Read De Bibel JHF Markus 10 Bible Online

Markus 10 - De Bibel JHF bible

Markus 10

¹Un hee jinkj von doa un kjemt en de Jäajent von Judäa un aun jane Sied vom Jordan. Un wada kjemt väl Volkj toop, no am, un soo aus hee jewant wia, lieed hee an wada.

²Un donn kjeemen Farisäa un fruagen am: Eset eenem Maun erlaubt, siene Fru to entloten? Endäm see am vesochten.

³Oba hee auntwuad un säd to an: Waut haft Moses junt befoolen?

⁴Oba see säden: Moses haft daut erlaubd, eenen Scheedungsbreef to schriewen un äa to entloten.

⁵Un Jesus auntwuad un säd to an: Wäajen june hoade Hoaten haft hee junt dit Jeboot jeschräwen;

⁶oba von Aunfank de Erschaufunk muak Gott (an) Maun un Fru.

⁷«Doarom woat een Mensch sien Voda un siene Mutta veloten un siene Fru aunhenjen,

⁸un daut woaren dee twee een Fleesch sennen»; {1Mo.2,24} aulsoo sent see nich mea twee, oba een Fleesch.

⁹Waut Gott toop jefieet haft, saul de Menschen nich uteneen rieten.

¹⁰Un em Hus fruagen am de Jinja wada doaräwa;

¹¹un hee säd to an: Wäa emma sikj von siene Fru scheeden deit un eene aundre frieen woat, bejeit een Ehebräakjen jäajen äa.

¹²Un wan eene Fru sikj von äarem Maun scheide deit un eenen aundren frieen woat, soo bejeit see een Ehebräakjen.

¹³Un see brochten Kjinja no am, om daut hee an aunschieren sull. Oba de Jinja wäaden dän, dee, dee an brochten.

¹⁴Oba aus Jesus daut sach, wia hee ontofräd un säd to an: Lot de Kjinja no mie komen un wäat an nich, dan fa soone es daut Rikj Gottes.

¹⁵Woarhauft, ekj saj junt: Wäa emma daut Rikj Gottes nich soo aunnämen woat aus een Kjint, woat nich doa nenkomen.

¹⁶Un hee neem dee en siene Oarms, läd de Henj opp an un säajend an.

¹⁷Un aus hee oppem Wajch rutjinkj, rand eena no am, foll ver am oppe Kjnee un fruach am: Gooda Liera, waut saul ekj doonen, om daut ekj eewjet Läwen oawen kaun?

¹⁸Oba Jesus säd to am: Waut nanst du mie goot? Kjeena es goot aus blooss Eena, Gott.

¹⁹Du weetst de Jebooten: «Du saust nich dootmoaken; du saust nich Ehe bräakjen; du saust nich stälen; du saust nich faulschet Zeichnis jäwen; du saust nich tualeiden (beschumlen), iea dienen Voda un diene Mutta».

²⁰Oba hee auntwuad un säd to am: Liera, daut ha ekj aules jehoolen von miene Jugent aun.

²¹Oba Jesus kjikjt am aun, leewd am un säd to am: Die fält Eent; go han, vekjeep, waut emma du hast, un jeff de Oame daut, un du woascht een Schauz em Himmel ha, un komm, [nemm daut Kjriez opp die] un folj mie no.

²²Oba hee jinkj, bedrekjt äwa de Wieed, truarich wajch, dan hee haud väl Hab- un Goot.

²³Un Jesus kjikjt sikj rom un säd to siene Jinja: Woo schwoa woaren dee, dee doa Rikjtum ha, en daut Rikj Gottes nengonen.

²⁴Oba de Jinja wieren erstaunt äwa siene Wieed. Oba Jesus auntwuad wada un säd to an: Kjinja, woo schwoa es daut, daut dee, dee doa opp Rikjtum vetruen, en daut Rikj Gottes nengonen.

²⁵Daut es leichta, daut een Kameel derch daut Noteluag jeit, aus daut een Rikja en daut Gottesrikj nenjeit.

²⁶Oba see wieren buta Moot erstaunt un säden to eenaunda: Un wäa kaun dan jerat woaren?

²⁷Oba Jesus kjikjt an aun un säd: Bie Menschen es daut ommäajlich, oba nich bie Gott, dan bie Gott sent aule Dinj mäajlich.

²⁸Petrus funk aun, to am to sajen: Kjikj, wie ha aules veloten un sent die nojefolcht.

