Read De Bibel JHF Matäus 19 Bible Online

Matäus 19 - De Bibel JHF bible

Matäus 19

¹Un daut wia, aus Jesus met dise Räd foadich wia, veleet hee Galiläa un kjeem en de Judäa Omjäajent, jantsied vom Jordan.

²Un väl Volkj kjeem am hinjaraun, un hee heeld an doa.

³Un de Farisäa kjeemen no am, vesochten am un säden: Eset eenem Maun erlaubt, aus irjent eene Uasoak siene Fru to entloten (wajch schekjen)?

⁴Hee oba auntwuad un säd [to an]: Ha jie nich jeläst, daut dee, dee an jeschaufen haft, von Aunfank, an, aus Maun un Fru muak {1Mo.1,27; 5,2},

⁵un säd: «Doarom woat een Mensch Voda un Mutta veloten un aun siene Fru hoolen (eent sennen), un dee twee woaren een Fleesch sennen» {1Mo.2,24}

⁶soo daut see nich mea twee sent, oba een Fleesch? Waut Gott toop jefieet haft, saul de Mensch nich scheeden.

⁷See säden to am: Wuarom haud Moses befoolen, een Scheedungsbreef to jäwen un [äa] gonen loten?

⁸Hee säd to an: Moses haud wäajen june hoade Hoaten junt daut toojeloten, june Frues gonen tooloten; oba von Aunfank es daut nich soo jewast.

⁹Ekj saj junt oba, daut, wäa emma siene Fru tochloten (wajch schekjen) woat, buta wäajen Huararie, un ne aundre frieen woat, dee brakjt de Ehe; un wäa eene entlotne frieen woat, brakjt de Ehe.

¹⁰Siene Jinja säden to am: Wan de Flicht tweschen Maun un siene Fru soo es, dan es daut bäta nich too befrieen.

¹¹Oba hee säd to an: Nich aule kjennen dit Wuat foten (bejriepen), blooss dee, dän daut jejäft es,

¹²dan daut jeft Veschnädne, dee utem Muttalief soo jebuaren sent; un daut sent Veschnädne, dee von Menschen veschnäden sent; un daut jeft Veschnädne, dee sikj selfst veschnäden ha om daut Himmelrikjs wellen. Wäa daut foten kaun, dee fot daut.

¹³Donn worden Kjinja no am jebrocht, om daut hee an de Henj opplajen un äwa an bäden sull; oba de Jinja schullen an.

¹⁴Oba Jesus säd: Lot de Kjinja un wäat dän nich, no mie to komen, dan fa soone es daut Himmelrikj.

¹⁵Un hee läd an de Henj opp un jinkj von doa wajch.

¹⁶Un kjikj, eena kjeem no am un säd: Liera, waut fa goodet saul ekj doonen, om daut ekj daut eewje Läwen kjrieen kaun?

¹⁷Oba hee säd to am: Waut frajchst du mie nom Gooden? Eena es Goot. Wan du oba en daut Läwen nengonen west, dan hool de Jebooten.

¹⁸Hee säd to am: Woone? Oba Jesus säd: Dise: Du saust nich dootmoaken; du saust nich de Ehe bräakjen; du saust nich stälen; du saust nich faulschet Zeichnis jäwen;

¹⁹iea Voda un Mutta, un; du saust dien Noba (Näakjsten) leef ha aus die selfst.

²⁰De junga Maun säd to am: Ekj ha daut aules jehoolen, waut fält mie noch?

²¹Jesus säd to am: Wan du west vollkomen sennen, dan go, vekjeep dien Hab un Goot un jeff de Oame daut, un du woascht een Schauz em Himmel ha; un komm, folj mie no.

²²Oba aus de junga Maun de Wieed hieed, jinkj hee truarich wajch, dan hee haud väl Habgoot.

²³Jesus oba säd to siene Jinja: Woarhauftich, ekj saj junt: Schwoa woat een Rikja en daut Himmelrikj nengonen.

²⁴Oba wada saj ekj junt: Daut es leichta, daut een Kameel derch een Noteluag nenjeit, aus een Rikja en Gott sien Rikj [en jeit].

²⁵Oba aus de Jinja daut hieeden, wieren see sea erstaunt un säden: Wäa kaun dan jerat (seelich) woaren?

²⁶Jesus oba kjikjt an aun un säd: Bie Menschen es daut ommäajlich, oba bie Gott es (sent) aules (Dinj) mäajlich.

²⁷Donn auntwuad Petrus un säd to am: Kjikj, wie ha aules veloten un sent die nojefolcht; waut ha (kjrie wie) wie doafäa?

²⁸Oba Jesus säd to an: Woarhauftich, saj ekj junt: Jie, dee jie mie sent nojefolcht, jie woaren uk en de Wadajeburt, wan de Menschensän setten woat opp sienen Troon enne Harlichkjeit, uk opp 12 Troons setten un de 12 Stamm (Jeschlajchta) Israel rechten.

²⁹Un jieda, wäa emma veloten haft Hiesa, ooda Breeda, ooda Sestren, ooda Voda, ooda Mutta, ooda Fru, ooda Kjinja, ooda Launt om mienen Nomen haulwen, woat 100-mol mea kjrieen, un eewjet Läwen oawen.

³⁰Oba väle Ieeschte woaren de Latste, un Latste de Ieeschte sennen.