Read De Bibel JHF Markus 11 Bible Online

Markus 11 - De Bibel JHF bible

Markus 11

¹Un aus see dichta no Jerusalem, Betfage un Betanien komen, jäajenäwa däm Eeljboajch, schekjt hee twee von siene Jinja

²un säd to an: Got han en daut Darp, daut junt jäajenäwa licht; un sooboolt, wan jie doa nenkomen, woa jie een Falm aunjebungen finjen, opp däm noch kjeen Mensch jesäten haft; leest daut loos un brinjt daut häa.

³Un wan irjent wäa to junt sajcht: Wuarom doo jie daut? Dan sajcht: De Har brukt daut; un fuaz schekjt hee daut hiahäa.

⁴Oba see jinjen han un fungen een Falm aunjebungen aune Däa, buten aune Gauss; un see binjen daut loos.

⁵Un atelje von dee, dee doa stunden, säden to an: Waut doo jie, daut jie daut Falm loosbinjen?

⁶Oba see säden to an, soo aus Jesus jesajcht haud. Un see leeten an gonen.

⁷Un see brochten daut Falm no Jesus un läden äare Kjleeda doa nopp, un hee sad sikj doa nopp.

⁸Oba väle spreeden äare Kjleeda ut oppem Wajch; aundre schneeden Asta vonne Beem [un streiden dee oppem Wajch];

⁹un dee veropp jinjen un dee hinjaraun jinjen, schrieejen: Hosiana! Jesäajent es, dee doa em Har sien Nomen kjemt! {Ps.118,25.26}

¹⁰Jesäajent es ons Voda David sien komendet Rikj! Hosiana enne Hecht (em Hechsten)!

¹¹Un hee kjeem en Jerusalem nenn un jinkj em Tempel; un aus hee äwa aules omhäa jekjikjt haud, jinkj hee, doa daut aul lot aune Tiet wia, met de 12 rut no Betanien.

¹²Un aum näakjsten Dach, aus see von Betanien wajch jegonen wieren, hungad am.

¹³Un aus hee von wiet een Fiejenboom sach, de Bläda haud, jinkj hee han, auf hee veleicht irjent waut (Frucht) aun am finjt; un aus hee no am kjeem, funk hee nuscht buta Bläda, dan daut wia nich de Tiet fa Fiejen.

¹⁴Un hee funk aun un säd to am (toom Boom): Niemols mea saul irjent wäa en Eewichkjeit von die Frucht äten! Un siene Jinja hieeden daut.

¹⁵Un see komen no Jerusalem. Un aus hee em Tempel nenn jegonen wia, funk hee aun ruttojoagen, dee em Tempel koften un vekoften; un de Jeltwakjsla äare Descha un de Benkjen dee Duwen vekoften schmeet hee om.

¹⁶Un hee erlaubd nich, daut irjentwäa een Jefäss derch däm Tempel druach.

¹⁷Un hee lieed un säd to an: Steitet nich jeschräwen: «Mien Hus woat een Bädhus jenant woaren fa aule Nazionen»? {Jes.56,7} «Oba jie ha daut to eene Reibaheel jemoakt». {Jer.7,11}.

¹⁸Un de Huagapriesta un de Schreftjelieede hieeden daut un sochten, woo see am kunnen ombrinjen; dan see enjsten sikj fa am, wiels daut gaunze Volkj sea erstaunt wia äwa siene Lia.

¹⁹Un aus et Owent jeworden wia, jinkj hee ute Staut rut.

²⁰Un aus see tiedich zemorjes vebie jinjen, sagen see dän Fiejenboom vedrieecht vonne Wartlen aun.

²¹Un Petrus docht doaraun un säd to am: Rabi, kjikj, de Fiejenboom, dän du vedaumen deedst, es vedrieecht.

²²Un Jesus auntwuad un säd to am: Habt Gloowen aun Gott.

²³Woarhauft saj ekj junt: Wäa emma to disem Boajch sajen woat: Woa oppjehowen un em Mäa jeschmäten! Un nich twiewlen woat en sienem Hoat, oba jleeft, daut woat passieren, waut hee sajcht, daut woat hee kjrieen.

²⁴Doarom saj ekj junt: Aules, om waut emma jie bäden un bedden, jleeft, daut jie daut kjrieen woaren, un daut woat junt woaren (jie kjrieen).

²⁵Un wan jie em Jebäd stonen, soo vejäft, wan jie waut jäajen irjent wäm haben, om daut junt jun Voda, dee enne (em) Himmel es, junt june Fäla vejäft.

²⁶Oba wan jie nich vejäwen, dan woat jun Voda, dee enne (em) Himmel es, junt uk nich june Fäla vejäwen.

²⁷Un see kjeemen wada no Jerusalem. Un aus hee em Tempel omhäa jinkj, kjeemen de Huagapriesta un de Schreftjelieede un de Eltesta no am

²⁸un säden to am: En wäm siene Vollmacht deist du dit (dise Dinj)? Un wäa haft die dise Vollmacht jejäft, daut du dit deist?

²⁹Oba Jesus säd to an: Uk ekj well junt een Wuat froagen, un auntwuat mie, un ekj woa junt sajen, en wäm siene Vollmacht ekj dit doo.

³⁰Wia Johanes sien Deepen vom Himmel ooda von Menschen? Auntwuat mie.

³¹See äwaläden sikj unjarenaunda un säden: Wan wie sajen, vom Himmel, dan woat hee sajen: Wuarom ha jie am dan nich jejleeft.

³²Oba saj wie, von Menschen? - See enjsten sikj fa daut Volkj; dan aula hilden von Johanes, daut hee werkjlich een Profeet wia.

³³Un see auntwuaden un säden to Jesus: Wie weeten daut nich. Un Jesus säd to an: Uk ekj saj junt nich, en wäm siene Vollmacht ekj dit (dise Dinj) doo.