²⁹Jesus auntwuad un säd: Woarhauft, ekj saj junt: Doa es kjeena, dee Hus ooda Breeda ooda Sestren ooda Mutta ooda Voda [ooda Fru] ooda Kjinja ooda Launt veloten haft om mient un om daut Evangelium haulwen,

³⁰dee nich 100-mol soo väl kjrieen woat, nu en dise Tiet Hiesa un Breeda un Sestren un Mutta un Kjinja un Launt unja Vefoljunk, un enne komenden Tiet, daut eewje Läwen.

³¹Oba väle Ieeschte woaren de Latste, un de Latste de Ieeschte sennen.

³²Oba see wieren oppem Wajch enopp no Jerusalem, un Jesus jinkj ver an; un see vefieeden (ängsten) sikj, endäm see am nofoljden, hauden see Angst. Un hee neem wada dee 12 no sikj un funk aun, an to sajen, waut met am passieren sull:

³³Kjikjt, wie gonen enopp no Jerusalem, un de Menschensän woat de Huagapriesta un de Schreftjelieede utjeleewat woaren; un see woaren am toom Doot veuadeelen un woaren am aune Heiden utleewren (äwajäwen);

³⁴un see woaren am vespotten un am aunspieen un am schlonen un am dootmoaken; un no dree Doag woat hee oppstonen.

³⁵Un donn kjeemen no am Jakobus un Johanes, däm Zebedäus siene Säns, un säden to am: Liera, wie wellen, daut du fa ons deist, om wautemma wie die bedden woaren.

³⁶Oba hee säd to an: Waut well jie, daut ekj fa junt doonen saul?

³⁷Oba see säden to am: Jeff ons, daut wie eena aun diene Rajchte un eena aun diene Linkje setten derwen en diene Harlichkjeit.

³⁸Oba Jesus säd to an: Jie weeten nich, om waut jie bedden. Kjenn jie dän Drunk (Kuffel) drinkjen, dän ekj drinkj, ooda met däm Deepen jedeept woaren, met dee ekj jedeept woa?

³⁹Oba see säden to am: Wie kjennen daut. Oba Jesus säd to an: Däm Drunk, däm ekj drinkj, woa jie drinkjen, un met däm Deepen, met de ekj jedeept woa, woa jie jedeept woaren;

⁴⁰oba daut Setten aun miene Rajchte ooda Linkje steit mie nich too, to vejäwen, oba es fa dee, fa dän dee reed jemoakt sent.

⁴¹Un aus de 10 daut hieeden, fungen see aun, onwellich (doll) to woaren äwa Jakobus un Johanes.

⁴²Un aus Jesus an no sikj jeroopt haud, säd hee to an: Jie weeten, daut dee, dee aus Harscha äwa de Nazionen sent, äwa an harschen, un äare groote Jewault äwa an eewen.

⁴³Oba soo es daut nich unja junt; oba wäa emma unja junt groot woaren well, saul (woat) jun Deena sennen;

⁴⁴un wäa emma von junt de Ieeschta sennen well, saul (woat) fa aule een Kjnajcht sennen.

⁴⁵Dan uk de Menschensän es nich jekomen, om bedeent to woaren, oba om to deenen un sien Läwen to jäwen aus Leesjelt fa väle.

⁴⁶Un see komen no Jericho. Un aus hee ut Jericho rutjinkj met siene Jinja un väl Volkj, saut däm Timäus sien Sän, Bartimäus, de Blinja, un prachad aum Wajch.

⁴⁷Un aus hee hieed, dautet Jesus, de Nazarena wia, funk hee aun to schrieen un to sajen: Oo Jesus, David sien Sän, erboarm die äwa mie!

⁴⁸Un väle beschwichte am, daut hee stell sennen sull; oba hee schrieech noch dolla: David sien Sän, erboarm die äwa mie!

⁴⁹Un Jesus bleef stonen un leet am roopen: Un see roopten däm Blinjen un säden to am: Sie mootich; sto opp, hee roopt die!

⁵⁰Hee oba schmeet sien Kjleet auntsied, sprunk opp un kjeem no Jesus.

⁵¹Un Jesus funk aun un säd to am: Waut west du, daut ekj fa (aun) die doonen saul? Oba de Blinja säd to am: Rabunie (Meista), daut ekj seenent woa.

⁵²Oba Jesus säd to am: Go han, dien Gloowen haft die jeheelt (jerat). Un sooboolt kunn hee seenen un foljd am oppem Wajch no.