Read De Bibel JHF Matäus 21 Bible Online

Matäus 21 - De Bibel JHF bible

Matäus 21

¹Un aus see noda no Jerusalem kjeemen un no Betfage kjeemen, aun däm Eeljboajch, schekjt Jesus twee von siene Jinja

²un säd to an: Got en daut Darp, daut ver junt licht; un doa woa jie eene Äselin aunjebungen finjen, un een Falm (Joalinkj) bie äa; binjt de loos un brinjt dee no mie.

³Un wan irjentwäa waut to junt sajcht, dan sell jie sajen: De Har brukt dee, un sooboolt woat hee dee schekjen.

⁴Dit aules oba passieed, om daut erfelt woat, waut derch dän Profeet jesajcht es, dee doa sajcht:

⁵«Sajcht to de Dochta Zion: Kjikjt, dien Kjennich kjemt no die, saunftmootich un toried opp eene Äselin, un oppem Falm, däm Lausttia sienem Jungen». {Sach.9,9}

⁶Aus de Jinja oba han jegonen wieren un jedonen hauden, soo aus Jesus an jesajcht haud,

⁷brochten see de Äselin un daut Falm, un läden äare Kjleeda opp an (doanopp), un hee sad sikj nopp.

⁸Un sea väl Volkj spreeden äare Kjleeda oppem Wajch; aundre oba schneeden Asta vonne Beem un streiden dee oppem Wajch.

⁹Daut Volkj oba, dee ver am hanjinjen un dee hinjaraun kjeemen, schrieejen un säden: Hosiana däm David sienen Sän! Jeloft (jesäajent) es dee, dee doa kjemt em Har sien Nomen! {Ps.118,25.26} Hosiana em hechsten Himmel!

¹⁰Un aus hee en Jerusalem nenn kjeem, de gaunze Staut kjeem en Bewäajunk un säd: Wäa es dit (disa)?

¹¹Daut Volkj oba säd: Dit es Jesus, de Profeet, von Nazaret en Galiläa.

¹²Un Jesus jinkj en dän Tempel Gottes nenn, un juach aule rut, dee em Tempel vekoften, un koften, un de Jeltwakjsla äare Descha un de Benkjen dee doa Duwen vekoften, stelpt hee om.

¹³Un hee säd to an: Daut steit jeschräwen: «Mien Hus saul (woat) een Bädhus jenant woaren»; {Jes.56,7} «oba jie ha daut to eene Reibaheel jemoakt». {Jer.7,11}

¹⁴Un doa kjeemen Blinje un Lome no am em Tempel, un hee heeld an.

¹⁵Oba aus de Huagapriesta un Schreftjelieede de Wunda sagen, dee hee deed, un de Kjinja, dee em Tempel schrieejen un säden: Hosiana däm David sienen Sän! Worden see oajalich

¹⁶un säden to am: Hieescht du, waut dise sajen? Oba Jesus säd to an: Jo, ha jie niemols jeläst: «Ut Kjinjamul un dee aune Muttabrost sent, hast du die een Loff (Rum) reed jemoakt»? {Ps.8,3}

¹⁷Un hee veleet an un jinkj ut de Staut rut no Betanien, un bleef doa äwanacht.

¹⁸Oba tiedich zemorjes, aus hee trigj enne Staut jinkj, hungad am.

¹⁹Un aus hee eenen Fiejenboom aum Wajch sach, jinkj hee nodäm un funk aun am nuscht buta Bläda. Un hee säd to am: Niemols mea saust du Frucht ha en Eewichkjeit! Un plazlich vedrieejd de Fiejenboom.

²⁰Un aus de Jinja daut sagen, vewundaden see sikj un säden: Woo es de Fiejenboom soo haustich (plazlich) vedrieejd?

²¹Oba Jesus auntwuad un säd to an: Woarhauftich, saj ekj junt: Wan jie Gloowen ha un nich twiewlen, soo woa jie nich blooss daut doonen waut met däm Fiejenboom passieed, oba uk wan jie to disem Boajch sajen woaren: Häw die opp un schmiet die em See! Soo woat daut passieren.

²²Un aules, waut jie em Jebäd em Gloowen bedden (froagen, prachren), woa jie kjrieen.

²³Un aus hee em Tempel kjeem, kjeemen no am, aus hee lieed, de Huagapriesta un Eltestasch vom Volkj un fruagen: Derch waut vonne Vollmacht (Rajcht) deist du dise Dinj? Un wäa haft die de Vollmacht jejäft?

