Read De Bibel JHF Markus 16 Bible Online

Markus 16 - De Bibel JHF bible

Markus 16

¹Un aus de Sabat vebie wia, koften Maria Magdalena un Maria, Jakobus siene Mutta, un Salome scheenrikjende Kjriedarie, om daut see hangonen un am saulwen.

²Un sea tiedich aum ieeschten Dach enne Wäakj kjeemen see nom Grauf, aus de Sonn oppjegonen wia.

³Un see säden to eenaunda: Wäa woat ons dän Steen von de Graufdäa wajch rollen?

⁴Un aus see oppkjikjten, sagen see, daut de Steen wajchjerolt es; dan dee wia sea groot.

⁵Un aus see em Grauf nenn jinjen, sagen see eenen jungen Maun aune rajchte Sied setten, aunjetrocken met eenem wittem, langem Kjleet, un see vefieeden sikj.

⁶Oba hee säd to an: Enjst junt nich, jie sieekjen Jesus, dän Nazarena, dän Jekjriezichten. Hee es oppjestonen, hee es nich hia. Kjikjt de Städ, wua see am hanjelajcht hauden.

⁷Oba got han, sajcht siene Jinja un Petrus, daut hee ver junt no Galiläa jeit; doa woa jie am seenen, soo aus hee junt jesajcht haud.

⁸Un see jinjen rut un randen vom Grauf wajch. Dan Zetren un Entsaten haud an äwafollen, un see säden kjeenem waut, dan see enjsten sikj.

⁹[Oba aus hee tiedich aum ieeschten Dach enne Wäakj oppjestonen wia, leet hee sikj ieescht seenen von Maria Magdalena, von däa hee 7 Dämonen utjedräwen haud.

¹⁰Dise jinkj han un vekjindijd daut dän, dee met am jewast wieren, dee doa truaden un hielden.

¹¹Un aus dee hieeden, daut hee läft un see am jeseenen haud, jleewden see daut nich.

¹²Oba nodäm openboad hee sikj aun twee von an en eene aundre Jestault, aus see oppem Launt jinjen.

¹³Un dise jinjen han un berechten daut dän aundren (äwajen); uk an jleewden see nich.

¹⁴Nohäa, aus see aum Desch lagen, openboad hee sikj de 11 un scheld äaren Ongloowen un äa hoadet Hoat, daut see dän, dee am oppjewakjt jeseenen, nich jejleeft hauden.

¹⁵Un hee säd to an: Got han en de gaunze Welt un prädicht daut Evangelium de gaunze Erschaufunk.

¹⁶Wäa doa jleeft un jedeept woat, woat jerat woaren; oba wäa nich jleeft, woat vedaumt woaren.

¹⁷Oba dise Tieekjens woaren dän nofoljen, dee doa jleewen: En mienem Nomen woaren see Dämonen utdriewen; see woaren met niee Tungen räden,

¹⁸woaren Schlangen opphäwen (nämen), un wan see jeftjet (Dootmoakendet) drinkjen, soo woat an daut nich schoden; opp Kranke woaren see de Henj opplajen, un see woaren jesunt woaren.

¹⁹De Har [Jesus] wort, nodäm hee met an jerät haud, em Himmel oppjenomen un sad sikj aune Rajchte Gottes.

²⁰Oba jane jinjen ut un prädijden aulewäajes, endäm de Har metwirkjt un daut Wuat bestädijd derch de Tieekjen dee doaropp foljden.]