Read De Bibel JHF Matäus 9 Bible Online

Matäus 9 - De Bibel JHF bible

Matäus 9

¹Un hee stieech en daut Schepp, un fua no de aundre Sied un kjeem en siene ieejne Staut. {Kap.4,13}

²Un kjikj, see brochten eenen Jelämden no am, dee opp een Bad lach; un aus Jesus äa Gloowen sach, säd hee to däm Jelämden: Sie gootsmoots, Kjint, diene Sinden sent die vejäft.

³Un kjikj, eenje von de Schreftjelieede säden to sikj selfst: Disa lastat.

⁴Un aus Jesus äare Jedanken sach, säd hee: Wuarom ha jie schlajchte Jedanken en junem Hoat?

⁵Dan waut es leichta, too sajen: Diene Sinden sent die vejäft, ooda to sajen: Sto opp un go?

⁶Oba daut jie weeten sellen, daut de Menschensän opp Ieed Jewault haft de Sinden to vejäwen. Dan säd hee to däm Jelämden: Sto opp, nemm dien Bad un go no dienem Hus.

⁷Un hee stunt opp un jinkj no sien Hus.

⁸Aus de Menschen daut sagen, hauden see Angst (vewundaden sikj) un veharlichten Gott, dee soone Vollmacht (Jewault) däm Mensch jejäft haft.

⁹Un aus Jesus von doa wieda jinkj, sach hee een Mensch aum Zollhus (Taksbood) setten, dee Matäus heet, un säd to am: Komm met mie met. Un hee stunt opp un jinkj met am met.

¹⁰Un daut passieed, aus hee en däm Hus aum Desch saut (lach), kjikj, doa kjeemen väl Zollmana un Sinda, un sauten aum Desch met Jesus un siene Jinja.

¹¹Un aus de Farisäa daut sagen, säden see to siene Jinja: Wuarom at jun Liera (Meista) met Zollmana un Sinda?

¹²Oba aus hee [Jesus] daut hieed, säd hee: De Stoakje brucken dän Dokta nich, blooss de Kranke.

¹³Oba got han un lieet, wautet es (meent): «Ekj well Erboarmen un nich Opfa (Schlachtopfa)»; {Hos.6,6} dan ekj sie nich jekomen, de Jerajchte to roopen, oba de Sinda.

¹⁴Donn kjeemen Johanes siene Jinja no am un säden: Wuarom doo wie un de Farisäa foaken fausten, oba diene Jinja fausten nich?

¹⁵Un Jesus säd to an: Kjennen däm Briegaum siene Jast truarich sennen, soo lang aus de Briegaum bie an es? Daut woaren Doag komen, doa de Briegaum von an woat wajchjenomen woaren, un dan woaren see fausten.

¹⁶Oba kjeena sat een nieet Flekj Zeich opp een oolet Kjleet; dan daut (Flekj) woat von däm Kjleet loosrieten, un daut Loch woat oaja (jrata).

¹⁷Uk deit maun nich nieen Wien en oole Wienladasch; un de Wien woat vejeeten, un de Wienladasch twei gonen; oba maun deit nieen Wien en niee Wienladasch, un dan bliewen beid erhoolen.

¹⁸Aus hee soo to an räd, kjikj, doa kjeem een Väastona nenn un schmeet sikj ver am han un säd: Miene Dochta es nu jrod jestorwen; oba komm un laj diene Haunt opp äa, un see woat läwen.

¹⁹Un Jesus stunt opp un jinkj am hinjaraun, un siene Jinja.

²⁰Un kjikj! Eene Fru, dee 12 Joa Moonatfluss haud, kjeem von hinjen un rieed dän Soom {4Mo.15,37-39} von sien Rock aun;

²¹dan see säd to sikj selfst: Wan ekj blooss sien Rock aunria, dan woa ekj jesunt (jerat) woaren.

²²Oba Jesus dreid sikj om, un aus hee äa sach, säd hee: Sie gootsmoots, Dochta; dien Gloowen haft die jeheelt. Un de Fru wia jesunt von de Stund aun.

²³Un aus Jesus en däm Väastona sien Hus kjeem un de Fleetenspäla un daut lude Jetimmel von Menschen sach,

²⁴säd hee: Got rut, dan de Mejal es nich jestorwen, oba see schlapt. Un see lachten am ut.

²⁵Oba aus de Menschen aula rut jejoach wieren, jinkj hee nenn un neem äare Haunt; un de Mejal stunt opp.

²⁶Un dit Nies (Jeräd) jinkj un janem gaunzen Launt erom.

²⁷Un aus Jesus von doa wieda jinkj, kjeemen am 2 Blinje hinjaraun, dee doa schrieejen un säden: Erboarm die äwa ons, du David sien Sän!

²⁸Oba aus hee en däm Hus jekomen wia, kjeemen de Blinje no am; un Jesus säd to an: Jleew jie, daut ekj daut doonen kaun? See säden to am: Jo, Har.

²⁹Donn schieed hee äare Uagen aun un säd: No junen Gloowen sell jie kjrieen.

³⁰Un äare Uagen worden opjemoakt; un Jesus räd an strenj aun un säd: Paust opp, daut dit kjeena enwoat!

³¹Oba see jinjen rut un muaken am bekaunt un janem gaunzen Launt.

³²Aus see wach jinjen, kjikj, donn brochten see eenen stommen Mensch no am, dee besäten wia.

³³Un aus de Diewel (Dämon) rutjedräwen wia, räd de Stomma. Un de Menschen vewundaden sikj un säden: Niemols wort soowaut en Israel jeseenen.

³⁴Oba de Farisäa säden: Hee drift de Diewel rut derch dän bowaschten Diewel.

³⁵Un Jesus jinkj derch aul de Städa un Darpa un lieed en äare Sienagogen un prädijd daut Evangelium vom Rikj un heeld jiedre Krankheit un jiedre Schwakheit.

³⁶Oba aus hee daut Volkj sach, haud hee Erboarmen met (äwa) an, wiels dee (Menschen) Meed un enne Noot wieren aus Schop, dee kjeen Hoad haben.

³⁷Donn säd hee to siene Jinja: De Arnt es groot, oba weinich Oabeida;

³⁸bedd däm Har äwa de Arnt, daut hee Oabeida schekjt en siene Arnt.