²⁴Jesus oba auntwuad un säd to an: Ekj well junt uk ne Froag stalen, un wan jie mie daut sajen, dan woa uk ekj junt sajen, en wäms Vollmacht ekj soowaut doo.

²⁵Johanes sien Deepen, von wua wia dee? Vom Himmel ooda von Menschen? See äwalajde bie sikj selfst un säden: Wan wie sajen: Vom Himmel, dan woat hee too ons sajen: Wuarom ha jie am dan nich jejleeft?

²⁶Oba wan wie sajen: Von Menschen, dan mott wie fa daut Volkj Angst ha, dan aula hoolen Johanes fa een Profeet.

²⁷Un see auntwuaden Jesus un säden: Wie weeten daut nich. Donn säd hee uk to an: Dan saj ekj junt uk nich, en wäm siene Vollmacht ekj dise Dinj doo.

²⁸Oba waut meen jie? Een Mensch haud 2 Kjinja (Säns); un hee kjeem nom ieeschten un säd: Mien Sän, go vondoag, un oabeid en [mienem] Wiengoaden.

²⁹Hee oba auntwuad un säd: Ekj well nich; no häa oba beduad hee daut, un hee jinkj han.

³⁰Un hee jinkj nom tweeden un säd daut selwje (nämelje). Dee oba auntwuad un säd: Ekj go, Har, un jinkj nich han.

³¹Woona von dise beid deed däm Voda sien Wellen? See säden [to am]: De Ieeschta. Jesus säd to an: Woarhauft, saj ekj junt, daut de Zollmana un de Huaren woaren ea en Gott sien Rikj komen aus jie.

³²Dan Johanes kjeem no junt oppem Wajch de Jerajchtichkjeit, un jie jleewden am nich; oba de Zollmana un Huara jleewden am; oba jie (junt), aus jie daut sagen, beduad jie daut nich (deed jie nich Busse), om am to jleewen.

³³Hieet een aundret Jlikjnis. Doa wia een Hushar, dee plaunt een Wiengoaden un bud doa een Tun erom, un groof eene Wienprass, un bud een Torm, un vepacht dän aun Wienbua, un reisd ut däm Launt.

³⁴Aus et oba Tiet wia fa de Frucht, schekjt hee siene Kjnajchts (Sklowen) no de Wienbua, om siene Frucht to kjrieen.

³⁵Oba de Wiengoadna neemen siene Kjnajchts, eenen schluagen see, un aundre muaken see doot, eenen aundren steenijden see.

³⁶Wada schekjt hee aundre Kjnajchts, mea aus verhäa; un see behaundelden dee krakjt soo.

³⁷Oba tolatst schekjt hee sien Sän no an, un säd: See woaren fa mienem Sän Respakjt ha!

³⁸Oba aus de Wienbua däm Sän sagen, säden see unjarenaunda: Dit es de Oaw; komt, lot ons am dootmoaken un sien Oawgoot nämen!

³⁹Un see neemen am, schmeeten am ut dän Wiengoaden rut un muaken am doot.

⁴⁰Wan nu de Har von dän Wiengoaden kjemt, waut woat hee met dee Wienbua doonen?

⁴¹See säden to am: Hee woat de beese Mana ombrinjen, un dän Wiengoaden woat hee aun aundre Wienbua vepachten, dee am de Frucht aufjäwen woaren to siene Tiet.

⁴²Jesus säd to an: Ha jie noch niemols enne Schreft jeläst: «Den Steen, däm de Bulied wajch schmeeten, dee es toom Akjsteen jeworden; von (derch) däm Harn es daut jeworden, un hee es Wundaboa en onse Uagen?» {Ps.118,22.23}

⁴³Doa wäajen saj ekj junt: Daut Gott sien Rikj woat von junt wajch jenomen un eene Nazion jejäft woaren, dee de Frucht brinjen woat.

⁴⁴Un wäa opp disem Steen fält, woat veschmatat woaren; oba opp wäm hee faulen woat, däm woat hee vemolen.

⁴⁵Un aus de Huagapriesta un de Farisäa siene Jlikjnisen jehieet hauden, erkjanen see, daut hee von an räd.

⁴⁶Un aus see sochten om am fausttonämen, oba see enjsten sikj fa daut Volkj, dan dee hilden am fa eenen Profeet.