Read De Bibel JHF Matäus 8 Bible Online

Matäus 8 - De Bibel JHF bible

Matäus 8

¹Aus hee vom Boajch rauf kjeem, jinjen am väl Menschen hinjaraun.

²Un kjikj, een Utsauzja kjeem, un foll dol ver am un säd: Har, wan du west, kaust du mie rein moaken.

³Un hee (Jesus) strakjt siene Haunt ut, schieed am aun un säd: Ekj well; sie rein! Un plazlich wia hee vom Utsauz rein.

⁴Un Jesus säd to am: See die väa, saj daut kjeenem; oba go han, wies die däm Priesta, un brinj daut Opfa (Gow), dee Moses aunjeordnet haud, fa an een Tieekjen.

⁵Aus hee en Kapernaum nenn kjeem, kjeem een Hauptmaun no am, un prachad am

⁶un säd: Har, mien Kjnajcht licht Tus jelämt un woat sea jekjwält (Weedoag).

⁷Un Jesus säd to am: Ekj well komen un am heelen.

⁸De Hauptmaun oba auntwuad un säd: Har, ekj sie daut nich wieet, daut du unja mien Dak kjemst; oba saj een Wuat, un mien Kjnajcht woat jeheelt.

⁹Dan uk ekj sie een Mensch, unja Harscha un ha Kjrichsmana unja mie; un ekj saj to eenem: Go doa han, un hee jeit; un to eenem aunderen: Komm häa, un hee kjemt; un to mienem Kjnajcht: Doo daut! Un hee deit daut.

¹⁰Oba aus Jesus daut hieed, wundad hee sikj un säd to dän, dee met am jinjen: Woarhauft, saj ekj junt, en Israel ha ekj soo groote Gloowen nich jefungen.

¹¹Ekj saj junt oba, daut väl vom Oosten un vom Wasten komen woaren un met Abraham un Isaak un Jakob aum Desch setten em Himmelrikj,

¹²oba de Säns vom Rikj woaren rut en de Diestanis (Hal) jeschmäten woaren; doa woat sennen Hielen un Tänenkjnirschen.

¹³Un Jesus säd to däm Hauptmaun: Go han, du saust haben, aus du jejleeft hast. Un sien Kjnajcht wia von de Stund aun jesunt.

¹⁴Un aus Jesus en Petrus sien Hus jekomen wia, sach hee Petrus siene Schwiamutta krank met Feeba, em Bad.

¹⁵Un hee fot äa aune Haunt, un daut Feeba veleet äa; un see stunt opp un deend am (an).

¹⁶Aus et oba Owent wort, brochten see väl Besätne no am, un hee dreef de Jeista rut met een Wuat, un hee heeld aule Liedende,

¹⁷doamet erfelt woat, waut derch dän Profeet Jesaja jesajcht es, dee doa säd: «Hee haft onse Schwakheit opp sikj jenomen, un druach onse Krankheiten». {Jes.53,4}

¹⁸Oba aus Jesus väl Menschen om sikj sach, befool hee, aun daut aundre Eewa äwa to foaren.

¹⁹Un een Schreftjelieeda kjeem doatoo un säd to am: Liera, ekj well die nofoljen, wua emma du han jeist.

²⁰Un Jesus säd to am: De Fass ha Lajcha, un de Väajel aum Himmel ha Nasta, oba de Menschensän haft nich, wua hee sien Haupt hanlajen kaun.

²¹Een aundra von siene Jinja säd to am: Har, lot mie, ieescht gonen un mien Voda begrowen.

²²Oba Jesus säd to am: Folj mie no, un lot de Doodje äare Doodes begrowen.

²³Un aus hee en daut Schepp stieech, kjeemen siene Jinja met am met.

²⁴Un kjikj, doa kjeem een groota Storm oppem See, soo daut de Walle äwa daut Schepp schluagen; hee oba schleep.

²⁵De Jinja kjeemen, un wuaken am opp un säden: Har, rad ons, wie komen om!

²⁶Un hee säd to an: Wuarom ha jie Angst, jie Kjlienjleewje? Donn stunt hee opp un beschwicht dän Wint un daut See, un daut wort sea stell.

²⁷Un de Menschen vewundaden sikj oba un säden: Waut es dit fa Eena (Maun), daut uk de Wint un daut See am horchen (unjadon sent)?

²⁸Un aus hee nom aundren Eewa kjeem, en daut Gadarena (Gargesena) Launt, kjeemen am twee Besätne (Mana) entjäajen, dee ute Jräwa rutkaumen, un wieren sea jefäadlich, soo daut kjeena sikj woagd opp däm Wajch too gonen.

²⁹Un see, see schrieejen un säden: Waut ha wie met die to doonen, Sän Gottes? Best du jekomen, ons vere Tiet to kjwälen?

³⁰Doa wia oba wiet auf von an eene groote Häad Schwien, dee doa grosden.

³¹De beese Jeista oba bedden am, un säden: Wan du ons rutdrifst, dan schekj ons en de Schwienshäad nenn.

³²Un hee säd to an: Got han. Donn fuaren see rut, un fuaren en de Schwien nenn. Un kjikj, de gaunze Häad schmeet sikj vom Eewa em See nenn, un vesopen em Wota.

³³Oba de Schwienshoads randen wajch un kjeemen enne Staut un vetalden aules uk waut met de Besätne passieet wia.

³⁴Un kjikj, de gaunze Staut kjeem rut, Jesus entjäajen, un aus see am sagen, bedden see am, daut hee äare Jäajent veloten sull.