Read De Bibel JHF Markus 1 Bible Online

Markus 1 - De Bibel JHF bible

Markus 1

¹De Aunfank vom Evangelium von Jesus Christus, däm Sän Gottes;

²aus en Jesaja, däm Profeet, jeschräwen steit: «Kjikj, ekj schekj mienem Bootschofta ver dienem Aunjesecht, dee dienem Wajch reed moaken woat».

³«Eenem Roopenden siene Stemm enne Wieste: Moakt däm Wajch fa däm Har reed, moakt sien Stich jlikj». {Mal.3,1; Jes.40,3}

⁴Johanes kjeem un deept enne Wieste un prädijd de (eene) Doop (Deepen) de Busse to Sindenvejäwunk.

⁵Un doa jinjen no am rut, ut däm gaunzen judischen Launt un aule Bewona von Jerusalem; un see worden em Jordanfluss von am jedeept, endäm see äare Sinden bekjanen.

⁶Oba Johanes wia jekjleet met Kameelenhoa un eenem ladanen Gort om siene Lenden; un hee aut Heischrakjen un willen Honnich.

⁷Un hee prädijd un säd: No mie kjemt eena, dee stoakja es aus ekj, däm ekj nich wieet sie, ver am to bekjen un de Schoobenja optoleesen.

⁸Ekj ha junt met (em) Wota jedeept, oba hee woat junt metem (em) Heiljen Jeist deepen.

⁹Un daut passieed en de Doag, doa kjeem Jesus von Nazaret en Galiläa, un wort von Johanes em Jordan jedeept.

¹⁰Un plazlich, aus hee utem Wota rut kjeem, sach hee de Himmel opjemoakt (sikj deelen) un däm Jeist aus ne Duw opp am rauf komen.

¹¹Un eene Stemm kjeem utem Himmel: Du best mien leefsta Sän, aun die ha ekj Wooljefaulen jefungen.

¹²Un sooboolt dreef de Jeist am rut enne Wieste.

¹³Un hee wia 40 Doag enne Wieste un wort vom Soton vesocht, un hee wia bie (unja) de Tieren, un de Enjel deenden am.

¹⁴Oba nodäm Johanes jefangen jenomen wia, kjeem Jesus no Galiläa, prädijd daut Evangelium vom Gottesrikj

¹⁵un säd: De Tiet es erfelt, un daut Rikj Gottes es nodajekomen. Denkjt om (bekjieet junt) un jleeft aun de frooe Bootschoft (daut Evangelium).

¹⁶Aus hee oba aum galiläischen See jinkj, sach hee Simon un Andreas, Simon sien Brooda, dee een Nat em See schmeeten, dan see wieren Fescha.

¹⁷Un Jesus säd to an: Komt met mie, un ekj woa junt to Menschenfescha moaken;

¹⁸un plazlich veleeten see äare Nats un jinjen am hinjaraun (met am).

¹⁹Un aus hee von doa wieda jinkj, sach hee Jakobus, däm Zebedäus sien Sän, un sienem Brooda Johanes, uk see wieren em Schepp, woo see de Nats flekjten;

²⁰Un sooboolt roopt hee an. Un see leeten äaren Voda Zebedäus em Schepp met de Deena un jinjen wajch, am hinjaraun (met am).

²¹Un see jinjen no Kapernaum. Un sooboolt jinkj hee aum Sabat enne Sienagog un lieed.

²²Un see wieren sea erstaunt äwa siene Lia; dan hee lieed an aus eena, dee Vollmacht haud, un nich soo aus de Schreftjelieede.

²³Un doa wia en äare Sienagog een Mensch met eenen orreinen Jeist; un dee schrieech opp

²⁴un säd: Waut ha wie met die to doonen, Jesus, Nazarena? Best du jekomen, ons to venichten? Ekj kjan die, wäa du best; de Heilja Gottes.

²⁵Un Jesus befool (dreiwd) am, un säd: Sie stell un foa ut am rut!

²⁶Un de orreine Jeist reet am han un häa, schrieech met eene lude Stemm un fua von am ut.

²⁷Un see wieren aula erstaunt, un fruagen sikj unjarenaunda, un säden: Waut es dit? Waut es dit fa eene niee Lia? Dan met Vollmacht befält hee selfst de orreine Jeista, un see jehorchen am.

²⁸Un plazlich jinkj daut Jeräd äwa (von) am ut enne gaunze galiläische Omjäajent.

²⁹Un sooboolt veleeten see de Sienagog un kjeemen en Simon un Andreas äa Hus, met Jakobus un Johanes.

³⁰Oba däm Simon siene Schwiamutta lach met Feeba krank em Bad, un sooboolt säden see am von äa.

³¹Un hee jinkj un recht äa opp, endäm hee äare Haunt naum, un daut Feeba veleet ar, un see deend an.

³²Oba aus et Owent jeworden wia, un de Sonn unja jinkj, brochten see aule Kranke un Besätne no am;

³³un de gaunze Staut wia aune (vere) Däa vesaumelt.

³⁴Un hee heeld väl, dee aun veschiedne Krankheiten liedent wieren, un dreef väl Dämonen (beese Jeista) ut un leet de Dämonen nich räden, wiels dee am kjanden.

³⁵Un tiedich zemorjes, aus et noch sea dunkel wia, stunt hee opp un jinkj rut un jinkj aun eenen eensomen Uat un doa bäd hee.

³⁶Simon un dee met am wieren, jinjen am hinjaraun;

³⁷un aus see am jefungen hauden, säden see to am: Aula sieekjen die.

³⁸Un hee säd to an: Lot ons no de noba Darpa gonen, doamet ekj uk doa prädij; dan doatoo sie ekj utjegonen.

³⁹Un hee prädijd en äare Sienagogen en gaunz Galiläa un dreef de Dämonen ut.

⁴⁰Un doa kjeem een Utsauzja no am, bedd am un kjneed sikj ver am un sajcht to am: Wan du west, kaust du mie rein moaken.

⁴¹Oba Jesus, ennalich bewäacht, strakjt de Haunt ut, schieed am aun un sajcht to am: Ekj well; sie (woa) jereinicht.

⁴²Un [aus hee noch räd] plazlich veleet am de Utsauz, un hee wia jereinicht.

⁴³Un hee bedreiwd am, un schekjt am fuaz wajch

⁴⁴un sajcht to am: Kjikj too, saj kjeenem doavon; oba go han, wies die däm Priesta un brinj een Opfa fa diene Reinjunk, soo aus Moses befoolen haft, an to eenem Zeichnis.

⁴⁵Oba hee jinkj wajch un funk aun, väl doavon to räden (wiet un breet doavon to räden) un de Sach uttobreeden, soo daut hee (Jesus) nich mea frie enne Staut gonen kunn; oba hee wia buten en eensome Städen un see kjeemen no am von aule Sieden.