Read De Bibel JHF Matäus 7 Bible Online

Matäus 7 - De Bibel JHF bible

Matäus 7

¹Doot nich rechten, soo daut jie nich jerecht woaren.

²Dan met waut verem Jerecht jie rechten, woa jie uk jerecht woaren; un met waut fa Mot jie mäten, woat junt toojemäten woaren.

³Wuarom sitst du dän Spletta en dienem Brooda sienem Uag, un dän Baulkjen en dienem Uag moakjst du nich?

⁴Ooda woo west du to dien Brooda sajen: Lot mie dän Spletta ut dienem Uag rutnämen, un kjikj, de Baulkjen es en dienem Uag?

⁵Du Heichla, trakj ieescht dän Baulkjen ut dienem Uag rut, un dan woascht du kloa seenen, om dän Spletta utem Brooda sien Uag to trakjen.

⁶Jeft nich daut Heilje de Hunj, un schmiet june Parlen nich vere Schwien, daut see dee nich vetraumplen met äare Feet un sikj omdreien un junt verieten.

⁷Bedd, un daut woat junt jejäft woaren; sieekjt, un jie woaren finjen; kloppt aun, un daut woat junt opjemoakt woaren.

⁸Dan jiedra Beddenda kjricht, un de Sieekjenda finjt, un jiedrem Aunklopendem woat opjemoakt.

⁹Ooda es unja junt een Mensch, wan sien Sän om Broot bedden (froagen) wudd, hee am een Steen jäwen wudd?

¹⁰Ooda, wan hee am om een Fesch bedden wudd, woat hee am eene Schlang jäwen?

¹¹Wan jie dan, dee jie schlacht sent, doch weeten (jie) june Kjinja goode Gowen to jäwen, wooväl mea woat jun Voda em Himmel junt Goodet jäwen, dee am froagen (bedden)!

¹²Aules aulsoo wautemma, jie wellen, daut de Menschen junt doonen sellen, daut doot uk jie an; dan daut es daut Jesaz un de Profeeten.

¹³Got nenn derch de enje Puat; dan de Puat es wiet un de Wajch es breed, de enne Vedaumnis fieet, un väle sent daut, dee derch dee nengonen (opp däm Wajch).

¹⁴Un de Puat es enj, un de Wajch es schmaul, dee toom Läwen fieet, un daut sent weinich, dee dän finjen.

¹⁵Paust (bewoat junt) fa de faulsche Profeeten opp, dee en Schopskjleeda no junt komen, oba ennalich (em Hoat) sent see rietende Wilw.

¹⁶Aun äare Frucht woa jie an erkjanen. Woaren Wiendruwen vom Stachelstruck jeplocken, ooda Fiejen von Distlen?

¹⁷Aulsoo, brinjt jieda gooda Boom goode Frucht; oba de fula (schlajchta) Boom brinjt schlajchte Frucht.

¹⁸Un gooda Boom kaun nich schlajchte Frucht brinjen, un een fula Boom goode Frucht brinjen.

¹⁹Jiedra Boom, de nich goode Frucht brinjt, woat aufjehakt un em Fia jeschmäten.

²⁰Doarom aun äare Frucht woa jie dee erkjanen.

²¹Nich jiedra, dee to mie sajcht: Har, Har! Woat en daut Himmelrikj (nenn) komen, blooss dee mienem Voda sien Wellen deit, dee em Himmel es.

²²Daut woaren väl, aun janem Dach, to mie sajen: Har! Har! Ha wie nich en dienen Nomen profezeit, ha wie nich en dienen Nomen Diewel utjedräwen, un ha wie nich en dienen Nomen väl groote Woakjen jedonen?

²³Dan woa ekj an bekjanen: Ekj ha junt noch nie jekjant; got wajch von mie, jie Jesazloose!

²⁴Wäa emma, dee dise miene Wieed hieet un dee deit, däm woa ekj met eenen kluaken Maun vejlikjen, dee sien Hus opp eenen Steen bud.

²⁵Aus een groota Räajen kjeem, un de Stroom kaum, un de Wint blosd, un toobd jäajen daut Hus, un daut foll nich; dan daut wia opp eenen Steen jebut.

²⁶Un wäa emma, dise miene Wieed hieet un dee nich deit, dee woat met eenem Noa vejlikjt woaren, dee sien Hus oppem Saunt bud.

²⁷Un de groota Räajen kjeem, un de Wotastroom kaum, un de Wint blosd un toobd om daut Hus; un daut foll, un sien Faul wia groot.

²⁸Un daut passieed, aus Jesus dise Wieed utjerät haud, donn staund daut Volkj äwa siene Lia;

²⁹dan hee lieed an aus eena, dee Vollmacht haud, un nich aus äare Schreftjelieede.