Read De Bibel JHF Matäus 28 Bible Online

Matäus 28 - De Bibel JHF bible

Matäus 28

¹Oba lot aum Sabat (Sinowent), aus et noch Dunkel wia aum ieeschten Dach (Sindach) enne Wäakj, kjeem Maria Magdalena un de aundre Maria, om daut Grauf to beseenen.

²Un kjikj, doa jeef et een grootet Ieedbäben; dan een Enjel vom Harn kjeem utem Himmel rauf, doahan, un rold däm Steen wajch un sad sikj doa enopp.

³Sien Aunseenen wia soo aus een Blitz, un sien Kjleet witt aus de Schnee.

⁴Oba ut Angst fa am zettaden de Wajchta un worden aus Doodje.

⁵De Enjel oba säd to de Frues: Enjst jie junt nich, dan ekj weet, daut jie Jesus, däm Jekjriezichten, sieekjen.

⁶Hee es nich hia, dan hee es oppjestonen, soo aus hee jesajcht haud. Komt hia, un kjikjt de Städ, wua de Har jeläajen haft,

⁷un got schwind han un sajcht siene Jinja, daut hee vom Doot oppjestonen es; un kjikjt, hee jeit ver junt han no Galiläa, doa woa jie am seenen. Kjikjt, ekj ha junt daut jesajcht.

⁸Un see jinjen schwind vom Grauf wajch en Angst un groote Freid, un randen, daut siene Jinja to vetalen.

⁹Aus see oba hanjinjen, daut siene Jinja to vetalen, kjikj, doa kjeem Jesus an entjäajen un säd: Siet jejreest! See oba kjeemen noda no am, un ommoarmen siene Feet un bäden am aun.

¹⁰Donn säd Jesus to an: Enjst junt nich; got han, sajcht dit miene Breeda, daut see no Galiläa gonen, un doa woaren see mie seenen.

¹¹Aus see oba hanjinjen, kjikjt, doa kjeemen eenje vonne Wajchtasch enne Staut, un vetalden de Huagapriesta aules, waut passieet wia.

¹²Un dee vesaumelden sikj met de Eltestasch un hilden Rot; un see jeewen de Soldoten jenuach Jelt

¹³un säden: Sajcht: Siene Jinja kjeemen enne Nacht un stoole am wajch, aus wie schleepen.

¹⁴Un wan dit däm Launtfläaja to Uaren komen sull, soo woa wie am äwaräden un moaken, daut jie onen Sorjen kjennen sennen.

¹⁵See oba neemen daut Jelt un deeden, soo aus see unjarecht worden. Un dise Räd es bie de Juden vebreet worden bot oppem vondoagschen Dach.

¹⁶De 11 Jinja oba jinjen no Galiläa, opp dän Boajch, wuahan Jesus an bestalt haud.

¹⁷Un aus see am sagen, follen see ver am dol; oba eenje twiewelden.

¹⁸Un Jesus kjeem no an un räd met an un säd: Mie es aule Jewault jejäft em Himmel un oppe Ieed.

¹⁹Got han un moakt aule Nazionen too Jinja, un deept an opp däm Voda un däm Sän un däm Heilja Jeist sienen Nomen,

²⁰un lieet an, aules to bewoaren, waut ekj junt befoolen ha. Un kjikjt, ekj sie bie junt aule Doag (jieda Dach) bot aum Enj de Welt.