Read De Bibel JHF Matäus 6 Bible Online

Matäus 6 - De Bibel JHF bible

Matäus 6

¹Paust opp, daut jie june Gow (Jerajchtichkjeit), nich ver Menschen eewen, met dän Senn daut jie wellen jeseenen sennen; wan oba nich, dan ha jie kjeen Loon von junem Voda em Himmel.

²Wan du diene Gow jefst, doo nich ne Trompeet veropp blosen loten, soo aus de Heichla doonen, enne Sienagogen, un oppe Gaussen, om von Menschen jeieet to woaren. En Woarheit saj ekj junt, see ha äa Loon emfangen.

³Oba wan du diene Gow jefst, dan lot diene Linkje nich weeten, waut diene Rajchte deit,

⁴om daut diene Gow em Jeheemen es; un dien Voda, dee em Jeheemen seenen kaun, woat die beloonen.

⁵Un wan du bätst, sie nich soo aus de Heichla, dee doa jieren stonen un bäden enne Sienagogen un opp de Gaussenakjen, om daut Menschen an seenen sellen. Woarhauftich, ekj saj junt, dee ha äa Loon emfangen.

⁶Du oba, wan du bäden deist, dan go en diene Koma, un nodäm du diene Däa veschloten hast, bäd too dienem Voda em Jeheemen; un dien Voda, dee em Jeheemen seenen kaun, woat daut die (aul hia) beloonen.

⁷Un wan jie bäden, sell jie nich (väle Wieed) plaupren soo aus de Heiden; dan dee meenen, daut an woat jehieet woaren, wan see väl Wieed brucken.

⁸Jie sellen an nich no moaken, (sennen aus dee), dan jun Voda weet, waut junt fält, ea jie am doano bedden.

⁹Jie bät soo: Ons Voda em Himmel! Dien Nomen woat jeheilicht.

¹⁰Dien Rikj (Himmelrikj) saul komen. Dien Wellen saul jedonen woaren aus em Himmel soo uk oppe Ieed.

¹¹Ons Broot fa disem Dach (bat Morjen) jeff ons vondoag.

¹²Un vejäw ons onse Schult, soo aus wie onse Schildna (aun ons veschuldicht ha) vejäwen.

¹³Un brinj ons nich en Vesieekjunk, oba rad ons vom Beesen.

¹⁴Dan soo aus jie Menschen äare Fäla vejäwen, soo woat jun himlischa Voda junt uk vejäwen.

¹⁵Oba wan jie Menschen [äare Fäla] nich vejäwen, soo woat junt de Voda june Fäla uk nich vejäwen.

¹⁶Oba wan jie fausten, sell jie nich diesta kjikjen aus de Heichla; dan see vestalen äare Jesechta, daut Menschen aun an seenen sellen daut see fausten. En Woarheit saj ekj junt: Dee ha äa Loon emfangen.

¹⁷Wan du oba fausten deist, soo saulw dien Haupt un wausch dien Jesecht,

¹⁸om dautet nich soo utsitt, ver Menschen, daut du fausten deist, oba dien Voda, dee em jeheemen es; un dien Voda, dee em jeheemen seenen kaun, woat die doafäa beloonen.

¹⁹Saumelt junt nich Schaza (Rikjtum) oppe Ieed, wua Motten un Rost daut venichten kjennen, un wua Deew daut nogrowen kjennen un stälen.

²⁰Saumelt junt oba Schauz em Himmel, wua Motten un Rost daut nich venichten kjennen, un wua Deew nich kjennen nogrowen un stälen.

²¹Dan wua dien Schauz es, doa woat uk jun (dien) Hoat sennen.

²²Daut Licht fa dän Kjarpa es daut Uag; wan dien Uag rein (opprechtich) es, soo woat dien gaunza Kjarpa Licht (dach) sennen.

²³Oba wan dien Uag doll es (nich rein), dan woat de gaunze Kjarpa diesta sennen. Wan oba daut Licht, daut en die es, Stockdiesta es, woo groot woat dan de Diestanis sennen!

²⁴Kjeena kaun 2 Harn deenen; ooda hee woat däm eenen haussen, un däm aundren goot sennen, ooda hee woat sikj aun eenem hoolen, un däm aundren veachten. Jie kjennen nich Gott uk dän Mamon deenen.

²⁵Doarom saj ekj junt: Doot junt nich Sorjen moaken om jun Läwen, waut jie äten un drinkjen woaren, uk nich fa jun Kjarpa, waut jie auntrakjen woaren. Es daut Läwen nich mea aus Äten? Un de Kjarpa mea aus Kjleeda?

²⁶Kjikjt de Väajel unjrem Himmel aun; dee seien nich, dee arnten nich, see saumlen uk nich en Spikjasch; un jun himlischa Voda foodat dee doch. Se jie nich väl mea wieet aus dee?

²⁷Wäa von junt, kaun derch Sorjen siene Hecht een kjlien bät velenjren?

²⁸Un wuarom se jie besorcht om de Kjleeda? Kjikjt no de Lelje oppe Stap, woo de waussen; dee oabeiden nich, spennen uk nich.

²⁹Ekj saj junt, daut soogoa Salomo en aul siene Harlichkjeit wia nich aunjekjleet soo aus eene von dee.

³⁰Wan Gott daut Grauss oppe Stap, daut vondoag steit un morjen em Owen jeschmäten woat, soo kjleeden deit, woat hee junt nich väl mea doonen, oo jie Kjliengloowsche?

³¹Doarom sell jie nich besorcht sennen un sajen: Waut woa wie äten? ooda: Waut woa wie drinkjen? ooda: Waut sell wie auntrakjen?

³²Doano sieekjen de Heiden. Oba jun himlischa Voda weet, daut junt daut aules fält.

³³Oba sieekjt daut ieeschte no Gott sien Rikj un no siene Jerajchtichkjeit, dan woat junt daut aules toojelajcht woaren.

³⁴Doarom sorcht nich fa Morjen, dan de Morjen woat fa sikj selfst sorjen. Jieda Dach haft jenuach Ploag.