Read De Bibel JHF Matäus 27 Bible Online

Matäus 27 - De Bibel JHF bible

Matäus 27

¹Oba aus et zemorjes jeworden wia, hilden de Huagapriesta un Eltestasch utem Volkj een Rot jäajen (wäajen) Jesus, om am omtobrinjen (doot to moaken).

²Un nodäm aus see am jebungen hauden, leiden see am wajch un äwajeewen am aun Pontius Pilatus däm Launtfläaja (Harscha, Stauthoola).

³Aus Judas nu, dee am veroden haud, sach, daut hee veuadeelt wort, deed am daut leet, un hee brocht dee 30 Selwastekja no de Huagapriesta un dän Eltestasch trigj

⁴un säd: Ekj ha jesindicht, endäm ekj oschuldijet Bloot veroden ha. Oba see säden: Waut jeit ons daut aun? Kjikj du too.

⁵Un hee schmeet de Selwastekja em Tempel un jinkj wajch un jinkj han un honk sikj opp.

⁶Oba de Huagapriesta neemen de Selwastekja un säden: Daut es nich erlaubt, dee enne Opfakauss (Tempelkauss) to lajen, wiels daut Blootjelt es.

⁷See hilden oba Rot un koften doamet daut Launt vom Toppmoaka om de Framde to begrowen.

⁸Doarom es (woat) daut Launt bot vondoag daut Blootlaunt (Blootaka) jenant.

⁹Donn wort erfelt, waut derch dän Profeet Jeremia jesajcht es, dee doa säd: See neemen de 30 Selwastekja, dän bestemden Pries, dän see bestemt hauden, von de Säns Israel,

¹⁰un daut jeewen see fa daut Toppmoaka Launt, soo aus de Har mie befoolen haud. {Sach.11,11.12}

¹¹Jesus oba stunt ver däm Launtfläaja. Un de Launtfläaja fruach am un säd: Best du de Kjennich äwa de Juden? Oba Jesus säd to am: Du sajchst et.

¹²Un aus hee von de Huagapriesta un de Eltestasch aunjekloacht wort, auntwuad hee nich.

¹³Donn säd Pilatus to am: Hieescht du nich, wooväl see jäajen die utsajen?

¹⁴Un hee auntwuad am uk nich opp een Wuat, soo daut de Launtfläaja sikj sea vewundad.

¹⁵Oba aum Fast wia de Launtfläaja jewant, däm Volkj eenen Jefangnen loostoloten, wämemma see wullen.

¹⁶See hauden donn oba eenen beriemten Jefangnen, de Barabas heet.

¹⁷Aus see nu vesaumelt wieren, säd Pilatus to an: Wäm well jie, daut ekj junt loosjäwen saul, Barabas ooda Jesus, de Christus jenant woat?

¹⁸Dan hee wist, daut see am (Jesus) ut Aufgonst (Aufgonst) äwajeft hauden.

¹⁹Aus hee oba oppem Rechtastool saut, schekjt siene Fru no am un leet am sajen: Ha du nuscht met janem Jerajchten to doonen; dan väl ha ekj vondoag em Droom wäajen am jeläden.

²⁰Oba de Huagapriesta un de Eltestasch beräden daut Volkj, daut see om Barabas bedden sullen, oba Jesus ombrinjen.

²¹De Launtfläaja oba auntwuad un säd to an: Wäm von dee beid well jie, daut ekj junt loosjäwen saul? Oba see säden: Barabas.

²²Pilatus säd to an: Waut saul ekj dan met Jesus doonen, de Christus jenant woat? See säden aula: Hee saul jekjriezicht woaren!

²³Oba de Launtfläaja säd: Waut haft hee dan beeset jedonen? Oba see schrieejen noch dolla un säden: Hee saul jekjriezicht woaren!

²⁴Aus oba Pilatus sach, daut hee nuscht doonen kunn, dautet välmea een Opprua jeef, neem hee Wota, wosch siene Henj ver daut Volkj un säd: Ekj sie onen Schult aun disem Jerajchten sien Bloot; doot jie no junem wellen.

²⁵Un daut gaunze Volkj auntwuad un säd: Sien Bloot kjemt äwa ons un äwa onse Kjinja.

²⁶Donn jeef hee an Barabas loos; oba Jesus leet hee priejlen (schlonen) un äwajeef am, om daut hee jekjriezicht wort.

²⁷Donn neemen dän Launtfläaja siene Soldoten Jesus met en daut Pretorium (Aumthus, Rechthus) un vesaumelden äwa am de gaunze Schoa;

²⁸un see trocken am ut un neemen am eenen rooden Mauntel (soonen aus de Reema äare Soldoten droagen) om.

²⁹Un see flochten eene Kroon von Dornen un saden am de opp sien Haupt, un jeewen am een Rua en siene Rajchte; un see follen ver am oppe Kjnee un vespotten am un säden: Sie jejreest, Kjennich äwa de Juden!

³⁰Un see spieejen am aun, neemen daut Rua un schluagen am opp sien Haupt.

³¹Un aus see am vespott hauden, trocken see am däm Mauntel ut un trocken am siene ieejne Kjleeda aun; un see leiden am han, om am to kjriezjen.

