Read De Bibel JHF Matäus 2 Bible Online

Matäus 2 - De Bibel JHF bible

Matäus 2

¹Aus Jesus, en Betlehem em judischen Launt, jebuaren wia, en de Tiet aus Herodes Kjennich wia, kjeemen vom Oosten (utem Morjenlaunt) Stiernforscha no Jerusalem, un säden:

²«Wua es de Kjennich äwa de Juden, dee jebuaren es? Dan wie ha sien Stiern em Morjenlaunt jeseenen, un sent jekomen, am auntobäden».

³Aus Kjennich Herodes daut hieed, wia hee erschrakjt un gaunz Jerusalem met am.

⁴Un hee vesaumeld aule Huagapriesta un Schreftjelieede utem Volkj, un forscht no, wua de Christus jebuaren woaren sull.

⁵See oba säden to am: En Betlehem en Judäa; dan aulsoo steit derch dän Profeet jeschräwen:

⁶«Un du Betlehem, em Judischen Launt, du best nich de jerinjsta unja de Firste (Harscha) en Judäa; dan ut die woat een Harscha häa komen, dee mien Volkj Israel weiden woat». {Mi.5,1}

⁷Donn roopt Herodes de Stiernforscha heemlich, un forscht an jeneiw ut no de Tiet wanea de Stiern verendach jekomen wia;

⁸un hee schekjt an no Betlehem, un säd: Got un forscht jeneiw no daut Kjint; un wan jie daut jefungen ha, dan sajcht mie daut, doamet uk ekj kom om daut auntobäden.

⁹See oba, aus see däm Kjennich jehieet hauden, jinjen see han. Un kjikj, de Stiern, dän see em Morjenlaunt jeseenen hauden, jinkj ver an, bat et äwa de Städ stonen bleef, wua daut Kjint wia.

¹⁰Aus see oba däm Stiern sagen, freiden see sikj sea.

¹¹Un see kjeemen en daut Hus nenn, un sagen daut Kjint met Maria, siene Mutta, un see follen ver am han, un bäden daut (Kjint) aun, un see muaken äaren Schauz op, un opfaden am Jeschenkja: Golt, un Weiruak, un Miren.

¹²Un aus see em Droom (von Gott) jewoarnt worden, nich trigj no Herodes to gonen, reisden see opp eenen aundren Wajch en äa Launt.

¹³Aus see oppem Trigjwajch wieren, kjeem däm Har sien Enjel no Josef em Droom un säd: Sto opp, nemm daut Kjint un siene Mutta no die un ran no Ägipten, un bliew doa, bot ekj die sajen woa; dan Herodes woat daut Kjint sieekjen, om daut omtobrinjen.

¹⁴Hee stunt opp, neem daut Kjint un siene Mutta, enne Nacht, un reisd no Ägipten.

¹⁵Un hee bleef doa bot Herodes jestorwen wia, om daut erfelt wudd, waut von däm Harn jesajcht es derch dän Profeet, dee doa sajcht: «Ut Ägipten ha ekj mien Sän jeroopt». {Hos.11,1}

¹⁶Herodes wia sea doll, aus hee sach, daut hee von de Stiernforscha hinjagonen wia; un hee schekjt no Betlehem un de gaunze Omjäajent, om aule Junges, von twee Joa un jinja, doottomoaken, no de Tiet, dee hee von de Stiernforscha jeneiw erfoaren (utjeforscht) haud.

¹⁷Doa wort erfelt, waut derch dän Profeet Jeremia jesajcht es, de doa sajcht:

¹⁸«Eene Stemm es en Rama jehieet worden, Hielen un väl Kloagen: Rahel hielt äwa äare Kjinja, un see well sikj nich treesten loten, dan dee sent nich mea». {Jer.31,15}

¹⁹Oba aus Herodes jestorwen wia, kjikj, doa kjeem däm Har sien Enjel, em Droom, no Josef en Ägipten

²⁰un säd: Sto opp, un nemm daut Kjint un siene Mutta, un trakj trigj no daut Launt Israel; dan dee sent jestorwen, de daut Kjint omtobrinjen sochten.

²¹Hee stunt opp, neem daut Kjint un siene Mutta, un kjeem en daut Launt Israel.

²²Aus hee oba hieed, daut Archelaus äwa Judäa rejieed, en sien Voda Herodes siene Städ, haud hee Angst doa han too gonen; un aus hee em Droom jewoarnt wort, jinkj hee en de Jäajent von Galiläa.

²³Un hee kjeem no de Staut, jenant Nazaret; doamet wudd erfelt, waut derch de Profeeten es jesajcht worden: «Hee saul Nazarena jenant woaren».