Read De Bibel JHF Markus 4 Bible Online

Markus 4 - De Bibel JHF bible

Markus 4

¹Un hee funk wada aun, aum See to lieren. Un väl Menschen vesaumelden sikj bie (om) am, soo daut hee en een Schepp, em See stieech, un sad sikj dol; un aul dee Menschen stunden oppem Launt aum See.

²Un hee lieed an väl en Jlikjnisen; un hee säd to an en siene Lia:

³Horcht! Kjikjt, de Seimaun jinkj ut to seien.

⁴Un daut passieed, aus hee seid, foll ateljet aum Wajch, un de Väajel kjeemen un frauten daut opp.

⁵Un aundret foll opp steenajet Launt, wua daut nich väl Ieed haud; un kjeem boolt opp, wiels et nich deepe Ieed haud.

⁶Un aus de Sonn oppjinkj, vebrend daut, un wiels et kjeene Wartlen haud, vedrieejd et.

⁷Un aundret foll manke Stachlen; un de Stachlen kjeemen opp un stekjten daut, un daut jeef kjeene Frucht.

⁸Un aundret foll opp goode Ieed, un jeef Frucht, jinkj opp un woss; un eenjet brocht 30-, un eenjet 60-, un eenjet 100-mol soo väl.

⁹Un hee säd: Wäa Uaren haft toom hieren, dee hia!

¹⁰Un aus hee auleen wia, fruagen am, dee om am wieren met de 12 om de Jlikjnisen.

¹¹Un hee säd to an: Junt es daut jejäft, de Jeheemnisen vom Himmelrikj [to weeten]; oba dee, dee buten sent, woat aules en Jlikjnisen metjedeelt,

¹²«om daut see seenent seenen un nich woa nämen (erkjanen), un hierent hieren un nich vestonen, doamet see sikj nich meteemol bekjieren, un an vezeit (vejäft) woat». {Jes.6,10}

¹³Un hee säd to an: Kjenn jie dit Jlikjnis nich vestonen? Un woo woa jie aule Jlikjnisen vestonen?

¹⁴De Seimaun seit daut Wuat.

¹⁵Oba daut sent dee aum Wajch: Wua daut Wuat jeseit woat, un wan see daut hieren, sooboolt kjemt de Soton un nemt daut Wuat wajch, daut en äare Hoaten jeseit wia (es).

¹⁶Un dise sent dee, dee oppem Steenajen Launt jeseit woaren, dee, wan see daut Wuat hieren, daut fuaz met Freid opp nämen,

¹⁷un see ha kjeene Wartel en sikj, oba sent mau fa ne korte Tiet, dan, wan Bedrenkjnis ooda Vefoljunk kjemt wäajen daut Wuat, sooboolt steeten see sikj.

¹⁸Un aundre sent dee, dee doa manke Stachlen jeseit woaren: Dee sent daut, dee daut Wuat jehieet ha,

¹⁹un de Sorjen em Läwen (enne Welt) un daut veleiden vom Rikjtum un daut Velangen no aundre (bätre) Dinj komen nenn un stekjen daut Wuat, un daut brinjt kjeene Frucht.

²⁰Un dise sent daut, dee oppe goode Ieed jeseit sent, dee daut Wuat hieren un aunnämen un Frucht brinjen: Eena 30-, un eena 60-, un eena 100-mol soo väl.

²¹Un hee säd to an: Woat ne Laump, unjrem Jefäss ooda unja däm Bad jestalt? Woat dee nich opp een Laumpenhoola jestalt?

²²Doa es nuscht jeheemet, daut nich woat jeopenboat woaren, un kjeen Jeheemnis, daut nich verendach komen woat.

²³Wan wäa Uaren haft toom hieren, dee horch.

²⁴Un hee säd to an: Paust opp, waut jie hieren; met dän Mot daut jie mäten, woat junt jemäten woaren, un daut woat junt doatoo jelajcht woaren.

²⁵Dan wäa doa haft, däm woat jejäft woaren; un wäa nich haft, von däm woat uk daut, waut hee haft, jenomen woaren.

²⁶Un hee säd: Aulsoo es daut Gottesrikj, wan een Mensch daut Sot oppe Ieed schmitt,

²⁷un hee schlapt un steit opp, Nacht un Dach, un daut Sot kjemt väa un waust, hee weet selfst nich woo.

²⁸De Ieed brinjt ut sikj selfst de Frucht väa, ieescht daut Grauss, dan de Oa, dan de vollen Weit enne Oa.

²⁹Oba wan de Frucht riep es, sooboolt schekjt hee de Sans (Siechel), dan de Arnt es jekomen.

³⁰Un hee säd: Met waut sell wie daut Gottesrikj vejlikjen? Ooda en waut fa eenem Jlikjnis sell wie daut väastalen?

³¹Soo aus een Sampkuarn, daut, wan daut oppe (enne) Ieed jeseit woat, es kjlanda aus aule Sotkjieena, oppe Ieed;

³²un, wan daut jeseit es, jeitet opp un woat jrata aus aulet Krut un kjricht groote Asta, soo daut en sienem Schauten de Väajel unjrem Himmel sikj nastlen.

³³Un en väl soone Jlikjnisen räd hee to an daut Wuat, soo aus see daut hieren (vestonen) kunnen.

³⁴Oba onen Jlikjnisen räd hee nich to an; oba siene Jinja erkjläad hee aules.

³⁵Un aun janem Dach, aus et Owent wia, säd hee to an: Lot ons äwa foaren no daut aundre Eewa.

³⁶Un aus hee daut Volkj gonen leet, neemen see am, em Schepp met soo aus hee wia. Oba uk aundre Schäp wieren met (bie) am.

³⁷Un doa kjeem een groota Wintkjriesel (Wintstorm), un de Walle schluagen em Schepp, soo daut et aul meist voll wia.

³⁸Un hee wia em Hinjadeel vom Schepp un schleep opp eenem Koppkjessen; un see wuaken am opp un säden to am: Liera, licht die nuscht doaraun, daut wie omkomen?

³⁹Un hee wuak opp, bedreiwd däm Wint un säd toom See: Sie stell, beruij die! Un de Wint läd sikj, un daut wort sea stell.

⁴⁰Un hee säd to an: Waut se jie [soo] enjstlich? Wuarom, ha jie kjeen Gloowen?

⁴¹Un see enjsten sikj sea (groote Angst) un säden to eenaunda: Wäa es dan disa, daut uk de Wint un de See am horchen?