³²Aus see oba rutjinjen, fungen see eenen Maun von Kiereen, dee Simon heet; disem bedwungen see, daut hee sien Kjriez droagen sull.

³³Un aus see aun eene Städ jekomen wieren, jenant Golgata, daut heet Schädel Städ,

³⁴jeewen see am Wien (Ädikj) {Mark.15,23} met Gaul toopjerieet to drinkjen; un aus hee daut jeschmakjt haud, wull hee daut nich drinkjen.

³⁵Aus see am oba jekjriezicht hauden, vedeelden see siene Kjleeda, doamet see Lessa schmeeten.

³⁶Un see sauten un bewoakten am.

³⁷Un see brochten bowen äwa sien Kopp siene Schult - Schreft: Dit es Jesus, dee Kjennich äwa de Juden.

³⁸Donn worden twee Reiba met am jekjriezicht, eena aune Rajchte un eena aune Linkje.

³⁹Oba dee vebie jinjen lastaden äwa am, doamet see äare Kjap scheddaden

⁴⁰un säden: Dee du däm Tempel dolbrakjst un en dree Doag oppbust, rad die selfst. Wan du Gott sien Sän best, soo komm vom Kjriez rauf.

⁴¹Krakjt soo oba spotten uk de Huagapriesta met de Schreftjelieede un Eltestasch un säden:

⁴²Aundre haft hee jerat, sikj selfst kaun hee nich raden. Hee es Israels Kjennich; soo lot am nu vom Kjriez rauf komen, un wie wellen aun am jleewen.

⁴³Hee vetrud opp Gott, dee rad am nu, wan hee am well (goot es); dan hee säd: Ekj sie Gott sien Sän.

⁴⁴Krakjt soo spotten äwa am uk de Reibasch, dee met am jekjriezicht wieren.

⁴⁵Oba von de saste Stund aun kjeem eene Diestanis äwa daut gaunze Launt bot aun de näajende Stund;

⁴⁶om de näajende Stund oba schrieech Jesus opp met ne lude Stemm un säd: Eli, eli, lema sabachtani? Daut heet: Mien Gott, mien Gott, wuarom hast du mie veloten?

⁴⁷Aus oba atelje von dee doa stunden daut hieeden, säden see: Disa roopt däm Elia!

⁴⁸Un fuaz (plazlich) rand eena von an un neem eenen Schwam, feld dän met Ädikj un stuak däm opp een Ruastock un drenkjt am.

⁴⁹De aundre oba säden: Wacht, lot ons seenen, auf Elia kjemt, am to raden!

⁵⁰Jesus oba schrieech wada met ne lude Stemm un jeef däm Jeist opp.

⁵¹Un kjikj, de Väahank em Tempel (Heilichtum) reet en twee Stekja, von bowen bot unjen; un de Ieed scheddad, un de Steena reeten uteneen,

⁵²un de Jräwa muaken sikj op, un väl Kjarpa von de jestorwne Heilje worden oppjewakjt;

⁵³un dee jinjen no sienem oppstonen (oppwakjen) ut de Jräwa un jinjen en de heilje Staut un weesen sikj väle.

⁵⁴Aus oba de Hauptmaun un dee met am, Jesus bewoakten, daut Ieedbäben sagen un daut, waut passieed, hauden see sea Angst un säden: Woarhauft, disa wia Gottes Sän!

⁵⁵Doa wieren oba väl Frues, dee von wiet tookjikjten, dee Jesus von Galiläa nojefolcht wieren un am jedeent hauden;

⁵⁶mank dän wia Maria Magdalena un Maria, Jakobus un Josef äare Mutta, un de Mutta de Zebedäus Säns.

⁵⁷Aus et oba Owent jeworden wia, kjeem een rikja Maun von Arimatäa, met Nomen Josef, dee uk selfst een Jinja von Jesus wia.

⁵⁸Disa jinkj no Pilatus un bedd om Jesus sien Lief. Donn befool Pilatus, daut am de Lief sull jejäft woaren.

⁵⁹Un Josef neem dän Lief un wekjeld am en reinet, fienet Lienloaken (lienzeichnet Loaken),

⁶⁰un läd am en sien nieet Grauf, daut hee em Steen (Boaj) haud utjehakt; un rold eenen groote Steen aun de Graufdäa un jinkj wajch.

⁶¹Doa wieren oba Maria Magdalena un de aundre Maria, dee jäajenäwa vom Grauf sauten.

⁶²Aum näakjsten Dach oba, dee nom ieeschten Fastdach es, vesaumelden sikj de Huagapriesta un de Farisäa bie Pilatus

⁶³un säden: Har, ons foll bie, daut de Vefiera säd, aus hee noch läwd: No dree Doag sto ekj wada opp (ekj woa oppjewakjt).

⁶⁴Aulsoo befäl, daut et Grauf vesechat woat bat aum dredden Dach, daut nich meteemol siene Jinja komen, am stälen un toom Volkj sajen: Hee es vom Doot oppjestonen; un de latste Vefierunk woat oaja sennen aus de ieeschte.

⁶⁵[Oba] Pilatus säd to an: Jie ha de Wajchta; got han, vesechat daut, soo goot jie kjennen (weeten).

⁶⁶See oba jinjen han un vesechaden, aus see dän Steen vesäajelt hauden, un daut Grauf met de Wajchta.