet Wada, dan de Himmel es fiaroot un dunkel; (jie Heichla) daut utseenen aum Himmel kjenn jie dieden, oba de Tieekjens von de Tiet kjenn jie nich dieden.

⁴Een beeset un ehebräakjarischet Jeschlajcht velangt een Tieekjen, oba kjeen Tieekjen woat an jejäft woaren, buta daut Tieekjen (von däm Profeet) Jona. Un hee veleet an un jinkj wajch.

⁵Un aus siene Jinja nom aundren Eewa kjeemen, hauden see vejäten, Broot met too nämen.

⁶Jesus oba säd to an: Paust opp un heed junt fa de Farisäa un Saduzäa äa Suadieech.

⁷See oba äwaläden bie sikj un säden: Daut wie kjeen Broot met jenomen ha.

⁸Oba aus Jesus daut moakjt, säd hee: Wuarom äwalaj jie bie junt, jie Kjliengloowsche, daut jie kjeen Broot met jenomen ha?

⁹Vesto jie noch nich, denkjt jie uk nich aun de fief Brood fa de 5 000, un wooväl Kjarw jie opp saumelden?

¹⁰Uk nich aun de 7 Brood fa de 4 000, un wooväl Kjarw jie doa opp saumelden? {Kap.14,20; 15,37}

¹¹Woo vesto jie nich, daut ekj to junt nich von Broot räd? Heet junt fa de Farisäa un Saduzäa äa Suadieech.

¹²Donn vestunden see, daut hee nich jesajcht haud, sikj väatoseenen fa däm Suadieech em Broot, oba von de Farisäa un Saduzäa äare Lia.

¹³Oba aus Jesus no de Cäsarea Filippi Jäajent kjeem, fruach hee siene Jinja, un säd: Wäa sajen de Menschen, daut ekj de Menschensän sie?

¹⁴See oba säden: Eenje (sajen): Johanes de Deepa; aundre oba: Elia; un aundre wada: Jeremia, ooda eena von de Profeeten.

¹⁵Hee säd to an: Jie oba, wäa saj jie, daut ekj sie?

¹⁶Simon Petrus oba auntwuad un säd: Du best de Christus, däm läwendja Gott sien Sän.

¹⁷Un Jesus auntwuad un säd to am: Seelich best du, Simon, Jonas Sän; dan Fleesch un Bloot ha die daut nich jeopenboat, oba mien Voda, dee em Himmel es.

¹⁸Oba uk ekj saj die, daut du best Petrus; (een Steen) un opp däm Steen well ekj miene Jemeent (Vesaumlunk) buen, un de Puaten vonne Hal woaren dee nich unja (äwahaunt) kjrieen.

¹⁹Un ekj woa die de Schlätels fa daut Himmelrikj jäwen; un wautemma du oppe Ieed binjen woascht, woat uk em (enne) Himmel jebungen sennen, un wautemma du oppe Ieed leesen woascht, daut woat em (enne) Himmel jeleest sennen.

²⁰Donn woarnd hee siene Jinja, daut see kjeenem sajen sullen, daut hee de Christus (Jesaulwda) es.

²¹Von de Tiet funk Jesus aun siene Jinja to wiesen, daut hee no Jerusalem gonen must un von de Eltestasch un Huagapriesta un Schreftjelieede väl lieden, un doot jemoakt un aum dredden Dach oppstonen (oppjewakjt) woat.

²²Un Petrus neem am auntsied un funk aun, am hoat aun to räden, un säd: Gott bewoa die, Har! Daut saul die nich passieren.

²³Oba hee dreid sikj om un säd to Petrus: Go hinja (von) mie, Soton! Du best mie een Oajanis, dan du denkjst nich jeistlich (aus Gott), oba menschlich.

²⁴Donn säd Jesus to siene Jinja: Wan irjentwäa mie nofoljen well, dee saul sikj von sikj selfst aufsajen un nemt sien Kjriez opp sikj un kjemt mie no.

²⁵Dan wäa emma sien Läwen (Seel) raden well, woat daut velieren; un wäa emma sien Läwen velieren woat om mient haulwen, woat daut finjen.

²⁶Dan waut woat een Mensch daut nutzen, wan hee de gaunze Welt jewent, oba siene ieejne Seel velist? Ooda waut woat een Mensch em Tusch jäwen fa siene Seel?

²⁷Dan de Menschensän woat {Kap.17,12.22} komen en däm Voda siene Harlichkjeit met siene Enjel, un dan woat hee eenem jiedrem beloonen no sienem Waundel.

²⁸En Woarheit saj ekj junt: Daut sent eenje von dee, dee hia stonen, dee dän Doot nich schmakjen woaren, bot see dän Menschensän woaren komen seenen en sienem Rikj.