Read De Bibel JHF Matäus 23 Bible Online

Matäus 23 - De Bibel JHF bible

Matäus 23

¹Donn räd Jesus toom Volkj un to siene Jinja

²un säd: De Schreftjelieede un de Farisäa ha sikj opp Moses sien Stool jesat.

³Aules, waut see to junt sajen, doot un hoolt daut, oba doot nich äare Woakjen, dan see sajen (lieren) un doonen et nich.

⁴See binjen oba schwoare un schwoa to droagende Lausten opp, un lajen de oppe Menschen äare Schulren, oba see wellen dee nich met äarem (eenem) Finja bewäajen.

⁵See doonen aul äare Woakjen, om sikj ver Menschen seenen to loten; dan see moaken äare Denkjzadels {5Mo.6,8; 11,18} breet, un moaken de Soom aun äare Kjleeda {4Mo.15,37-39} groot.

⁶See leewen oba däm ieeschten Plauz bie de Moltieden un ieeschte Städen enne Sienagogen

⁷un daut Jreesen opp de Moakjts un von de Menschen Rabi, Rabi (Liera)! Jenant to woaren.

⁸Oba jie sellen junt nich Rabi nanen, dan eena es jun Liera, oba jie aula sent Breeda.

⁹Jie sellen uk kjeenem oppe Ieed jun Voda nanen; dan eena es jun Voda, dee em Himmel es.

¹⁰Lot junt uk nich Meista (Liameista) nanen; dan eena es jun Meista (Liameista), dee Christus.

¹¹De Jratsta oba unja junt saul jun Deena sennen.

¹²Oba wäa emma sikj selfst groot moaken woat, woat raufjesat woaren; un wäa emma sikj selfst raufsaten woat, woat grootjemoakt woaren.

¹³Oba wee junt, Schreftjelieede un Farisäa, Heichla! Dan jie veschluten daut Himmelrikj fa de Menschen; dan jie gonen nich nenn, jie loten uk dee doa nengonen wellen nich nenn.

¹⁴[Wee junt, Schreftjelieede un Farisäa, jie Heichla, daut jie de Wätfrues äare Hiesa fräten un toom Schien lang bäden. Doarom woa jie een schwandret Jerecht kjrieen!]

¹⁵Wee junt, Schreftjelieede un Farisäa, Heichla! Dan jie derchreisen See (Mäa) un drieejet Launt, om eenen Proselieten (een Framda dee toom Judengloowen kjemt) to moaken (jewennen); un wan hee daut jeworden es, soo moak jie am toom Halensän, twee Mol oaja aus jie.

¹⁶Wee junt, blinje Wajchwiesa (Fiera)! Dee jie sajen: Wäa emma biem Tempel (Heilichtum) schwieren woat, daut es nuscht; oba wäa biem Golt em (aum) Tempel schwieren woat, es schuldich (däm Eit to hoolen).

¹⁷Jie Noaren un Blinje! Waut es dan jrata, daut Golt, ooda de Tempel, de daut Golt heilicht?

¹⁸Un: Wäa emma biem Aultoa schwieren woat, daut es nuscht; oba wäa bie de Gow (Opfa) schwieren woat, dee opp am (Aultoa) es, es schuldich.

¹⁹Jie Blinje! Waut es jrata, de Gow ooda de Aultoa, dee de Gow heilicht?

²⁰Wäa emma biem Aultoa schwieet, schwieet doa äwa un bie aulem, waut opp am es.

²¹Un wäa biem Tempel schwieet, schwieet bie am (Gott) un bie däm, dee doabennen wont.

²²Un wäa biem Himmel schwieet, schwieet bie Gott sien Troon un bie däm, dee doabowen sett.

²³Wee junt, Schreftjelieede un Farisäa, Heichla! Dan jie jäwen daut 10-de von Mintsplaunt un Dell un Kjämel, un ha de wichtje Dinj vom Jesaz biesied jeloten: Daut Jerecht un daut Erboarmen un däm Gloowen (Tru sennen); dise haud jie doonen sullen un jant nich loten.

²⁴Jie blinje Leida, dee jie de Moschkje rutsieen, oba de Kameelen opp schlucken!

²⁵Wee junt, Schreftjelieede un Farisäa, Heichla! Dee jie daut Butaschte von daut Kuffel un Schiew rein moaken, oba von bennen sent see voll Habjia un Ojjerajchtichkjeit.

²⁶Du blinja Farisäa! Moak ieescht daut Bennaschte von daut Kuffel un Schiew rein, om daut uk daut Butaschte rein woat.

²⁷Wee junt, Schreftjelieede un Farisäa, Heichla! Dan jie sent aus aunjewitte Jräwa, dee von buten schienen straum to sennen, oba von bennen voll Doodje Knoakes un aulahaunt Orreinet sent.

²⁸Aulsoo schien jie uk von buten jerajcht vere Menschen to sennen, oba von bennen se jie voll Heichlarie un Jesazloosichkjeit.

²⁹Wee junt, Schreftjelieede un Farisäa, Heichla! Dan jie buen de Profeeten äare Jräwa un de Jerajchte äare Graufsteena putts jie ut (schmock moaken)

³⁰un sajen: Wieren wie, en onse Vodasch äare Doag jewast (jeläft), dan wudd wie nich Aundeel jenomen ha aun de Profeeten äa Bloot.

³¹Aulsoo jäw jie junt selfst daut Zeichnis, daut jie de Säns, dee sent, dee de Profeeten omjebrocht haben;

³²un jie, moaken june Vodasch äa Mot voll!

³³Jie Schlangen! Jeftjet Schlangen Broodsel! Woo well jie em Jerecht de Hal utem wajch komen?

³⁴Doarom kjikjt, ekj schekj no junt Profeeten un Weise (Mana) un Schreftjelieede; un eenje von dän woa jie ombrinjen un kjriezjen, un eenje von dee woa jie en june Sienagogen priejlen un woaren an vefoljen von eene Staut no de aundre;

³⁵doamet äwa junt kjemt aul äa jerajchtet Bloot, daut oppe Ieed vegoten wort (woat), von däm Abel sien Bloot, däm Jerajchten, bot däm Bloot Secharja, däm Sän von Barachja, däm jie tweschen dän Tempel un Aultoa omjebrocht ha.

³⁶Woarhauftich, ekj saj junt, aul dit woat äwa dit Jeschlajcht komen.

³⁷Jerusalem, Jerusalem, dee du de Profeeten ombrinjst un steenichst, dee no die jeschekjt sent! Woo foaken wull ekj diene Kjinja vesaumlen, soo aus eene Kluck äare Kjikjel vesaumelt unja äare Flichten, un jie ha nich jewult.

³⁸Kjikjt, jun Hus woat junt ladich jeloten woaren;

³⁹dan ekj saj junt: Jie woaren mie von nu aun nich mea seenen, bot jie sajen woaren: «Jesäajent es dee, dee doa kjemt en däm Har sien Nomen!» {Ps.118,26}