Read De Bibel JHF Matäus 4 Bible Online

Matäus 4 - De Bibel JHF bible

Matäus 4

¹Donn wort Jesus vom Jeist enne Wieste jefieet, om doa vom Diewel vesocht to woaren;

²un aus hee 40 Doag un 40 Nachten jefaust haud, donn hungad am.

³Un de Vesieekja kjeem no am un säd: Wan du Gott sien Sän best, dan saj, daut dise Steena sellen Broot woaren.

⁴Hee oba auntwuad un säd: Daut steit jeschräwen: «Nich vom Broot auleen saul de Mensch läwen, oba von jiedrem Wuat, daut ut Gott sien Mul utjeit». {5Mo.8,3}

⁵Donn neem de Diewel am met, en de heilje Staut, un stald am opp de Tempelspetz

⁶un säd to am: Wan du Gott sien Sän best, dan sprinj (schmiet die) hia rauf, dan daut steit jeschräwen: «Hee woat siene Enjel äwa (wäajen) die Befäl jäwen, un dee woaren die oppe Henj droagen, doamet du dien Foot nich aun eenen Steen statst». {Ps.91,11.12}

⁷Jesus säd to am: Wada steitet doa jeschräwen: «Du saust dän Har dien Gott nich oppe Proow stalen». {5Mo.6,16}

⁸Wada neem de Diewel am no een sea huagen Boajch, un wees am aule Rikjs (Kjennichrikjs) oppe Welt un äare Harlichkjeit

⁹un säd to am: Aul dit well ekj die jäwen, wan du ver mie dolfelst un mie aunbäden woascht.

¹⁰Jesus säd to am: Go wajch, (von mie) Soton! Dan daut steit jeschräwen: «Du saust dän Har, dienen Gott, aunbäden un am auleen deenen». {5Mo.6,13}

¹¹Donn veleet de Diewel am, un kjikj, de Enjel kjeemen no am un deenden am.

¹²Aus hee hieed, daut Johanes jefangen jenomen wia, jinkj hee no Galiläa;

¹³un hee veleet Nazaret un kjeem un wond en Kapernaum, daut aum See (Tiberius) licht, en de Jäajent bie Sebulon un Naftali;

¹⁴om dautet erfelt wort, waut derch däm Profeet Jesaja jesajcht es, dee doa sajcht:

¹⁵«Daut Launt Sebulon un daut Launt Naftali, aum See, aun jane (aundre) Sied vom Jordan, daut heidnische Galiläa;

¹⁶daut Volkj, daut em Diestren saut, haft een grootet Licht jeseenen, un dän, dee em Launt un em Schauten vom Doot sauten, an es een Licht oppjegonen». {Jes.9,1.2}

¹⁷Von doa aun funk Jesus aun to prädjen, un to sajen: «Doot Busse, dan daut Himmelrikj es dichtbie jekomen».

¹⁸Aus hee aum galiläische See jinkj, sach hee 2 Breeda, Simon, dee uk Petrus heet, un Andreas sien Brooda, dee een Nat em See schmeeten, dan see wieren Fescha.

¹⁹Un hee säd to an: «Komt met mie met, un ekj woa junt to Menschenfescha moaken».

²⁰See veleeten plazlich äa Nat un jinjen met am met.

²¹Un aus hee von doa wieda jinkj, sach hee twee aundre Breeda: Jakobus, dän Zebedäus sien Sän, un Johanes, sien Brooda, met äa Voda Zebedäus em Schepp, un flekjten äare Nats, un hee roopt an.

²²Donn veleeten see plazlich daut Schepp un äa Voda un jinjen met am met.

²³Un Jesus jinkj derch gaunz Galiläa, un lieed en äare Sienagog un prädijd daut Evangelium von daut Rikj un heeld aule Krankheiten un aundret Lieden em Volkj.

²⁴Un hee wort bekaunt (beriemt) en gaunz Sierien; un see brochten no am aule Liedende, dee veschiedenste Krankheiten hauden un met Weedoag jekjwält wieren, un dee met beese Jeista besäten wieren un monsichtich un dee jelämt wieren; un hee heeld dee aula.

²⁵Un väl Volkj von Galiläa, un Dekapolis, un Jerusalem, un Judäa, un hinja däm Jordan, kjeem am hinjaraun.